1 Yamwene
20 Lyene Umwene Beni-hadadi uwa ku Silya wakolonganike asilika yakwe yonsi pamwi na ya mwene yauze 32, ni mfwalasi na maceleta yao; nupya waile azinguluka umusumba wa Samaliya nu kuuzanza. 2 Nupya watumile inkombe uku Mwene Ahabu uwa mu Izlaeli ati: “Vii avino Beni-hadadi walanda, wati, 3 ‘Siuva wako na goldi i vyane, kumwi na aci yako akaloleka ningo na ana yako aonsi.’” 4 Lyene umwene wa mu Izlaeli waswike ati: “Pali sile ningo musambazi wane, nene muntu wako pamwi na vyonsi vino nakwata.”
5 Pa cisila inkombe zyaswilile nu kuyalanda iziti: “Beni-hadadi walanda wati, ‘Nakunenyile inti: “Ulampeela siuva wako na goldi na aci yako kumwi na ana yako aonsi.” 6 Lelo mutondo umu nsita ikwene, ndatuma aomvi yane kuli wewe nayo yaliza yaceecete ningo umu ng’anda yako nu mu mang’anda ya yaomvi yako, nupya yalasenda ivintu vyonsi vino watemwa.’”
7 Lyene umwene wa mu Izlaeli wamile akalamba yonsi amu mpanga iiya nu kuyanena ati: “Mwalola, umuntu wii akulonda ukuleta intazi pali sweswe, pano walanzile ukuti akulonda ya mama yane, ana yane aonsi, siuva na goldi, nupya ntaamukanyizye.” 8 Lyene akalamba ya mu mpanga iiya na antu yonsi yalanzile iyati: “Utamuvwila, nupya utacita vino akulonda.” 9 Lyene wanenyile inkombe zyakwe Beni-hadadi ati: “Kanenini umusambazi wane muti, ‘Vyonsi vino walondanga pa kutandika ndavicita, lelo cii cene foo.’” Fwandi inkombe zyapisile nu kuyanena umwene amazwi yaa.
10 Lyene Beni-hadadi watumile amazwi yakuti: “Ndonona impanga ya Samaliya, nupya asilika yane aaingi sana icakuti mutalasyala ulukungu lwakuti cila musilika angafumbata, si ya leza yace yamfulule sana nga ntacisile vivyo.” 11 Umwene wa ku Izlaeli waswike ati: “Kamunenini muti, ‘Utalinzile ukuya ni cilumba kwati watucimvya, lino inkondo itatala yatandika.’” 12 Lino Beni-hadadi uvwile sile amazwi yaa, ala wene na ya mwene yali umu matenti yakumwa, wanenyile aomvi yakwe ati: “Ipekanyini ukulwisya umusumba.” Nayo yaipekinye.
13 Lelo kasesema waile uku mwene Ahabu uwa mu Izlaeli nu kumunena ati: “Yeova walanda wati, ‘Uzye watulola iumba lii lyonsi ilikalamba? Ilelo nimalipeela kuli wewe, lyene alino umamanya ukuti nene Yeova.’” 14 Ahabu uzizye ati: “Aaweni yano alaomvya?” nawe wamwaswike ati: “Yeova watalanda ati, ‘Alaomvya aomvi yakwe ya cilolo ya mu vitungu.’” Lyene uzizye ati: “A weni alatandikilapo ukulwa?” nawe wamwaswike ati: “A wewe.”
15 Lyene Ahabu wapenzile aomvi yakwe ya cilolo ya mu vitungu, nayo yaali 232; pa cisila, wapenzile asilika Aina Izlaeli yonsi, nayo yaali 7,000. 16 Yapisile umu nsita ya kasanya, ala Beni-hadadi na ya mwene yauze 32 amwazwilizyanga yakumwa umu matenti pakuti yakoleke. 17 Lino aomvi yakwe ya cilolo ya mu vitungu yafumile, lilyo kwene sile Beni-hadadi watumile aakuyalola ivyacitikanga. Nayo izile iyamunena iyati: “Kuli aonsi atiyafuma uku Samaliya.” 18 Nawe wayanenyile ati: “Ndi cakuti iiza umu mutende, muyalete apuma; nupya nanti cakuti iiza uku ulwi, nalyo kwene muyalete apuma.” 19 Lelo lino aomvi yakwe ya cilolo ya mu vitungu na asilika ayakonsile yafumile umu musumba, 20 yakomile alwani yao. Lyene Aina Silya yutwike nupya Aina Izlaeli yayakonsile, lelo Umwene Beni-hadadi uwa ku Silya utwike pamwi na aonsi yamwi ala yakwezile pa mfwalasi. 21 Lelo umwene wa mu Izlaeli wafumile akukoma akwezile pa mfwalasi na pa maceleta, nupya wakomozile sana Aina Silya.
22 Pa cisila, kasesema waile uku mwene wa mu Izlaeli nu kumunena ati: “Pitanga, ukomye asilika yako nu kwelenganya pali vino ulacita, pano uku kutandika kwa mwaka ukwiza, umwene wa ku Silya aliza umu ku kuzanza.”
23 Lyene aomvi ya mwene wa ku Silya yamunenyile iyati: “Leza wao akaikala umu myamba. Acino yatucimvizye. Ndi cakuti twayalwisizya apa ncende itambalale, tulayacimvya. 24 Nupya ucite vii: Usonte intunguluzi azino zyatungulula asilika umu cifulo cakwe ya mwene. 25 Lyene ukolonganike asilika impendwa ili imwi na yano yaafwile, nupya yalinzile ukukwata imfwalasi na maceleta ivilingine na vino aafwile yakweti. Uleke tuyazanzile apa ncende itambalale nupya tumayacimvya.” Nawe uvwile vino yalanzile nu kucita vivyo kwene.
26 Uku kutandika kwa mwaka, Beni-hadadi wakolonganike Aina Silya nu kuya uku Afeki umu kulwisya Aina Izlaeli. 27 Aina Izlaeli nayo kwene yakolongine nu kuipekanya, nupya yaile umu kuyakomenkanya. Lino Aina Izlaeli yapanzile inkambi umupiipi nayo, yali wa tumaumba twiili utwa mbuzi, lelo Aina Silya yene yakumiine impanga yonsi. 28 Lyene umuntu wakwe Leza wa cumi waile uku mwene wa mu Izlaeli aya amunena ati: “Yeova watalanda ati, ‘Pa mulandu wakuti Aina Silya iyalanda iyati: “Yeova a Leza akaikala umu myamba, asiikala umu mpanga itambalale,” ndapeela iumba lii lyonsi ilikalamba kuli wewe, nupya mulamanya ukuti nene Yeova.’”
29 Yapanzile inkambi izyalozyanyizye, nupya pa wanda uwalenga 7 yatandike ukulwa. Aina Izlaeli yakomile asilika Aina Silya 100,000 apitanga ulwa pansi umu wanda sile onga. 30 Nupya asyala yutukile umu musumba wa Afeki. Lelo iciumba caponiile aonsi 27,000 asyazile. Na Beni-hadadi kwene utukiile umu musumba, nupya waile afisama umu muputule wa mukasi.
31 Lyene aomvi yakwe yamunenyile iyati: “Tuvwa ukuti ya mwene ya mu Izlaeli yakwata uluse. Fwandi twapaapata, leka tunyepe umu misana itu ivyakuzwala vya kulangilamo ulanda nupya tunyepe intambo uku mitwe itu, nu kuya uku mwene wa mu Izlaeli. Limwi angakuleka uye nu umi.” 32 Lyene yazwite ivyakuzwala vya kulangilamo ulanda nu kunyepa intambo uku mitwe, nupya yaile uku mwene wa ku Izlaeli iyati: “Beni-hadadi umuomvi wako watalanda ati, ‘Napaapata, leka inje nu umi.’” Nawe waswike ati: “Uzye acili nu umi? U mwina wane.” 33 Aonsi yaweni ukuti ivintu vyali ningo nu kuti umwene wali nu kucita ukulingana na vino walanzile, fwandi yalanzile iyati: “Beni-hadadi u mwina wako.” Lyene wayanenyile ati: “Kamuletini.” Fwandi Beni-hadadi waile kuli aliwe nupya wamukwezizye umwi celeta.
34 Lyene Beni-hadadi wamunenyile ati: “Nimawezya imisumba ino tata waposile kuli tata wako, nupya ungasoolola incende izyakuti wakazizyapo umu Damasika wakwe vino tata wacisile umu Samaliya.”
Ahabu watiile: “Pa mulandu nu upangano uu, nimakuleka upite.”
Yapangiine nupya wamulesile ukuti apita.
35 Yeova wanenyile umwi pali ya kasesema ukunena umuze ati: “Napaapata, ngume.” Nomba umuntu wiyo wakanyile ukumuma. 36 Fwandi wamunenyile ati: “Pa mulandu wakuti utuvwilile Yeova, nga wafuma sile pano, cisama amakukoma.” Lino wapisile sile, cisama wamulemile nu kumukoma.
37 Wazanyile na muze nu kumunena ati: “Napaapata, ngume.” Nawe wamumile nu kumucisa.
38 Lyene kasesema waile aimilila umu mbali ya museo atandika ukuloleela umwene, nupya waivimvile icisalu pa manso pakuti atamanyikwa. 39 Lino umwene wapitanga, wamupundiliile ati: “Ne muomvi wako nali ndi umu ulwi uwipisye, lyene ikuli umonsi umwi uwali waleta umuntu umwi kuli nene nu kunena ati, ‘Sunga umuntu wii. Ndi cakuti wapuuka wewe umafwilamo, nga cisi vivyo ulalipila italanti* lyakwe siuva.’ 40 Nupya lino ne muomvi wako inapamviwa uku vintu vyuze, umonsi wiyo ali wapuuka.” Lyene umwene wa mu Izlaeli wamunenyile ati: “Watuipingula wemwineco; vivyo kwene i vilakucitikila.” 41 Lyene zuwa zuwa wasisizye icisalu cino wavimvile pa manso, nupya umwene wa mu Izlaeli wizile amumanya ukuti wali a kasesema. 42 Kasesema nawe wanenyile umwene ati: “Yeova watalanda ati, ‘Pa mulandu wakuti watuleka umuntu wino nalanzile ukuti alinzile ukukomwa ukuutuka ukufuma kuli wewe, mu cifulo cakuti aliwe akomwe wewe ulafwa, nupya umu cifulo cakuti antu yakwe yakomwe antu yako aalakomwa.’” 43 Lyene umwene wa mu Izlaeli waswilile ukwakwe uku Samaliya ala watasoka nupya ali nu ulanda.