Ezaya
12 Mu wanda uuwa ulalanda uti:
“Nkukutaizya we Yeova,
Pano nanti cakuti wansokiile,
Ukali wako wacefile, nupya wanteekizye.
2 Lolini! Leza aali kapususya wane.
Ndamutaila nupya ntaluvwa intete;
Pano Jah* Yeova aali maka yane nupya kacingilila wane,
Nupya wiza waya aali kapususya wane.”
3 Mulaya ni nsansa lino mulaatapa manzi
Umu tufukoka twi pusukilo.
4 Mu wanda uuwa mulalanda muti:
“Taizyini Yeova, lumbanyini izina lyakwe,
Lekini imilimo yakwe imanyikwe uku yantu!
Manyisyini ukuti zina lyakwe ilicindikwa.
5 Imbilini Yeova pano watacita ivintu vya kuzungusya.
Lekini vii vimanyikwe umu nsi yonsi.
6 Pundisyini ni nsansa mwe yantu ya mu Zioni,
Pano Uwa Muzilo Wakwe Izlaeli aali muli mwemwe u mukalamba.