2 Milandu
32 Pa cisila icakuti Hezekiya wacita ivintu vii na ucisinka, Umwene Senakelibu uwa ku Asilya waile umu kulwisya impanga ya Yuda. Wazingulwike imisumba ya malinga pakuti aingile umu misumba iiyo nu kuipoka.
2 Lino Umwene Hezekiya waweni ukuti Senakelibu akulonda ukulwisya umusumba wa Yelusalemu, 3 walanzyanyizye na ya cilolo yakwe na asilika yakwe, nayo yamutungilile lyene wayazile imifolo iyatwalanga manzi ukunzi ya musumba. 4 Antu aingi yakolongine nu kuyala imifolo yonsi ni nguzi izyapitanga umu mpanga iiya, pano yalanzile iyati: “Tusikulonda ya mwene ya ku Asilya yace yazane manzi aingi lino yaliza.”
5 Watwalilile ukuombesya nu kukuula cipya cipya ilinga muno lyononike nu kulitalimfya nupya wakuuzile ilinga na lyuze ukunzi ya musumba. Wazifizye ni ncende iya Milo* iyaali umu Musumba Wakwe Devedi, nupya wapanzile ivyanzo ivingi ni visyangu. 6 Lyene wasonsile akalamba ya yasilika aakuti yaangalila antu nupya wayatwazile pa mpongolo ya musumba apazanwanga antu aingi, ayakomelezya nu kuti: 7 “Sipini nupya muye akome, mutuvwa intete nanti ukutiina umwene uwa ku Asilya na antu aingi yano ali nayo, pano aali uku lusansa lwitu aingi ukucila aali kuli aliwe. 8 Wene ali sile ni umba lya yantu, lelo swemo tuli na Yeova Leza witu uwa kutwazwa nu kutulwilako.” Antu yakomeleziwe na mazwi yano Hezekiya Umwene wa ku Yuda walanzile.
9 Pa cisila cakwe vii, ala Umwene Senakelibu uwa ku Asilya ali uku Lakisyi pamwi na asilika yakwe yonsi aamaka, watumile aomvi yakwe uku Yelusalemu uku Mwene Hezekiya uwa ku Yuda nu ku yantu amu mpanga ya Yudeya yonsi aali umu Yelusalemu, ati:
10 “Umwene Senakelibu uwa ku Asilya walanda wati, ‘Uzye mutaaile muli cani pakuti mutwalilile ukwikala umu Yelusalemu lino asilika iyazinguluka umusumba? 11 Uzye Hezekiya atakumuponzya nu kuleka ukuti muce mufwe uku nzala nu lusala, vino akulanda ukuti: “Yeova Leza witu alatupususya uku mwene wa ku Asilya”? 12 Uzye Hezekiya kwene asi uwononyile incende zino mwapepelangapo Leza winu na maulambo yakwe nu kunena antu ya mu mpanga ya Yuda nu mu Yelusalemu ati: “Mwafukama pa nkoleelo ya ulambo onga nupya apano mwapeelela malambo ya koca”? 13 Uzye mutamanya vino nemo ni vikolwe vyane twacisile uku yantu yonsi amu mpanga zyuze? Uzye ya leza ya nko zya mu mpanga zizyo yapuswisye antu yao kuli nene? 14 A Leza ci pali ya leza ya nko zino ivikolwe vyane vyononyile uwapuswisye antu yakwe kuli nene pakuti Leza winu wene amupususye? 15 Mutaleka Hezekiya amubepe nu kumuponzya! Mutamutaila, pano kusi leza uwa luko ululi lonsi nanti uwa wene, uwapususya antu yakwe kuli nene nu ku vikolwe vyane. Uzye lyene Leza winu aangamupususya kuli nene?’”
16 Aomvi yakwe Senakelibu yalanzile ivintu na vyuze iviipe pali Yeova Leza wa cumi na pali Hezekiya umuomvi wakwe. 17 Walemvile na makalata aakutuka Yeova Leza wa Ina Izlaeli nu kulanda iviipe pali aliwe ati: “Wakwe viivi kwene vino ya leza ya nko zya mu mpanga zyuze yafizilwe ukupususya antu yao kuli nene, avino na Leza wakwe Hezekiya atalapususya antu yakwe kuli nene.” 18 Yatwalilile ukupundilila antu aali pa ciumba ca musumba uwa Yelusalemu mu lulimi lwa Yayuda pakuti yayalenge ukuvwa intete nu kuzakaza alino yapoke umusumba. 19 Yalanzile iviipe pali Leza wa yantu ya mu Yelusalemu wakwe vino yalanzile pali ya leza ya yantu ya mu mpanga zyuze, aapangwa sile na antu. 20 Lelo Umwene Hezekiya na Ezaya kasesema mwana Amozi yatwalilile ukupepa nu kulilila kuli Leza wa kwi yulu pakuti ayazwe.
21 Lyene Yeova watumile malaika uwakomile asilika ya maka yonsi, intunguluzi, nu mukalamba wa yasilika ya mwene wa ku Asilya, fwandi umwene wa ku Asilya waswilile uku mpanga yakwe ala atazewana. Pa cisila wingile umu ng’anda yakwe leza wakwe, nupya mumu kwene amuno ana yakwe yamwi yamukomile nu lupanga. 22 Yeova wapuswisye Hezekiya na antu ya mu Yelusalemu uku Mwene Senakelibu uwa ku Asilya nu ku yalwani yao yonsi nupya wayalenzile ukupuuza. 23 Antu aingi yatwazile ivya upe kuli Yeova uku Yelusalemu ni vintu visuma uku Mwene Hezekiya uwa ku Yuda, nupya pa cisila antu ya mu nko zyonsi yacindike sana Hezekiya.
24 Lyene Hezekiya wizile alwala umupiipi nu kufwa, nupya wapefile kuli Yeova nawe wamwaswike nu kumupeela icimanyililo. 25 Lelo Hezekiya atataizye pa visuma vino yamucitile pano wizile aya ni cilumba, nu kuiletelela aletelela na antu ya mu mpanga ya Yuda nu mu Yelusalemu. 26 Nomba Hezekiya na antu ya mu Yelusalemu izile iyaicefya nu kuta ukuya ni cilumba, nupya ukali wakwe Yeova utiziile pali aliyo umu manda yakwe Hezekiya.
27 Nupya Hezekiya wizile akwata sana ivyuma nu ucindami; wakuuzile na mang’anda umwa kusungila siuva, goldi, mawe ya mutengo, mafuta yakwe basamu, visyangu, ni viya vyonsi ivisuma. 28 Wapanzile nu mwa kusungila ingaano, waini na mafuta, kumwi nu mwa kusungila iviteekwa ivipusanepusane, ni vitata umwa kwikala imfwele ni mbuzi. 29 Wakuuzile ni misumba, nupya wizile akwata iviteekwa ivingi, imfwele ni mbuzi ni ng’ombe, pano Leza wamupeezile ivyuma ivingi. 30 Hezekiya u wacilike ukwafumililanga manzi amu cifula ca Gihoni nu kuyatwala uku uwondaka wa Musumba Wakwe Devedi, nupya watungulwike muli vyonsi vino wacitanga. 31 Lino ya cilolo ya ku Babiloni yatumile aayalandilangako kuti yakuuzye Hezekiya pa cimanyililo icacitike umu mpanga, Leza wa cumi wamusiile pakuti amwezye nu kulola vyonsi ivyali umu mwenzo wakwe.
32 Ilyasi lyonsi ilyasyala ilikalanda pali Hezekiya na pali vino wali nu kutemwa kwa cumi, lyaya umu vyalembwa ivikalanda pa vilolwa vyakwe Ezaya kasesema mwana Amozi, i vyaya umwi buku ilikalanda pali ya mwene ya mu Yuda nu mu Izlaeli. 33 Lyene Hezekiya wafwile nu kuziikwa ukwalaala ivikolwe vyakwe, uku mutentemuko uwayelile kuno yaziikanga ya mwana Devedi; nupya antu yonsi amu mpanga ya Yuda nu mu Yelusalemu yamucindike lino wafwile. Lyene Manase umwanakwe wamupyanyile pa wene.