Zekaliya
6 Nupya kwene nalolekishe umupela, naweni maceleta 4 yakufuma pakasi ka myamba iili, nupya imyamba iyo yaali iyakwe koopa. 2 Celeta lya kutandikilapo lyakweti imfwalasi iziyenzu, ni celeta lyakwe ciili lyakweti imfwalasi zitifi. 3 Celeta lyakwe citatu lyakweti mfwalasi zitiswe, ni lyalenga 4 lyakweti imfwalasi zya mantonintoni ni zya maala maala.
4 Nuzizye malaika uwalandanga nani inti: “Mwene, uzye vikwimililako cani vii?”
5 Malaika waswike ati: “Yii i mipasi 4 iya mwi yulu iikufuma pa cisila ca kwimilila pa nkoleelo ya Mwene wa nsi yonsi. 6 Celeta ilikweti imfwalasi zitifi likuya uku mpanga iya ku katutu, ilikweti mfwalasi zitiswe likuya uku mpanga iyayela ukupuzya pali yemba; ni likweti imfwalasi zya mantonintoni likuya uku mpanga ya ku kaeya. 7 Nupya imfwalasi zya maala maala zikulondesha ukupitaana umu nsi.” Lyene wazinenyile ati: “Yangini mukapitaane umu nsi.” Nazyo zyatandike ukupitaana umu nsi.
8 Lyene wampundilile ati: “Lola, izikuya uku mpanga ya ku katutu izilenga umupasi wakwe Yeova ukupuuza umu mpanga iya ku katutu.”
9 Yeova wanenyile nupya kwene ati: 10 “Ukasende vino Helidai, Tobiya na Yedaya yaleta ukufuma uku yantu ya mu uzya, nupya pa wanda kwene uwo ukaye uku ng’anda yakwe Yosiya mwana Zefaniya pamwi na antu yaa aafuma uku Babiloni. 11 Uce utole siuva na goldi nu kupanga icisote nupya ukazwike Yoswa simapepo mukalamba, mwana Yeozadaki. 12 Nupya uce umunene uti,
“‘Yeova wa maumba walanda wati: “Umonsi wii izina lyakwe a Kupuuka. Alapuuka pa ncende yakwe, nupya alakuula itempele lyakwe Yeova. 13 Aliwe alakuula itempele lyakwe Yeova nupya aliwe alapokelela umucinzi. Alikala pa cilimba cakwe ica wene nu kuteeka, nupya alaya simapepo pa cilimba cakwe ica wene, nupya alaomba ningo imilimo yii yoili. 14 Nupya icisote cilaya i ca kwiusizyako Helemu, Tobiya, Yedaya na Heni mwana Zefaniya umwi tempele lyakwe Yeova. 15 Nupya yayo aaya ukutali yaliza nu kukuulako itempele lyakwe Yeova.” Lyene mulamanya ukuti Yeova wa maumba uwatantuma kuli mwemwe, nupya vilacitika ndi cakuti muvwila mazwi yakwe Yeova Leza winu.’”