Isamu
Ku mukalamba wakwe ya kiimba. Lwimbo luno Devedi wimvile.
40 Napaalilanga Yeova nu mwenzo onsi,
Nupya wisile sana mano kuli nene nu kuvwa ukulila kwane pakuti angazwe.
2 Wamfumizye umu ciwina umwali manzi ya mukuku,
Wamfumizye umu matipa.
Nupya wanjimike pa ciliwe;
Walenzile ukuti nimilile apacingililwe.
3 Lyene wansambilizye ulwimbo ulupya,
Ulwa kulumbanya Leza.
Aingi yalaopa
Nu kutaila Yeova.
4 Uwa nsansa u muntu aakataila Yeova
Nupya asitaila antu akome imyenzo nanti aakazumila ivya ufi.
5 Ivintu uwingi vino wacita,
We Yeova Leza wane,
Imilimo yako iya kuzungusya na melenganyo yako pali sweswe.
Kusi aangalingana naawe;
Ndi cakuti naali nu kwezya ukulanda pa milimo yako yonsi yii,
Ingavulisya icakuti ntanga njipende nu kuipenda!
6 Utalondanga ilambo nu upe,
Lelo wanjuzile amatwi ukuti nuvwe.
Utaalenzile malambo ya koca na malambo ya pa luyembu.
7 Lyene natiile: “Lola, iniza.
Calembwa pali nene umu lupapulo.
8 Natemwa ukucita ukulonda kwako, we Leza wane,
Nupya masunde yako yaya muli nene.
9 Nkasimikila ilyasi lisuma ilya ulungami umwi umba lya yantu aingi.
Nsikanya imilomo yane we Yeova,
Wakwe vino wamanya.
10 Nsifisa ulungami wako umu mwenzo wane.
Nkalanda pali ucisinka wako na pa kupususya kwako.
Nsifisa ukutemwa kwako ukwa cumi ni cumi cako umwi umba lya yantu aingi.”
11 We Yeova utaleka uluse lwako lufume pali nene.
Si leka ukutemwa kwako ukwa cumi ni cumi cako vitwalilile ukuncingilila.
12 Intazi izyatizinzinguluka izivulisya icakuti zitanga zipendwe.
Imembu zyane izivulisya nupya izincimvya icakuti ntanga ndole ni nzila umwa kupita;
Izivulisya ukucila inyele izya ku mutwe wane,
Nupya intoovoka.
13 Si itemelwe ukumpususya we Yeova.
We Yeova pitisya ngazwe.
14 Si yonsi aakulonda ukunkoma
Yuvwe insonyi nupya yazewane.
Si yonsi aakasansamukila umu kucula kwane
Yutuke ale iyazewana.
15 Si yayo aakanena iyati: “Eya! Eya!”
Yuvwe intete pa mulandu ni nsonyi zyao.
16 Lelo leka aakakulonda
Yasansamukile nu kuzangila muli wewe.
Leka yayo aatemwa ukupususya kwako lyonsi yalanda iyati:
Si Yeova alumbanyiziwe.
17 Lelo nemo ntakweti uwa kungazwa nupya nene mupiina;
Si Yeova aike mano kuli nene.
Wewe uli kaazwa wane nupya kapususya wane;
We Leza wane, utacelwa.