Ezaya
8 Lyene Yeova wanenyile ati: “Tola iwe ilikalamba ilipapatane, ulembepo ukuomvya ica kulembelako cino antu yakaomvya uti, ‘Maeli-syalali-hasyi-bazi.’* 2 Nkulonda ukuti inte zyane izya cumi, kuli kuti Uliya simapepo na Zekaliya mwana Yebelekiya zilole ukuti walemba.”
3 Lyene napanzile icupo na mamane uwali a kasesema umwanaci, nawe wizile akwata inda avyala nu mwana umonsi. Lyene Yeova wanenyile ati: “Umutemele izina ilyakuti Maeli-syalali-hasyi-bazi, 4 pano lino umwana atatala wamanya ukulanda ukuti tata nu kuti mayo ivintu vya mu Damasika ni vyuma ivya mu Samaliya vilasendwa nu kupeelwa uku mwene uwa ku Asilya.”
5 Nupya Yeova wanenyile nu kuti:
6 “Pa mulandu wakuti antu yaa iyakana manzi aakakonkoloka ningo umu mufolo wa Syiloa
Nu kuya uku lusansa lwakwe Lezini na kuli mwana Lemaliya,
7 Nani ne Yeova ndayaletela manzi ya mukuku
Nupya aingi sana amu Luzi,*
Kuli kuti umwene uwa ku Asilya na maka yakwe yonsi.
Aliza wa luzi ulwatiluzuula sana
Nu kwizasambezya ivituntu vyakwe vyonsi
8 Amanzi yalasalanganila umu mpanga ya Yuda.
Alaya wakwe mulamba, nupya alafika nu mu nsingo;
Alakonzolola maapa nu kuvimba impanga yako yonsi,
We Emanweli!”*
9 Citangini iviipe, lelo mulavungolwa.
Uvwini kuno mwensi mwe yantu ya kutali!
Ipekanyini ukulwa, lelo mulavungolwa!
Ipekanyini ukulwa, lelo mulavungolwa!
10 Pangini ivya kucita, lelo vitalaomba!
Landini vino mukulonda, lelo vitalaomba,
Pano Leza ali naswe!*
11 Vii ali vino Yeova wanenyile ale wataika ikasa lyakwe ilya maka pali nene pa kuncelula ukuti ntacita wakwe vino antu yaa yakacita, watiile:
12 “Mutalanda ukuti iyatupaangila pa mulandu sile wakuti avino antu yakulanda!
Mutatiina vino yakutiina;
Nupya mutaazakaza.
13 Yeova Leza wa maumba awino mufwile ukulalola ukuti uwa muzilo,
Awino mulinzile ukutiina,
Nupya aalinzile ukumulenga ukuzakaza.”
14 Alaya wa ncende ya muzilo,
Nupya alaya wi iwe lya kupumikako
Ni lya kulenga antu ukupona
Ku mang’anda yoili yakwe Izlaeli,
Nupya alaya wa citeyo
Ku yantu ya mu Yelusalemu.
15 Antu aingi yalapumika nu kupona alino nu kuvunika;
Yalaizana umu citeyo nupya yalalemwa.
16 Pomba ulupapulo ululembwe;
Pela masunde yaa ku yasambi yane sile!
17 Nakulaloleela Yeova uwafisa icinso cakwe uku ya mu ng’anda yakwe Yakobo, nupya nakulapaalila muli aliwe.
18 Lolini! Nemo na ana yane yano Yeova wampeela twaya wa vimanyililo nupya wa vizungusyo umu Izlaeli kufuma kuli Yeova wa maumba aakaikala pa Mwamba wa Zioni.
19 Nupya nga yamunena ukuti: “Uzyini kuli yano yakauvwana ni mipasi nanti aakasapoola ala yakulanda ivintu ivitale ukuvwa nupya ala yakutotooza,” uzye mulacita vivyo kwene? Antu yalinzile ukulenga uwazwilizyo kuli Leza, asi ukulengela antu apuma uwazwilizyo uku yafwe. 20 Lelo yalinzile ukulondelezya umu masunde nu mu lupapulo ululembwe!
Ndi cakuti yasikulanda ukulingana na mazwi yakwe Leza, ala yatakweti uluswepo. 21 Cila muntu alapita umu mpanga umuli amacuzi ni cipowe, nupya pa mulandu wakuti alaya ni nzala, nupya ale watasoka sana, alatiipwila umwene na Leza wakwe ala watalingamila umupela. 22 Lyene alalolekesya umu nsi nu kulola sile intazi na kanda, malanda na macuzi, masakamika ni mfinzi.