Ezaya
44 “Uvwa kuno Yakobo, we muomvi wane,
Na we Izlaeli, wemuno nasoolola.
2 Yeova, Kaumba wako
Uwakupanzile nupya uwakwazwile
Ukufuma pa kuvyalwa walanda wati:
‘Utuvwa intete, we Yakobo umuomvi wane,
Na we Yesyuluni,* wemuno nasoolola.
3 Ndapeela manzi uku yantu aya nu lusala*
Ni nguzi uku mpanga iyume.
Ndapeela umupasi uku yana yako
Na mapaalo uku ya mu lupwa lwako.
4 Nupya yalakula wi sote iliteku,
Na wa miti iyaya umu mbali ya tunguzi.
5 Umwi alalanda ati: “Nene wakwe Yeova.”
Muze nawe alayama ukuomvya izina lyakwe Yakobo,
Lyene muze nawe alalemba api kasa lyakwe ati: “Nene wakwe Yeova.”
Nupya alatola izina lyakwe Izlaeli.’
6 Yeova Umwene wakwe Izlaeli nupya Kakulula wakwe,
Yeova wa maumba, walanda wati:
Nene indi wa kutandikila nupya uwa kusyalikizya.
Kutaaya Leza muze suka sile nene.
7 A weni uwaya wakwe nene?
Lekini alande nupya apeele usininkizyo!
Wakwe vino nkacita ukufuma pano napangiile antu aaliko mpiti,
Lekini nayo yatunene ivintu ivilacitika uku nkoleelo
Ni vyasya vicitike.
8 Mwe yantu yane mutazakaza,
Nupya mutuvwa intete.
Uzye ntamunena mpiti nu kumumanyisya vyonsi?
Mwemwe ya nte yane.
Uzye kwaya Leza muze ukucila pali nene?
Awe, kutaya iciliwe na cuze; nemo ntacimanya.’”
9 Yonsi aakapanga ivilubi aasile sile,
Nupya ivintu vyao vino yatemwa vitalayaazwa.
Ya kambone yao,* yasilola icili consi nanti ukumanya icili consi,
Aakayapanga yalazewana.
10 A weni aangapanga leza nanti cilubi ca cela
Icitanga cimwazwe?
11 Ya cuza yakwe yonsi yalazewana!
Aakapanga ivilubi aantu sile.
Lekini yonsi yakolongane nu kwimilila pa vifulo vyao.
Yaluvwa intete nupya yalazewana.
12 Aakasula ivintu akatola icela acoca umu moto.
Alino acisula na maka,
Nu kupangamo icilubi;
Akauvwa inzala nupya maka yakwe yakasila;
Asimwa manzi nupya akatonta
13 Aakapanga ivintu ukuomvya imbao akakonzolola intambo ya kupimilako.
Akasila vino akulonda ukupanga ukuomvya ica kulembelako iciyenzu.
Nu kusila ukuomvya ica kusililako,
Akacipanga wa muntu nu kuciyemvya wa muntu,
Pakuti caikala umu ng’anda.
14 Kwaya umwi aakaomba umulimo wa kukoma imikedali.
Akasoolola umuti uno yakaama ukuti umuoaki,
Akaleka iukula sana pamwi ni miti yuze iya mu mpanga.
Akalemeka umuti nupya imvula ikalenga iukula.
15 Lyene cikaiza iciya u lukwi luno umuntu akaomvya ukupembelako umoto.
Cimwi akaciomvya uku koota;
Akapemba umoto nu kupangilapo umukate.
Lelo akapangilako na leza nu kulamupepa.
Akapangilako icilubi nu kulacifukamila.
16 Afu wa cimuti akapembelako umoto;
Nupya pa moto uuwo akaocapo inyama iya kulya nupya akaikuta.
Lyene akaota nu kulanda ati:
“Eya! Umoto uu usuma sana ukota.”
17 Lelo icimuti icasyala akapangilamo leza, kuli kuti cilubi.
Akacifukamila nu kucipepa.
Akapepa uku cilubi cico ati:
“Mpususye, pano wewe uli leza wane.”
18 Yatamanya icili consi, nupya yasiiluka,
Pano yapafula nupya yasilola,
Imyenzo yao ikalenga yatailuka.
19 Kusi aakaelenganyapo nanti uwamanya
Nanti aakailuka nu kulanda ati:
“Afu wa cimuti napembiileko umoto,
Nupya pa moto uuwo napangiilepo umukate nu kocelapo inyama iya kulya.
Uzya lyene icimuti icasyala acino mpangile icintu ca winyi?
Uzye icimuti acino ningapepa?”
20 Ali wa muntu aakulya itwi.
Umwenzo wakwe wamuponzya.
Atanga aipususye nanti ukulanda ukuti:
“Cino indema ukwi kasa ica sile sile.”
21 “We Yakobo, iusya ivintu vii, naawe kwene we Izlaeli,
Pano wewe muomvi wane.
Nakupanzile nupya wewe umuomvi wane.
Ntalakwilila we Izlaeli.
22 Ndavimba pali vino ukaluvyanya kwati nkuomvya ikumbi
Na pa membu zyako kwati nkuomvya ikumbi litikame.
Wela kuli nene, pano ndakukulula.
23 Pundini ni nsansa mwe mayulu,
Pano Yeova watacita vii!
Pundini ukupunda kwa kucimvya, mwe yantu ya mu nsi!
Pundini ni nsansa mwe myamba,
Na mwe mitengo ni miti yonsi!
Pano Yeova watakulula Yakobo,
Nupya watalangizya ululumbi lwakwe kuli Izlaeli.”
24 Yeova Kapususya wako,
Uwakwazwile lino wali umunda yakwe mayo wako walanda wati:
“Nene Yeova uwapanzile ivintu vyonsi.
Nene nakonzolwile mayulu
Nu kupanga insi.
A weni uwali nani?
25 Nkavulunganya ivimanyililo vyakwe ya cilandelande,*
Nupya nene nkaleka aakasapoola ukuya wa yawelewele;
Nkavulunganya antu ya mano
Nu kuleka mano yao yaye uwelewele;
26 Nkafikilizya vino umuomvi wane walanzile
Na vino inkombe zyane zyasoowile;
Nene nkalanda pali Yelusalemu inti, ‘Mulikala antu,’
Na pa misumba iya mu Yuda inti, ‘Ilakuulwa cipya cipya,
Nupya ndazifya ivyononeka’;
27 Nene nkanena yemba ukuti, ‘Kama,
Nupya ndakamya inguzi zyako zyonsi’;
28 Nene nkalanda pali Sailasi ukuti, ‘Namusonta ukuya kacema,
Nupya alacita vyonsi vino nkulonda’;
Nene nkalanda pali Yelusalemu ukuti, ‘Alakuulwa cipya cipya,’
Na pi tempele inti, ‘Umufula wako ulakuulwa.’”