Kufuma
15 Pa nsita kwene iiya Mose na Ina Izlaeli imbiile Yeova ulwimbo luu iyati:
“Nkanimbile Yeova pano watacindamikwa sana.
Watasumbila imfwalasi muli yemba kumwi nu wakwezilepo.
2 Jah* ali maka yane, pano watampususya.
Ali Leza wane, nupya nimamulumbanyanga; ali Leza wakwe tata, nupya nimamucindikanga.
3 Yeova u musilika wa maka. Izina lyakwe a Yeova.
4 Maceleta yakwe Falao na asilika yakwe, watavisumbila muli yemba,
Na asilika yakwe amaka sana iyamwela muli Yemba Muyenzu.
5 Amanzi aingi yaayavimbilikizye; yaatuwile ukufika na pansi wakwe vino iwe likatuwila.
6 Ikasa lyako ili lunji, we Yeova, lyakwata sana maka;
Ikasa lyako ili lunji, we Yeova, lingacimvya umulwani.
7 Pa mulandu na maka yako aingi ungatama pansi yayo aakakulwisya;
Ukatuma ukali wako uwaya wa moto, nupya ukayoca wi sote.
8 Pa mulandu nu mupu ukafuma umu mpuno zyako, manzi yakolongine;
Iimilile wa ciumba;
Maimbi iimilile pakasi kakwe yemba.
9 Mulwani walanzile ati: ‘Nimayazinganya! Nu kuyazana!
Nimaankanya vino nimayapoka nu kutola vino nkulonda!
Nimaomvya ulupanga lwane! Ikasa lyane limayacimvya!’
10 Wapuusile umupu wako, yemba wayavimbilikizye;
Yaatuwile umu manzi aingi kwati icela icinyome.
11 A weni muli ya leza uwaya wakwe wewe, we Yeova?
A weni uwaya uwa muzilo sana wakwe wewe?
Wemuno walinga ukutiina ukupitila umu kukwimbila inyimbo zya kulumbanya, wemuno ukacita ivizungusyo.
12 Wakonzolwile ikasa lyako ili lunji, nupya insi yayamizile.
13 Pa mulandu nu kutemwa kwako ukwa cisinka, watutungulula antu yano wakulwile;
Ku maka yako ulayatungulula uku ncende yako iya muzilo.
14 Antu yaluvwa; yalaya ni ntete;
Nupya Aina Filisti yalaya sana nu ulanda.
15 Pa nsita iiya intunguluzi zya mutundu wakwe Edomu ziluvwa intete,
Nupya ya kateeka amaka amu Moabu yalazakaza.
Aikazi ya mu Kenani yonsi yalatoovoka.
16 Intete zilayalema nupya yalazakaza.
Pa mulandu ni ikasa lyakwe ilya maka yalimilila wi we
Kufikila antu yako yapite, we Yeova,
Kufikila antu yano wapanzile yapite.
17 Ulayaleta nu kuika umu mwamba wako uwa upyanyi,
Incende ino waipekanyizizya ukwikalamo, we Yeova,
Incende ya muzilo, we Yeova, ino wapanzile ukuomvya makasa yako.
18 Yeova alateeka manda pe.
19 Lino imfwalasi zyakwe Falao na maceleta yakwe a nkondo alino na akwezile pa mfwalasi ingiile muli yemba,
Yeova wawezizye amanzi amuli yemba pali aliyo,
Lelo Aina Izlaeli yapisile pali yemba pa musili uume.”
20 Lyene Milyamu kasesema umwanaci, kaci wakwe Aloni, watozile kangoma nupya anaci yonsi yamulondiile ala yali nu tungoma nupya ala yakucina. 21 Milyamu wimbanga ala akutolelezya aonsi ati:
“Imbilini Yeova, pano watacindamikwa sana.
Watasumbila imfwalasi muli yemba kumwi nu wakwezilepo.”
22 Pa cisila Mose watungulwile Aina Izlaeli ukufuma kuli Yemba Muyenzu, nupya yaile umu lwanga lwa Syuli, yapisile manda yatatu umu lwanga, lelo yataazanyile manzi. 23 Yafisile uku Mara,* lelo yataakwanisye ukumwa manzi aku Mara pano yaali alule. Uli mulandu uno watemiile incende iiyo ati Mara. 24 Fwandi antu yatandike ukuilizyanya kuli Mose iyati: “Tumamwa cani?” 25 Mose waliliile kuli Yeova, Yeova nawe wamutungulwile uku kamuti. Lino wasumbiile kamuti kako umu manzi, manzi yasangwike iyaya asuma.
Paapa kwene apano Leza wayapeeliile isunde lya kulondela nupya apano wayezizye. 26 Leza wayanenyile ati: “Ndi cakuti mwakulauvwa kuli nene ne Yeova Leza winu nu kucita icisuma umu manso yane nupya ndi cakuti mwakulaikisya mano uku masunde yane nu kucita vyonsi vino nkumunena, ntalamuletela indwala zino nalesile pa Ina Ijipti, pano ne Yeova, ndalenga muye nu umi usuma.”
27 Lyene yafisile uku Elimu, ukwali utufukoka twa manzi 12 ni miti ya tuncindu 70. Kuuku kwene akuno yapanzile inkambi umupiipi na manzi.