Ezaya
54 Yeova walanda wati: “Punda ni nsansa we mwanaci ing’umba!
Sansamuka nu kupundisya ni nsansa, wemuno utuvwapo ukuwaika kwa pa kupaapa,
Pano ana yakwe wino yasya yaya aingi sana
Ukucila ana ya mwanaci uwakwata iya.”
2 “Kuzya incende aapaya itenti lyako.
Konzolola matenti aaya pa ncende yako iya kwikalapo iya lulumbi,
Talimfya intambo zya kwi tenti lyako,
Pampamila ningo impoopo zya kwi tenti.
3 Ulasalanganila ukwi lunji na kuli cimani
Ana yako yalatungulula inko
Nupya yalikala umu misumba ino antu yafumamo.
4 Utatiina, pano utalazewana;
Utuvwa insonyi pano vino ukapaalila vilacitika.
Ulilila vino wazewanyile uku wance,
Nupya utaliusya vino wazewanyile pa mulandu na umukamfwilwa.”
5 Kaumba Wako Umukalamba waya kwati uwako,*
Izina lyakwe a Yeova uwa maumba,
Nupya Uwa Muzilo wakwe Izlaeli ali Kapususya wako.
Alaamwa ukuti Leza uwa nsi yonsi.
6 Yeova wakwamile wa mwanaci wino yatazyela nupya aali nu ulanda,
Wa mwanaci uwatwazilwe ala umwance lyene iiza iyamukana,” vikwene avino Leza wako walanda.
7 “Nakutazyezile pa nsita inono,
Lelo pa mulandu nu luse lwane ulukalamba ndakuwezya nupya.
8 Lino nasosile sana nafisile icinso cane kuli wewe pa nsita inono,
Lelo ndakuvwila uluse pa mulandu nu kutemwa kwane ukwa cumi ukusisila,” vikwene avino Yeova Kapususya wako walanda.
9 “Cilaya wakwe vino cali umu manda yakwe Nowa.
Wakwe viivi kwene vino nalavile umu manda yaya ukuti ntalazuzya manzi umu nsi nupya,
Avino nkulapa ukuti ntalatala nkusokele nanti ukukukalipila nupya.
10 Imyamba ingafumiziwapo
Nu tu myamba tungasunkaana,
Lelo ukutemwa kwane ukwa cumi kutalatala kufume pali wewe,
Nu upangano wane uwa mutende utalatala usunkaane,” avino Yeova aakukuvwila uluse walanda.
11 We mwanaci uwacuziwa, uwakwata sana intazi, wemuno utakwata uwa kukuteekezya
Nkukukuula ukuomvya mawe ni ivu ilikonde
Nupya nkukuula umufula wako ukuomvya iwe lyakwe safilo.
12 Papela ya viumba vyako ndakuulapo na mawe yakwe lubi,
Impongolo zyako ndazipanga na mawe ayengese,
Nupya imipaka yako yonsi ndaikuula na mawe ya mutengo.
13 Ana yako yonsi yalasambiliziwa na Yeova,
Nupya yalaya sana nu mutende.
14 Ulaacita sile ivilungame.
Kusi aalakucuzya,
Utalaatiina icili consi nanti ukuzakaza,
Pano kusi icili consi ica kutiinya iciliza pali wewe.
15 Ndi cakuti umwi wiza umu kukulwisya,
Ala asi nene imutuma.
Wensi uwiza umu kukuzanza alacimviwa.”
16 “Lola! Nene napanzile aakasula ivyela,
Aakapuuta pa moto
Mpaka apanga icanzo.
Nupya nene kwene napanzile umuntu aakaomvya icanzo cico uku kuleta uwononyi.
17 Kusi icanzo icili consi cino yapanga pakuti yakulwisizyeko icilaomba,
Nupya ulakalipila umuntu wensi aalakupingula.
Cikwene ali ca upyanyi ca yaomvi yakwe Yeova,
Nupya nkayalola ukuti alungami,” vii avino Yeova walanda.