Yoswa

24 Lyene Yoswa wakolonganike imitundu yonsi iya Ina Izlaeli ku Syekemu nupya wamile akalamba ya Ina Izlaeli, ya kapingula kumwi ni ntunguluzi zyao, nayo iimilile pa nkoleelo yakwe Leza wa cumi. 2 Yoswa wanenyile antu yonsi ati: “Yeova Leza wa Ina Izlaeli watalanda ati, ‘Vikolwe vinu vyatenzi uku lusansa luze ulwa Luzi* kuli kuti Tela isi wakwe Abulahamu, nupya isi wakwe Nawoli nupya yaombelanga ya leza yauze.

3 “‘Mukuya kwa nsita nasenzile Abulahamu icikolwe cinu ukufuma uku lusansa luze ulwa Luzi* nu kuleka ukuti apite umu mpanga yonsi iya Kenani, nupya navuzizye ana yakwe, namupeezile Isaki; 4 lyene Isaki namupeezile Yakobo na Esau. Pa cisila Esau namupeezile Umwamba wa Seili; nupya Yakobo na ana yakwe yaile uku Ijipti. 5 Pa cisila natumile Mose na Aloni nupya naleesile ivinkunka umu Ijipti pakuti mufumyemo. 6 Lino nafumyanga ivikolwe vinu umu Ijipti nupya lino mwafisile kuli yemba, Aina Ijipti yakonsile ivikolwe vinu na maceleta ya nkondo na onsi aakwezile pa mfwalasi kufika na kuli Yemba Muyenzu. 7 Vikolwe vinu vyatandike ukulilila kuli nene ne Yeova, fwandi nalenzile ukuti kuye imfinzi pakasi kinu na Ina Ijipti, nupya nayaponyizye umu manzi pakuti yamwele, nupya mwailolile mweineco vino nacisile umu Ijipti. Lyene mwikazile umu lwanga pa myaka iingi.

8 “‘Nupya namutwazile uku mpanga iya Ina Amoli aikalanga uku lusansa luze* ulwa Luzi Lwa Yodani, nayo yamulwisizye. Lelo nayapeezile umu minwe inu pakuti mupoke impanga yao, nupya nayalovizye. 9 Lyene Balaki mwana Zipoli umwene wa ku Moabu wakatwike nu kulwisya Aina Izlaeli. Fwandi wamile Balamu mwana Beoli pakuti amutiipe. 10 Lelo ntuvwile kuli Balamu. Fwandi wamupaazile pa miku iingi, nupya namupuswisye umu minwe yakwe.

11 “‘Lyene mwalamvile Uluzi Lwa Yodani nu kuyafika uku Yeliko. Nupya intunguluzi* zya mu Yeliko, Aina Amoli, Aina Pelizi, Aina Kenani, Aina Hiti, Aina Giligasi, Aina Hivi, na Ina Yebusi yamulwisizye, lelo nayapeezile umu minwe inu. 12 Fwandi nalenzile ukuti ya mwene yaili aa Ina Amoli yaye ni ntete nupya yutwike ukufuma kuli mwemwe. Mutayacimvizye pa mulandu nu lupanga lwinu nu ulapwa winu. 13 Namupeezile impanga ino mutaaculile ni misumba ino mutaakuuzile nupya mwikazilemo. Mukulya ukufuma umu vyalo vya mwangazi ni vyalo vya miolivi vino mutaalimile.’

14 “Fwandi mwatiina Yeova, mwamuombela na ucisinka nu kuya akaele, nupya fumyini ya leza yano ivikolwe vinu vyaombelanga uku lusansa luze ulwa Luzi* nu mu Ijipti nupya mwaombela Yeova. 15 Nga musikulonda ukuombelanga Yeova, soololini ilelo wino mumaombelanga, ndi cakuti mumaombelanga ya leza yano ivikolwe vinu vyaombelanga uku lusansa luze ulwa Luzi* nanti ya leza ya Ina Amoli aeneco ya mpanga ino mukaikalamo. Lelo nemo na amu ng’anda yane, twakulaombela Yeova.”

16 Lino antu yuvwile vivyo yalanzile iyati: “Tutanga tusye Yeova nu kutandika ukuombela ya leza yauze. 17 Yeova Leza witu u watufumizye ni vikolwe vitu umu mpanga ya Ijipti, muno twali azya nupya u wacisile ivizungusyo ivikalamba ala tukulola nako, watucingilile umu lwendo lonsi nu ku yantu yonsi yano twapisilemo. 18 Yeova wazinzile antu yonsi kumwi na Ina Amoli aatandikilepo ukwikala umu mpanga yii. Fwandi naswe kwene tumaombelanga Yeova pano ali Leza witu.”

19 Lyene Yoswa wanenyile antu ati: “Mutanga muombele Yeova pano a Leza wa muzilo; a Leza aakalonda ukupepwa sile wenga. Atalelela ucipondoka winu ni membu zinu. 20 Ndi cakuti mwapondokela Yeova nu kutandika ukuombela ya leza yauze, nawe kwene alamukana nu kumonona pa cisila cakuti wamucitila ivisuma.”

21 Lelo antu yanenyile Yoswa iyati: “Awe, twakulaombela Yeova!” 22 Fwandi Yoswa wanenyile antu ati: “Mwemwe ya kambone mweineco pali vino imulanda, imusoololapo ukulaombela Yeova.” Lino yuvwile vivyo yatiile: “Ee sweswe ya kambone.”

23 Yoswa nawe wayanenyile ati: “Fwandi fumyini ya leza ya ufi muli mwemwe, nupya mwaombela Yeova Leza wa Ina Izlaeli ni myenzo inu yonsi.” 24 Antu yanenyile Yoswa iyati: “Twakulaombela Yeova Leza witu nupya twakulamuvwila!”

25 Fwandi Yoswa wapangine upangano na antu pa wanda kwene uwa nupya wayapeezile isunde uku Syekemu. 26 Lyene Yoswa walemvile mazwi yaa umwi buku lyakwe Leza ilya Masunde nupya watozile iciliwe icikalamba nu kucimika umwisika lya cimuti cikulu icaya umupiipi ni ncende ya muzilo yakwe Yeova.

27 Yoswa watwalilile ukunena antu yonsi ati: “Lolini! Ciliwe cii ali cikambone pali sweswe, pano icuvwa vyonsi vino Yeova watatunena, nupya cilaya ali cikambone pali mwemwe pakuti mutaca mukane Leza winu.” 28 Lyene Yoswa walesile ukuti antu yapita, cila muntu waile ukwakwe.

29 Pa cisila ca vintu vii, Yoswa mwana Nuni umuomvi wakwe Yeova wafwile ala ali ni myaka 110. 30 Fwandi yamuzisile umu Timunati-sela, umu mpanga yakwe iyayela umu ncende ya myamba yakwe Efulemu ku katutu ka Mwamba wa Gaasyi. 31 Aina Izlaeli yatwalilile ukuombela Yeova manda yonsi yano Yoswa wali nu umi alino na manda yonsi yano akalamba ya Ina Izlaeli aatwalilile ukuyako na pa cisila ca mfwa yakwe Yoswa nupya aamanyile vyonsi vino Yeova wacitiile Aina Izlaeli yaali nu umi.

32 Mafupa yakwe Jozefu yano Aina Izlaeli yasenzile ukufuma umu Ijipti yazisilwe umu Syekemu mu ncende ino Yakobo wakazile kuli ya mwana Hamoli, kuli kuti isi wakwe Syekemu, pa mpiya 100 zyakwe siuva nupya izile iya impanga yakwe ya mwana Jozefu.

33 Elieza mwana Aloni nawe kwene wafwile. Fwandi yamuzisile pa Mwamba wakwe Finiasi umwanakwe, uno wapeezilwe mu ncende ya myamba yakwe Efulemu.