Ezekeli

18 Nupya kwene Yeova wanenyile ati: 2 “Uzye ipinda ilikauvwika umu Izlaeli ilyakuti, ‘Ivikolwe ivilya imyangazi ikantuke lelo amino ya yana aakuvwa uwizila,’ likapiliula cani?

3 “Yeova Umwene wa Papelapela walanda wati, ‘Nkulapa ukuti mutalatwalilila ukuomvya ipinda lii umu Izlaeli. 4 Antu yonsi aane, isi nu mwana aakwane. Umuntu uwayembuka aalafwa.

5 “‘Ndi cakuti umuntu umulungami, akalondela masunde nupya waya nu mulinganya, 6 asilya malambo aapeelwa uku vilubi pa myamba, asitaila ivilubi vya winyi* ivyaya umu ng’anda yakwe Izlaeli; asikowezya umuci wa muze nanti ukulaala nu mwanaci aali uku mwezi; 7 asicuzya ali wensi, lelo akaswilizya cino walemiile uwa nkongole; asiiyila ali wensi, lelo akapeela ali ni nzala ivyakulya nu kuzwika aali tupu; 8 asipokelapo na vyuze pali vino wakongwesya nanti ukukwatilapo umuzano, nupya ataaya nu lufyengo; akaya nu mulinganya pa kupingula antu; 9 nupya akalondela masunde yane nu upinguzi wane pakuti aye ni cisinka, muntu wiyo u mulungami nupya alatwalilila ukuya nu umi,’ avino Yeova Umwene wa Papelapela walanda.

10 “‘Lelo ndi cakuti umuntu wiyo wakwata umwana umupuupu nanti inkomi nanti aakacita icili consi pa vintu vii 11 (nanti cakuti isi ataacisile icili consi pali vii) akalya malambo aapeelwa uku vilubi pa myamba, ukukowezya umuci wa muze, 12 akacuzya aalanda na apiina, ukwiya ivintu, nu kukanaswilizya vino walemiile aankongole, akataila umu vilubi vya winyi, ukucita ivintu vya winyi, 13 akapokelapo na vyuze kuli wino wakongwesya nu kukwatilapo umuzano, lyene umwana wiyo atalatwalilila ukuya nu umi. Alakomwa pa mulandu ni vintu vya winyi vyonsi vino wacita. Uwazi wakwe ulaya pali aliwe.

14 “‘Lelo ndi cakuti isi wakwata umwana aakalola imembu zyonsi zino isi akacita, lelo wene aasicitako imembu zizyo, 15 asilya malambo aapeelwa uku vilubi pa myamba; asitaila ivilubi vya winyi ivya ya mu ng’anda yakwe Izlaeli, asikowezya umuci uwa muze; 16 asicuzya ali wensi; asisungilila cino walemiile uwa nkongole; asiiyila ali wensi; lelo akapeela ali ni nzala ivyakulya nu kuzwika aali tupu; 17 asicuzya apiina; asikongwesya kaloba nanti ukupokelapo na vyuze kuli wino wakongwesya; nupya akalondela upinguzi wane na masunde yane, umuntu wiyo atalafwila pa membu zyakwe isi. Alatwalilila ukuya nu umi. 18 Lelo isi wene pa mulandu wakuti wali nu ucenjezi, wiyilanga umwinakwe, nupya wacitanga iviipe umu yantu yakwe, alafwila pa membu zyakwe.

19 “‘Lelo muluzya muti: “U mulandu ci uno umwana atakwatile umulandu pa membu zyakwe isi?” Pa mulandu wakuti umwana waya nu mulinganya nu ulungami, akasunga masunde yane yonsi nu kuyalondela alatwalilila ukuya nu umi. 20 Umuntu aakayembuka aalafwa. Umwana atalaya nu mulandu pa mulandu ni membu zyakwe isi, na isi atalaya nu mulandu pa mulandu ni membu zya mwana. Umulungame alapingulwa ukulingana nu ulungami wakwe, nu mwipe alapingulwa pa viipe vino akacita.

21 “‘Ndi cakuti umuntu umwipe wata ukucita imembu zyonsi zino akacita nu kutandika ukulondela masunde yane nu kuya nu mulinganya nu ulungami, alatwalilila ukuya nu umi. Atalafwa. 22 Viipe vyonsi vino wacita vitaliusiwa. Alatwalilila ukuya nu umi pa mulandu nu kucita ivilungame.’

23 “Yeova Umwene wa Papelapela walanda wati, ‘Uzye nkasansamuka ndi cakuti umwipe wafwa? Uzye nsilonda ukuti ate ukucita vino akacita nu kutwalilila ukuya nu umi?’

24 “‘Lelo ndi cakuti umuntu mulungame wata ukucita ivilungame nu kutandika ukucita iviipe, kuli kuti ivya winyi vyonsi vino aipe yakacita, uzye alatwalilila ukuya nu umi? Vilungame vyonsi vino wacita vitaliusiwa. Alafwa pa mulandu wa kukanaya ni cisinka na pa membu zino wacita.

25 “‘Lelo mulalanda muti: “Yeova waya nu lufyengo muli vino akacita.” Nomba kutikini kuno mwe ya mu ng’anda yakwe Izlaeli! Uzye anene naya nu lufyengo? Uzye asi mwemwe mwaya nu lufyengo?

26 “‘Ndi cakuti umuntu mulungame wata ukucita ivilungame nu kutandika ukucita iviipe nupya wafwa, ale wafwila pa mulandu nu kucita iviipe.

27 “‘Ndi cakuti umuntu umwipe wata ukucita iviipe nu kutandika ukuya nu mulinganya nu kucita ivilungame, alapusuka. 28 Ndi cakuti walola iviipe vyonsi vino wacitanga nu kuta ukuvicita alapusuka. Atalafwa.

29 “‘Lelo amu ng’anda yakwe Izlaeli yalalanda yati: “Yeova waya nu lufyengo muli vino akacita.” Mwe ya mu ng’anda yakwe Izlaeli! Uzye anene naya nu lufyengo? Uzye asi mwemwe mwaya nu lufyengo?’

30 “‘Fwandi ndapingula umuntu wensi muli mwemwe mwe ya mu ng’anda yakwe Izlaeli ukulingana na vino akacita,’ avino Yeova Umwene wa Papelapela walanda. ‘Senukini, ee senukini nu kuta ukucita iviipe vyonsi vino mukacita pakuti vitamulenga ukuya nu mulandu nu kuleka ukuti mufululwe. 31 Tiini ukucita iviipe vyonsi vino mukacita, nupya senulini imyenzo inu na melenganyo inu pakuti mutafwa mwe ya mu ng’anda yakwe Izlaeli.’

32 “‘Nsisansamuka ndi cakuti umuntu ali wensi wafwa,’ avino Yeova Umwene wa Papelapela walanda. ‘Fwandi senukini pakuti muye nu umi.’”