Ezekeli

33 Nupya kwene Yeova wanenyile ati: 2 “We mwana wa muntu, nena ana ya yantu yako uti,

“‘Tuti naleta ulupanga pa mpanga imwi nupya antu yonsi amu mpanga iyo yasoolola umuntu wakuti aye umulinzi wao, 3 nawe walola ulupanga lukwiza umu mpanga iyo nupya walizya ipenga nu kucelula antu. 4 Ndi cakuti umwi uuvwa ukulila kwi penga lelo wakana ukuvwila ukucelula nu lupanga lwiza nu kumukoma, uwazi wakwe ulaya pa mutwe wakwe. 5 Uvwile ukulila kwi penga, lelo atuvwilile ukucelula. Uwazi wakwe ulaya pali aliwe. Ndi cakuti auvwila ukucelula nga wapuswisye umi wakwe.

6 “‘Lelo ndi cakuti umulinzi walola ulupanga lukwiza nupya wakana ukulizya ipenga nu kucelula antu nu lupanga lwiza nu kukoma wenga pali aliyo, umuntu wiyo alafwila pa luyembu lwakwe, lelo uwazi wakwe ndaulonda ukufuma ku mulinzi.’

7 “Lelo wemo we mwana wa muntu, nakusonta ukuya umulinzi uku ya mu ng’anda yakwe Izlaeli; nga uvwa mazwi yane ulinzile ukuyacelula. 8 Nga nanena kacita wa viipe nati, ‘Ulafwa!’ lelo wakana ukulanda nawe pakuti umucelule ate ukucita iviipe vino akacita, alafwa pa mulandu wakuti akacita iviipe lelo uwazi wakwe ndaulonda kuli wewe. 9 Lelo nga wacelula kacita wa viipe kuti ate ukucita iviipe vino akacita, nawe wakana ukusenuka alafwila pa luyembu lwakwe, lelo wemo ulapusuka.

10 “We mwana wa muntu, nena amu ng’anda yakwe Izlaeli uti, ‘Mukalanda imuti: “Ucipondoka witu ni membu zitu vikatutitikizya, vikatumala maka; tungatwalilila uli ukuya nu umi?”’ 11 Uyanene uti, ‘“Yeova Umwene wa Papelapela walanda wati, ‘Nkulapa ukuti nsiuvwa ningo ndi cakuti umwipe wafwa, lelo nkauvwa ningo ndi cakuti wasenula imiyele yakwe nu kutwalilila ukuya nu umi. Senukini, tiini ukucita iviipe, pano i cani cino mungafwila mwe ya mu ng’anda yakwe Izlaeli?”’

12 “Nupya we mwana wa muntu, nena ana ya yantu yako uti, ‘Ulungami wa muntu mulungame utalamupususya nga wapondoka, nanti uyi wa muntu mwipe utalalenga ukuti aononwe nga wata ukucita iviipe; nupya umulungame ali wensi atalatwalilila ukuya nu umi pa mulandu nu ulungami wakwe pa wanda uno alayembuka. 13 Nga nanena umuntu mulungame nati: “Ulatwalilila ukuya nu umi,” nawe wataila ulungami wakwe nupya wacita iviipe, ivintu ivilungame vino wacita vitaliusiwa lelo alafwa pa mulandu ni viipe vino wacita.

14 “‘Nupya nga nanena kacita wa viipe nati: “Ulafwa,” nawe wasenuka nupya waya nu mulinganya nu ulungami, 15 nupya umwipe wii waswilizya vino wapokolwile na vino wivile, watandika nu kuvwila masunde aakapeela uumi kupitila umu kuta ukucita iviipe, alatwalilila ukuya nu umi atalafwa. 16 Atalapeelwa umulandu pa luyembu luli lonsi luno wacisile. Alatwalilila ukuya nu umi pa mulandu wa kuya nu mulinganya nu ulungami.’

17 “Lelo antu yako yakalanda iyati, ‘Yeova waya nu lufyengo muli vino akacita,’ lino aliyo kwene aaya nu lufyengo.

18 “Ndi cakuti umuntu mulungame wata ukucita ivilungame nupya watandika ukucita iviipe, alafwa. 19 Lelo ndi cakuti umuntu mwipe wata ukucita iviipe nupya waya nu mulinganya nu ulungami, alatwalilila ukuya nu umi pa mulandu nu kucita vivyo.

20 “Lelo mukalanda imuti, ‘Yeova waya nu lufyengo muli vino akacita.’ Mwe ya mu ng’anda yakwe Izlaeli, ndamupingula cila muntu kulingana na vino akacita.”

21 Lino papisile insita umu mwaka uwalenga 12, lino twasenzilwe umu uzya mu mwezi uwalenga 10, pa wanda uwalenga 5, muntu umwi uwapuusile ukufuma uku Yelusalemu wizile kuli nene nu kunena ati: “Musumba iononwa!”

22 Manguzi lino umonsi uwapuusile atatala wiza, ikasa lyakwe Yeova lizile pali nene, nupya wayuzile akanwa kane ala umonsi uwizile katondo atatala wiza. Fwandi kanwa kane kayuliike, nupya ntatwalilile ukuya ciulu.

23 Lyene Yeova wanenyile ati: 24 “We mwana wa muntu, antu aakaikala umu ncende zii izyononeka yakulanda ukulozya uku mpanga ya Izlaeli iyati, ‘Abulahamu wali sile wenga, lelo swemo sweswe ingi; mu cumi impanga yii yapeelwa kuli sweswe ukuya ica upyanyi.’

25 “Fwandi uyanene uti, ‘Yeova Umwene wa Papelapela walanda wati: “Mukulya ivyakulya umuli uwazi, nupya mwataila ivilubi vinu ivya winyi,* mukatwalilila nu kuzwisya uwazi. U mulandu ci uno mungapyanila impanga? 26 Mwataila muli ya panga inu, mukacita ivintu vya winyi, nupya cila muntu wakowezya umuci wa muze. Nga fwandi u mulandu ci uno mungapyanila impanga?”’

27 “Uyanene uti, ‘Yeova Umwene wa Papelapela walanda wati: “Nkulapa ukuti yayo aakaikala umu ncende izyononeke yalafwa uku lupanga; akaikala umu mpanga umutaya icili consi ndayapeela ukuya ivyakulya uku vinyama vya mu mpanga; na aakaikala umu ncende izicingililwe nu mu macele yalafwa uku ndwala. 28 Ndalenga impanga ukononeka sana nu kusyala umwaula icili consi, ni cilumba icaya umu mpanga iyo cilasila, nupya imyamba ya mu Izlaeli ilasyala umwaula icili consi kusi na aalapitamo. 29 Nupya yalamanya ukuti nene Yeova lino ndalenga impanga ukononeka sana nu kusyala umwaula icili consi pa mulandu ni vintu vya winyi vyonsi vino yacita.”’

30 “Lelo wemo we mwana wa muntu, antu yako yakulanzyanya pali wewe umu mbali ya viumba na pa milyango ya mang’anda. Yakulanzyanya cila muntu nu mwina wakwe iyati, ‘Iza leka tuvwe mazwi afumile kuli Yeova.’ 31 Yalakolongana nu kwikala pa nkoleelo yako wa yantu yane nupya yaluvwa mazwi yako, lelo yatalacita vino yaluvwa. Pano utunwa twao tukalanda ivisuma pali wewe, lelo umu myenzo yao mwaya ucenjezi. 32 Waya kuli aliyo wa lwimbo lwa citemwiko luno imba ni izwi lisuma nupya luno yalizya ningo ni vya kulizizyako inyimbo. Yaluvwa mazwi yako, lelo kusi aalacitapo icili consi. 33 Nupya lino vii vino nalanda vilacitika, yalamanya ukuti kasesema wali muli aliyo; pano umu cumi vilacitika.”