1 Yamwene
21 Pa cisila ca vintu vii, kwali cimwi icacitike ukulozya uku calo ca myangazi cakwe Naboti Umwina Yezileele; icalo cii cali umu Yezileele umupiipi ni sano lyakwe Ahabu umwene wa ku Samaliya. 2 Ahabu wanenyile Naboti ati: “Mpeele icalo cako ica myangazi pakuti nalimamo umusalu. Nani ndakupeela icalo cuze ica myangazi icisuma. Nanti nga ukulonda, ndakulipila ulupiya.” 3 Lelo Naboti wanenyile Ahabu ati: “Citanga ciye ningo ukukupeela ica upyanyi ca vikolwe vyane, pano Yeova walesya ukucita vivyo.” 4 Fwandi Ahabu wawezile nu kwingila umu ng’anda yakwe ala watasoka nupya ali nu ulanda pa mulandu na vino Naboti Umwina Yezileele wamunenyile ati: “Ntalakupeela ica upyanyi ca vikolwe vyane.” Lyene waizi pa bedi ala watalozya icinso uku lung’umba, nupya wakanyile ukulya.
5 Yezebele mamakwe wingile nu kumuzya ati: “I cani cino watusoka icalenga ukane nu kulya?” 6 Nawe wamwaswike ati: “Inanena Naboti Umwina Yezileele nati, ‘Nkazye icalo cako ica myangazi nanti ndi cakuti ukulonda leka nkupeele icalo cuze ica myangazi.’ Lelo ali wanena wati, ‘Ntanga nkupeele icalo cane ica myangazi.’” 7 Yezebele nawe wamuneyile ati: “Uzye asi wewe umwene umu Izlaeli monsi? Katuka ulye ivyakulya nu kusansamuka. Ndakupeela icalo ca myangazi cakwe Naboti Umwina Yezileele.” 8 Lyene walemvile amakalata umwi zina lyakwe Ahabu asaina napo umwi zina lya mwene nupya wayatumile uku yakalamba na kuli ya cilolo ya mu musumba uno Naboti wikalangamo. 9 Muli ya kalata walemvile ati: “Muleke kuye ukufunga, nupya Naboti aikale pa nkoleelo ya yantu. 10 Nupya muleke aonsi yaili iviwelewele ikale pa nkoleelo yakwe pakuti yamusinile ukuti, ‘Watuutuka Leza nu mwene.’ Lyene mumufumizye ukunzi ya musumba nu kumutama na mawe mpaka afwe.”
11 Fwandi aonsi na akalamba alino na ya cilolo aikalanga umu musumba uno Naboti wikalangamo yacisile vyonsi ivyali umu makalata yano Yezebele wayatumiile. 12 Yalesile antu ukufunga nu kuleka Naboti aikale pa nkoleelo ya yantu. 13 Lyene aonsi yaili iviwelewele izile nu kwikala pa nkoleelo yakwe iyatandika ukumusinila pa nkoleelo ya yantu iyati: “Naboti wataatuka Leza nu mwene.” Pa cisila yamufumizizye ukunzi ya musumba nu kumutama amawe mpaka afwa. 14 Lyene yatumile amazwi kuli Yezebele iyati: “Naboti watatamwa na mawe nupya watafwa.”
15 Lino Yezebele uvwile sile ukuti Naboti watafwa, wanenyile Ahabu ati: “Icalo cino Naboti Umwina Yezileele wakanyile ukukukazya i cako lyene, pano Naboti watafwa.” 16 Lino Ahabu uvwile sile ukuti Naboti watafwa, wakatwike aya uku calo ca myangazi cakwe Naboti Umwina Yezileele kuti acitole ciye icakwe.
17 Nomba Yeova wanenyile Eliya Umwina Tisyibe ati: 18 “Katuka, kakomenkanye Ahabu umwene wa mu Izlaeli aali umu Samaliya. Ali umu calo ca myangazi cakwe Naboti pakuti acitole ciye icakwe. 19 Umunene uti, ‘Vii avino Yeova walanda, wati: “Watukoma umuntu nupya watola ni calo cakwe.”’ Lyene umunene nu kuti, ‘Vii avino Yeova walanda, wati: “Pa ncende ino ya simbwa iyamyantila uwazi wakwe Naboti, ali pano yalamyantila nu wazi wako.”’”
20 Ahabu wanenyile Eliya ati: “Wanzana we mulwani wane!” Nawe wamuneyile ati: “Ee nakuzana. ‘Pa mulandu wakuti ukulondesya ukucita iviipe kuli Yeova, 21 nkuleta uyi pali wewe, nupya ndalovya aonsi yonsi amu lupwa lwako, ukwikako na atakwata akuyazwa na atonte amu Izlaeli. 22 Nupya ndacita uku ya mu lupwa lwako wakwe vino nacisile uku ya mu lupwa lwakwe Yeloboamu mwana Nebati nu ku ya mu lupwa lwakwe Baasya mwana Ahiya, pano watunsosya nu kulenga Aina Izlaeli ukuyembuka.’ 23 Nupya pali Yezebele, Yeova watalanda ati: ‘Ya simbwa yalalya Yezebele umu mpanga ya Yezileele. 24 Umuntu wakwe Ahabu wensi aalafwila umu musumba ya simbwa yalamulya, na wensi aalafwila umu mpanga ivyunyi vya mwi yulu vilamulya. 25 Kutaatala kwaya uwaya wakwe Ahabu, uwacitanga sana iviipe kuli Yeova, nupya Yezebele mamakwe u wamutungililanga. 26 Wacitanga ivya winyi ukupitila umu kupepa ivilubi vya winyi,* wakwe vino Aina Amoli yonsi yano Yeova wazinzile pa nkoleelo ya Ina Izlaeli yacitanga.’”
27 Lino Ahabu uvwile sile amazwi yayo, walepwile ivyakuzwala vyakwe nu kuzwala icakuzwala ca kulangilamo ulanda; watiile ukulya pa nsita imwi, walaalanga ni cakuzwala ca kulangilamo ulanda nupya wapitanga ala ali nu ulanda. 28 Lyene Yeova wanenyile Eliya Umwina Tisyibe ati: 29 “Uzye watulola vino Ahabu waicefya pa mulandu na vino indanda pali aliwe? Pa mulandu wakuti wataicefya, ntalaleta uyi lino acili nu umi. Ndaleta uyi umu manda ya mwanakwe.”