Ezekeli
17 Nupya kwene Yeova wanenyile ati: 2 “We mwana wa muntu, landa kacole ni pinda pa ya mu ng’anda yakwe Izlaeli. 3 Uyanene uti, ‘Yeova Umwene wa Papelapela walanda wati: “Lyang’anda umukalamba uwa maapa akalamba, atali nupya uwa maalamaala waile uku Lebanoni nu kuputula kamusambo ka mukedali aka pa nsongo. 4 Kamusambo kano waputwile wakatwazile uku mpanga ya yaculuzi* nu kukalema kuuku kwene. 5 Lyene watozile ulumbezu lumwi ulwa mu mpanga nu kuyalukomela umu mpanga iivunde. Walukomiile wa muti uukakula umu mbali ya manzi aingi. 6 Lwamezile nu kuya umwangazi uwipi lelo usakate, na mafwa yalozizye pansi nupya imisisi yayanga sile pansi. Fwandi wizile iuya umwangazi iukwata ni misambo.
7 “‘“Nupya kwali lyang’anda na muze uwakweti amaapa akalamba nupya atali. Lyene umwangazi watwazile imisisi kuli aliwe nupya walozizye mafwa kuli aliwe pakuti aukontelela. 8 Wacisile vivyo nanti cakuti walanga yaukomela pa ncende isuma apaali manzi aingi pakuti ukwate imisambo, waseeka nu kuya umwangazi ukalamba.”’
9 “Ulande uti, ‘Yeova Umwene wa Papelapela walanda wati: “Uzye umuti uu ulakula? Uzye umwi atalauputula imisisi nu kulenga iviseekwa ukuola ni misisi ukuuma? Uluuma icakuti kutalalondekwa umuntu uwa maka nanti antu aingi pa kuwipula kumwi ni misisi. 10 Nanti cakuti yaulema cipya cipya, uzye ulalemuka? Uzye utaluuma lino umuza wa ku ufumondaka ulapungilapo? Ee uluuma.”’”
11 Nupya kwene Yeova wanenyile ati: 12 “Nena amu ng’anda yakwe yacipondoka uti, ‘Uzye mutamanyile vino ivintu vii vikupiliula?’ Uti, ‘Umwene wa ku Babiloni waile uku Yelusalemu ayasenda umwene na ya cilolo ayatwala uku Babiloni. 13 Nupya watozile umwana wa mwene nu kupangana nawe upangano nu kumulapisya. Lyene wasenzile antu acindikwe amu mpanga, 14 pakuti uwene usile maka utaca ukwate maka nupya, na pakuti utwalilile sile ukuyako ndi cakuti akusunga upangano. 15 Lelo umwene wamupondokiile lino watumile aomvi uku Ijipti umu kusenda imfwalasi na asilika aingi. Uzye umwene uwacita vivyo alatunguluka? Uzye alapusuka? Uzye angatama upangano nu kuutuka?’
16 “‘Yeova Umwene wa Papelapela walanda wati: “Nkulapa ukuti alafwila umu Babiloni, mu mpanga umukaikala umwene* uwamwisile* apa wene, wino wasuuzile umulapo uno walafile kuli aliwe nupya wino watamiile upangano. 17 Na asilika yakwe Falao aingi yatalamwazwa umu nkondo lino asilika Ina Babiloni yalapanga ivya kuzanzilako nu kukuula iviumba ukuzingulusya umusumba pakuti yakome antu aingi. 18 Wasuula umulapo uno walafile nu kutama upangano. Nanti cakuti walafile umulapo, wacita ivintu vii vyonsi nupya atalapusuka.”’
19 “‘Fwandi Yeova Umwene wa Papelapela walanda wati: “Nkulapa, ndamufulula pali vino wasuuzile umulapo wane nu kutama upangano wane. 20 Ndateya isumbo pali aliwe nawe alalemya. Ndamutwala uku Babiloni nu kuyamupingula pa mulandu wakuti ataali ni cisinka kuli nene. 21 Mbutusi zyonsi izya mu yasilika yakwe zilakomwa uku lupanga, na yonsi aalasyalako yalasalanginila umu ntunga zyonsi. Lyene mulamanya ukuti nene ne Yeova nalanzile ivintu vii.”’
22 “‘Yeova Umwene wa Papelapela walanda wati: “Ndatola umusambo uwa papela ya mukedali utali nu kuulemeka, nupya uku tumisambo twa pa nsongo ndaputulako kamusambo akatonte nu kuyakalemeka papela ya mwamba utali. 23 Ndakalemeka pa mwamba utali umu Izlaeli; misambo ilakula nu kulaseeka ivizao nupya kalaya umukedali ukalamba. Ni vyunyi vyonsi vilaaya uku cimuti kwene cico uku cisaao. 24 Nupya imiti yonsi ya mu mpanga ilamanya ukuti nene ne Yeova nalenga umuti utali ukuya uwipi nu kutalimfya umuti uwipi; nalenga umuti uulembe ukuuma nu muti uume ukulemba. Nene ne Yeova indanda, nupya umu cumi nacita vivyo kwene.”’”