Milimo ya Atumwa
23 Lino Paulo walolekisye aali umu cilye ca Sanihedilini, walanzile ati: “Mwe inane, nemo naya na kampingu musanguluke kuli Leza ukufika na ndakai.” 2 Lino Ananiya simapepo mukalamba uvwile vivyo, wanenyile aimi umupiipi na Paulo ukuti yamume pa kanwa. 3 Lyene Paulo wamunenyile ati: “Leza amakuma we musomvi we.* Uzye watuwikala papo ukuti umpingule ukulingana na Masunde lino wewe kwene ukutama Masunde pa kunena antu ukuti yangume?” 4 Aimi umupiipi yamunenyile iyati: “Uzye ukutuka simapepo mukalamba wakwe Leza?” 5 Nupya Paulo walanzile ati: “Mwe inane, ntali manyile ukuti a simapepo mukalamba. Pano calembwa ukuti, ‘Utalinzile ukupontela ya kateeka ya yantu yako.’”
6 Lyene lino Paulo wamanyile ukuti yamwi yali Asaduki yauze nayo yali Afaliseo, wapunzile umu cilye ca Sanihedilini ati: “Inane, nene Mufaliseo, umwana wa Yafaliseo. Nkupingwilwa pa mulandu nu kupaalila mu kutuutululwa kwa yafwe.” 7 Vino walanzile vyalenzile Afaliseo yatandike ukupaazyanya na Asaduki, nupya icilye capaatukine. 8 Pano Asaduki yakati kutaya ukutuutuluka, kutaya ya malaika, kutaya ni viumbwa vya mupasi kwene, lelo Afaliseo yene yazumila ukuti vyonsi vii akuno vyaya. 9 Fwandi kwakatwike sana icongo, nupya ya kalemba yamwi amwi umba lya Yafaliseo yakatwike nu kutandika ukupaazya sana ala yakuti: “Tutazanyile iciipe icili consi umu muntu wii, lelo ndi cakuti iciumbwa ca mupasi nanti malaika walanzile kuli aliwe—.” 10 Lyene lino ukupaazyanya kwakomile, umukalamba wa yasilika watiinyile ukuti Paulo yamamusandola, nupya wanenyile asilika ukuti yakamusompole pali aliyo nu kumutwala ukwikalanga asilika.
11 Lelo pa wanda kwene uwa usiku, Umwene walolekile kuli Paulo nu kumunena ati: “Sipa! Pano wakwe vino watusimikila sana pali nene umu Yelusalemu avino ulinzile ukusimikila nu mu Loma kwene.”
12 Lino waciile, Ayuda yapangine nu kulapa umulapo wakuti yatakulya nanti ukumwa suka yakome Paulo. 13 Kwali aonsi ukucila pali 40 alafile umulapo uwo. 14 Aonsi yaa yaile kuli ya simapepo akalamba nu ku ntunguluzi zya Yayuda nu kulanda iyati: “Itulapa umulapo uwakuti tusikulya icili consi kufikila twakoma Paulo. 15 Fwandi mwemo pamwi na amu cilye ca Sanihedilini mulinzile ukunena umukalamba wa yasilika ukuti alete Paulo kuli mwemwe kwati mukulonda ukupituluka ningo mu mulandu wakwe. Nomba lino atali afike nu mupiipi, ale ituipekanya ukumukoma.”
16 Lelo umwipwa wakwe Paulo umulumendo uvwile ipange lyao, fwandi waile aingila umwikalanga asilika nu kumunena. 17 Lyene Paulo wamile musika wenga nu kumunena ati: “Senda umulumendo wii ku mukalamba wa yasilika, pano watakwata cimwi ica kumunena. 18 Nawe wasenzile umulumendo nu kumutwala uku mukalamba wa yasilika amunena ati: “Umufungwa Paulo wali wangama nu kunena ukuti ndete umulumendo wii kuli wewe pano watakwata cimwi ica kukunena.” 19 Mukalamba wa yasilika walemile umulumendo api kasa amutwala pa mbali alino amuzya ati: “I cani cino ukulonda ukunena?” 20 Nawe waswike ati: “Ayuda iyazumilizyanya ukuti yakulenge pakuti uce utwale Paulo uku cilye ca Sanihedilini mutondo, yakasi yacite kwati yakulonda ukuyauvwilapo na vyuze pa mulandu wakwe. 21 Lelo utaleka kuti yakutonsye, pano aonsi ukucila pali 40 yakuloleela ukuzanza Paulo, nupya iyalapa umulapo wakuti yasikulya nanti ukumwa mpaka yamukome; iyaiteyanya, yakulolela sile uyazumilizye.” 22 Lyene umukalamba wa yasilika walesile umulumendo apita pa cisila ca kumukonkomezya ukuti: “Utanena ali wensi ukuti watunena.”
23 Lyene wamile ya musika yaili nu kuyanena ati: “Pekanyini asilika 200 akuya uku Kesaliya, mwikepo na aonsi aapa mfwalasi 70 alino na aamasumo 200, yapite pa 21:00.* 24 Nupya mupekanye ni mfwalasi apa kukwela Paulo, pakuti acingililwe pa kumutwala kuli Felikisi kateeka.” 25 Nupya walemvile kalata ati:
26 “Nene Klaudi Lisyasi, nakulembela we Musambazi, Kateeka Felikisi: Nakulamuka! 27 Ayuda yalemile umuntu wii nupya yali apiipi nu kumukoma, lelo naileko zuwa pamwi na asilika yane nu kumupususya, pano nizile imanya ukuti u mwina Loma. 28 Nupya vino nalondanga ukumanya umulandu uno yamupeelanga, namutwazile umu cilye cao ica Sanihedilini. 29 Nazanyile ukuti yamupeelanga umulandu pa vintu ivyakumile Masunde yao, lelo atazanyilwe nu mulandu wa kufwilapo nanti uwa kunyepelwapo umu cifungo. 30 Lelo vino inuvwa mapange yano yakweti pali aliwe, nkumutuma kuli wewe nupya namanena aakumupeela umulandu ukuti iize yamusinile pa manso yako.”
31 Lyene asilika yasenzile Paulo ukulingana na vino yanenyilwe nu kumutwala usiku ku Antipatili. 32 Pa wanda uwalondelilepo yazumilizye aonsi aali pa mfwalasi ukupita nawe, lelo yene yaswilile ukwikalanga asilika. 33 Aonsi aakwezile pa mfwalasi ingiile umu Kesaliya nupya yatwazile kalata kuli kateeka nu kufisya Paulo kuli aliwe. 34 Fwandi wabelenzile kalata nu kuzya icitungu kuno Paulo wafumile nupya wazanyile ukuti wafumile uku Kilikiya. 35 Kateeka walanzile ati, “Nduvwikisya umulandu wako lino aakukupeela umulandu yaliza.” Nupya walanzile ukuti yamusungile umwi sano lyakwe Helodi.