Nehemiya

5 Lelo antu yatandike ukuilizyanya sana pamwi na ya mama yao pa mulandu wa Yayuda yauze. 2 Yamwi yalandanga yakuti: “Tukweti ana aingi alumendo na akazyana. Tulinzile ukukwata ivyakulya pakuti tutwalilile ukuya nu umi.” 3 Yauze yalandanga yakuti: “Tumapeela ivyalo vitu ivya ngaano ni vyalo vintu ivya myangazi na mang’anda itu kuti viye usininkizyo uwakuti tulalipila inkongole pakuti tupeelwe ivyakulya mu nsita ya cipowe.” 4 Yauze nayo yalandanga iyati: “Itukongola impiya pa vyalo vitu ivya ngaano ni vyalo vitu ivya myangazi pakuti tulipile umutulo uku mwene. 5 Twaaya icili cimwi na ina itu nupya ana itu i cili cimwi na ana yao, lelo tulinzile ukupeela ana itu alumendo na akazyana umu uzya nupya anitu yamwi akazyana yaya mpiti umu uzya. Nomba tutakweti maka pali cii, pano ivyalo vitu ivya ngaano ni vya myangazi i vya yantu yauze.”

6 Nasosile sana lino nuvwile ukuilizyanya kwao na mazwi kwene yaa. 7 Fwandi nelenginyepo sana pa vintu vii, nupya nakalipile antu acindikwe ni ntunguluzi nu kuyanena inti: “Mwensi kwene cila muntu mukulonda ukumulundilapo impiya izingi pa mpiya zino mwakongwesya aina inu.”

Fwandi napekinye ukuti kuye ukukongana ukukalamba pa mulandu wao. 8 Nupya nayanenyile inti: “Twezya na maka itu yonsi ukufika pano tungapezya pakuti tukale aina itu Ayuda aakaziwe uku nko zyuze; nomba uzye mumakazya aina inu nu kuyakala nupya?” Lino yuvwile vivyo, ikazile mya nupya yataakweti ivili vyonsi ivya kulanda. 9 Lyene natiile: “Vino mukucita vitazifile. Uzye mutanga mutiine Leza witu pakuti antu amu nko, alwani itu, yatatuzewanya? 10 Nupya aina yane, aomvi yane, kumwi nani kwene, tukuyazimisya impiya ni vyakulya. Si lekini tutaakongwesya aina itu impiya nu kulonda ukuti yatulundilepo. 11 Si yawezezyini ilelo kwene ivyalo vyao ivya ngaano, ivyalo vyao ivya myangazi, ivyalo vyao ivya miolivi, na mang’anda yao, alino ni mpiya zino yaamulundiilepo, ivyakulya, waini umupya, alino na mafuta yano mukulonda ukuti yamulundilepo.”

12 Lino yuvwile vivyo yatiile: “Tumayawezezya ivintu vii alino tutalayalengapo nupya, tumacita vivyo kwene vino walanda.” Fwandi namile ya simapepo nu kulenga aonsi yaa ukuti yalape ukuti yamacita vino yalaya. 13 Nupya nakunsile matumba ya cakuzwala cane nu kulanda inti: “Umu nzila ili imwi, si Leza wa cumi akunte umu ng’anda ya muntu ali wensi, nu mu vintu vyakwe uwakana ukulondela ulayo uu, nupya umu nzila ili imwi kwene akuntwe nu kusyala ukwaula icili consi.” Lyene yonsi yatiile: “Ameni!” Nupya yalumbanyizye Yeova na antu yacisile vyonsi vino yalavile.

14 Nupya ukufuma pa wanda uno wanjisile ukuya umulasi wa mu mpanga iya Yuda, ukufuma umu mwaka uwalenga 20 ukufika umu mwaka uwalenga 32 uwa kuteeka kwa Mwene Alitakisesi, kuli kuti pa myaka 12, nemo pamwi na ina yane tutatazile itulya ivyakulya ivilinzile ukupeelwa uku mulasi. 15 Nomba alasi aankoleelile yacuzyanga antu nupya cila wanda yapokanga masyekele* yakwe siuva 40 aakukalila umukate na waini. Nupya aomvi yayo yacuzyanga sana antu. Lelo nemo ntacitanga vivyo pa mulandu wakuti natiinanga Leza.

16 Nupya naomvileko umulimo uu uwa kukuula iviumba, nupya tutaaposile icalo icili consi; aomvi yane yonsi yakolongine pakuti yaombe umulimo uu. 17 Kwali Ayuda 150 na ya cilolo aalyanga pamwi nani alino na aizanga kuli sweswe ukufuma umu nko zyuze. 18 Cila wanda yampekanyizizyanga cipambasi wenga, imfwele izisuma sana 6, ni vyunyi, nupya lyonsi nga papita manda 10 twakwatanga waini ya misango ipusanepusane iingi. Asi mulandu na vii vyonsi ntatazile ndenge ivyakulya ivilinzile ukupeelwa uku mulasi, pano antu yaombanga imilimo ikome. 19 We Leza wane si uce unjiusye pali vyonsi vino nacitila antu yaa.