Milimo ya Atumwa
22 “Mwe inane kumwi na yatata, uvwini vino nkulanda.” 2 Lino yuvwile ukuti akulanda nayo umu lulimi lwa Ciebele, iikazile mya, nupya walanzile ati: 3 “Nene Muyuda uwavyalilwe umu Tasi uku Kilikiya, lelo nasambiliziwe kuli Gamalieli umu musumba kwene uu, nupya nasambiliziwe ukulingana na masunde ya vikolwe, nupya nacincila muli vyakwe Leza wakwe vino namwe kwene muli pa wanda wi lelo. 4 Nacuzyanga nu kukomisya alondelanga inzila ya Mwene, nupya nanyepanga aonsi na anaci nu kuyatwala uku vifungo, 5 na simapepo mukalamba kumwi na akalamba ya mu cilye yonsi yanganjimililako ukambone. Nupya aampeezile makalata aakutwala uku ina umu Damasika, nayanga umu kulema aali kuuku nu kuyaleta umu Yelusalemu ala aanyepwe pakuti yafululwe.
6 “Lyene umupiipi na kasanya pakasi lino nali pa lwendo ala nkupalama uku Damasika, papo kwene sile uluswepo ukufuma ukwi yulu lwanzingulwike, 7 nupya naponyile pansi nu kuvwa izwi likuti: ‘Saulo, Saulo, u mulandu ci uno ukuncuzizya?’ 8 Nani naswike inti: ‘Uzye wewe weni Mwene?’ Nawe walanzile ati: ‘Nene Yesu, uwa ku Nazaleti wino ukucuzya.’ 9 Lyene aonsi aali pa lwendo nani yaweni uluswepo, lelo yatuvwile izwi lyakwe wino walandanga nani. 10 Lyene nuzizye inti: ‘Mwene i vyani vino indinzile ukucita?’ Mwene nawe wanenyile ati: ‘Katuka uwingile umu Damasika, nupya amuno ulanenwa vyonsi vino ivipingulwa ukuti avino ulinzile ukucita.’ 11 Lelo vino ntalolanga icili consi pa mulandu nu kuyengesa kwa luswepo, aonsi yano nali nayo yandemile api kasa nu kuyamfisya umu Damasika.
12 Lyene umonsi umwi uwi zina lyakuti Ananiya, uwatiinanga Leza ukulingana na Masunde, nupya wino Ayuda yonsi aikalanga kuuku yasimikanga ningo, 13 wizile kuli nene. Nupya wimilile mupiipi nani nu kunena ati: ‘Saulo mwinane, tandika ukulola!’ Nani papo kwene natandike ukulola nupya namuweni. 14 Walanzile ati: ‘Leza wa vikolwe vitu watakusoolola pakuti umanye ukulonda kwakwe nu kulola umulungami alino nu kuvwa izwi lyakwe, 15 pano ulaya kambone wakwe uku yantu yonsi pa vintu vino watulola nu kuvwa. 16 I cani cino ukuloleela? Katuka nu kubatiziwa, nupya Leza alelela imembu zyako ndi cakuti ukulumbula izina lyakwe Yesu.’
17 “Lelo lino naswilile uku Yelusalemu nupya lino nali umwi tempele ala nkupepa, naweni icilolwa 18 ala Yesu akunena ati: ‘Pitisya fuma zuwa umu Yelusalemu, pano yatalazumila unte uno ulayanena pali nene.’ 19 Nani nalanzile inti: ‘Mwene, yaamanya ningo ukuti nayalilanga umu cifungo akutaile nu kuyuma ivikoti umu masunagogi; 20 nupya lino yakomanga Sitivini uwasimikilanga pali wewe, nani apano nali nupya nazumilizyeko, nasunzile ni vyakuzwala vyakwe yano yamukomanga.’ 21 Lelo wanenyile ati: ‘Pitanga, pano ndakutuma ukutali uku yantu ya mu nko.’”
22 Yatwalilile ukukutika kuli vino Paulo walandanga ukufikila lino walanzile amazwi yayo. Lyene yapunzile iyati: “Mukomini, pano atalinzile ukuya nu umi!” 23 Pa mulandu wakuti yapundanga nu kusumba ivyakuzwala vyao, alino nu kukatusya ulukungu umupela, 24 mukalamba wa yasilika walanzile ukuti yatwale Paulo muno asilika ikalanga, nupya walanzile ukuti yamume ivikoti pakuti alande umulandu uno antu yamupundililanga umu musango uu. 25 Lelo lino yamunyefile pakuti yamume ivikoti, Paulo wanenyile musika wa yasilika uwimilile umupiipi ati: “Uzye isunde lyazumilizya ukuma umwina Loma ivikoti aatakweti umulandu?” 26 Lino musika wa yasilika uvwile vivyo, waile uku mukalamba wa yasilika nu kumuzya ati: “I cani cino ukulonda ukucita? Pano umuntu wii u mwina Loma.” 27 Lyene umukalamba wa yasilika waile kuli Paulo nu kumuzya ati: “Uzye wewe mwina Loma?” Nawe waswike ati: “Ee.” 28 Umukalamba wa yasilika walanzile ati: “Nemo pakuti inje umwina Loma nalipiile impiya izingi.” Paulo nawe walanzile ati: “Lelo nemo amuno navyalilwe.”
29 Lyene lilyo kwene aonsi aali umupiipi nu kutandika ukumuma ivikoti yamutalwike; nupya umukalamba wa yasilika uvwile intete lino wamanyile ukuti u mwina Loma na pali vino wamunyefile umu maceni.
30 Fwandi uwanda uwalondelilepo, vino walondanga ukumanya ningo umulandu uno Ayuda yamupeelanga, wamusapwile nupya wanenyile ya simapepo akalamba na yonsi amu cilye ca Sanihedilini ukuti yakolongane. Lyene wafumizye Paulo nu kumwimika pa nkoleelo yao.