2 Yamwene

13 Mu mwaka uwalenga 23 uwa kuteeka kwa Mwene Yeoasyi mwana Ahaziya umwene wa ku Yuda, Yeowazi mwana Yeu wizile aya umwene umu Izlaeli ala akwikala umu Samaliya, nupya wateesile pa myaka 17. 2 Wasosyanga Yeova nupya wacitanga imembu zino Yeloboamu mwana Nebati walenzile Aina Izlaeli ukucita. Wacitanga viivi kwene sile. 3 Fwandi Yeova wasokiile sana Aina Izlaeli, nupya wayapeezile uku Mwene Hazaeli uwa ku Silya na kuli Beni-hadadi mwana Hazaeli, manda yonsi yakwe Yeowazi.

4 Lino papisile insita, Yeowazi wapaapasile kuli Yeova, Yeova nawe uvwile kuli aliwe pano waweni vino umwene wa ku Silya wacuzyanga Aina Izlaeli. 5 Fwandi Yeova wapekinye uwa kupususya Aina Izlaeli uku Ina Silya, nupya Aina Izlaeli yatandike ukwikala umutende wakwe vino ikalanga lyonsi. 6 (Lelo yataatile ukucita imembu zino amu ng’anda yakwe Yeloboamu uwalenzile ukuti Aina Izlaeli yayembuke yacitanga. Yatwalilile ukucita imembu, nupya ulucesi lwa kupepa* lwatwalilile ukuya umu Samaliya.) 7 Yeowazi wasyazile sile na asilika 50 akwelanga pa mfwalasi, maceleta 10, na asilika 10,000 aapitanga ulwa pansi, pano umwene wa ku Silya wayononyile mpaka iyasyala sile wa lukungu lwa pa lwano.

8 Ilyasi lyonsi ilyasyala ilikalanda pali Yeowazi, na pa vintu vyonsi vya maka vino wacisile, lyalembwa umwi buku lya mpiti ilikalanda pali ya mwene ya mu Izlaeli. 9 Lyene Yeowazi wafwile nu kuziikwa ukwalaala ivikolwe vyakwe uku Samaliya; nupya Yeoasyi umwanakwe wizile aya pa wene.

10 Mu mwaka uwalenga 37 wa kuteeka kwa Mwene Yeoasyi uwa ku Yuda, Yeoasyi mwana Yeowazi wizile aya umwene umu Izlaeli ala akwikala umu Samaliya, nupya wateesile pa myaka 16. 11 Wasosyanga Yeova, atatiile ukucita imembu zino Yeloboamu mwana Nebati uwalenzile Aina Izlaeli ukuyembuka wacitanga. Wacitanga viivi kwene sile.

12 Ilyasi lyonsi ilyasyala ilikalanda pali Yeoasyi, pa vintu vyonsi vya maka vino wacisile na pali vino walwisizye Amaziya umwene wa ku Yuda, lyalembwa umwi buku lya mpiti ilikalanda pali ya mwene ya mu Izlaeli. 13 Lyene Yeoasyi wafwile nu kuziikwa ukwalaala ivikolwe vyakwe, nupya Yeloboamu* wamupyanyile pa wene. Yeoasyi waziisilwe uku Samaliya ukwaziikwa ya mwene ya mu Izlaeli.

14 Lino Elisya walwazile ulwale uwizile iumukoma pa cisila, Yeoasyi umwene wa ku Izlaeli waile kuli aliwe atandika ukuloosya ala akuti: “Tata, tata! Nalola iceleta lyakwe Izlaeli na antu yakwe akwezile pa mfwalasi!” 15 Lyene Elisya wamunenyile ati: “Tola ulapwa ni nceto.” Nawe wacisile vivyo kwene. 16 Lyene wanenyile umwene wa ku Izlaeli ati: “Lema ulapwa.” Nawe wacisile vivyo kwene, pa cisila Elisya walemile umwene makasa. 17 Nupya wamunenyile ati: “Yula iwindo lwa ku ufumondaka.” Nawe wayuzile. Lyene wamunenyile ati: “Lasa!” Nawe wacisile vivyo kwene. Lyene walanzile ati: “Luceto lwakwe Yeova ulwa kucimvizyako Aina Silya! Ulacimvya Aina Silya uku Afeki kufikila yace yasile.”

18 Watwalilile ukumunena ati: “Tola inceto,” nawe wacisile vivyo kwene. Lyene wanenyile umwene wa ku Izlaeli ati: “Lasa pa musili.” Fwandi walasile pa musili miku itatu ata nu kuta. 19 Lyene umuntu wakwe Leza wa cumi wamusokiile sana nu kumunena ati: “Wali ulinzile ukulasa pa musili miku 5 nanti 6! Ndi cakuti ucita vivyo alino wanga uce ucimvye Aina Silya mpaka uyamale, nomba lyene ulayacimvya sile imiku itatu.”

20 Pa cisila Elisya wafwile nu kuziikwa. Kwali iumba lya Ina Moabu yamwi aizanga umu mpanga ku kutandika kwa mwaka. 21 Lino antu yaziikanga umonsi umwi, yaweni iumba lya Ina Moabu, fwandi lilyo kwene yasumbiile icitumbi cakwe umwi lindi lyakwe Elisya nu kuutuka. Lino icitumbi cakumizye uku mafupa yakwe Elisya, umonsi wiyo watuutulwike aimilila nu kwimilila.

22 Umwene Hazaeli uwa ku Silya wacuzyanga Aina Izlaeli mu manda yonsi yakwe Yeowazi. 23 Lelo Yeova watwalilile ukuya nu luse kuli aliyo nupya wayasakamalanga pa mulandu nu upangano uno wapangine na Abulahamu, Isaki, na Yakobo. Atalondanga ukuyonona nupya atayalekelezya kufika na ndakai. 24 Lino Umwene Hazaeli uwa ku Silya wafwile, Beni-hadadi umwanakwe u wamupyanyile pa wene. 25 Lyene Yeoasyi mwana Yeowazi wapokolwile Beni-hadadi mwana Hazaeli misumba ino Hazaeli waposile kuli Yeowazi mu nkondo. Yeoasyi wacimvizye Beni-hadadi miku itatu nu kupokolola imisumba ya Ina Izlaeli.