Ezekeli
37 Ikasa lyakwe Yeova lyali pali nene, nupya Yeova wansenzile ukuomvya umupasi wakwe antwala umu mukonko, nupya mwazuuzile mafupa. 2 Walesile ukuti impite umu mafupa yonsi, nupya naweni ukuti umu mukonko mwali mafupa aingi sana nupya yaali aumisye. 3 Lyene wanguzizye ati: “We mwana wa muntu, uzye mafupa yaa yangaya nu umi?” Nani natiile: “We Yeova Mwene wa Papelapela wewe umanyile.” 4 Fwandi wanenyile ati: “Sesema pa mafupa yaa, nu kuyanena uti, ‘Mwe mafupa aume, uvwini amazwi yakwe Yeova:
5 “‘Yeova Umwene wa Papelapela walanda pali mwemwe wati: “Ndalenga umupu wingile muli mwemwe nupya mulaya nu umi. 6 Ndika imikole, umunyefu ni nkanda kuli mwemwe, nupya ndamwikila nu mupu, namwe mulaya nu umi; lyene mulamanya ukuti nene Yeova.”’”
7 Lyene nasesime kulingana na vino wanenyile. Lino namazile sile ukusesema, kuvwisile icongo ca kupumana kwa mafupa nupya mafupa yatandike ukulundinkana. 8 Lyene naweni imikole nu munyefu vyaya uku mafupa, ni nkanda yayavimvile lelo yataakweti umupu.
9 Lyene Leza wanenyile ati: “Sesema uku muza. We mwana wa muntu sesema nu kunena umuza uti, ‘Yeova Umwene wa Papelapela walanda wati: “We muza, fuma uku ntunga 4 nu kupungila pa yantu yaa akomilwe pakuti yangaya nu umi.”’”
10 Fwandi nasesime ukulingana na vino wanenyile, nu mupu wingile umu yantu nayo izile iyaya nu umi nupya yakatwike, yaali asilika aingi sana.
11 Lyene Leza wanenyile ati: “We mwana wa muntu mafupa yaa aali yantu ya mu ng’anda yakwe Izlaeli yonsi. Yakulanda iyati, ‘Mafupa itu yuma nu upaalilo witu wasila. Mu cumi twasyala sile swenga.’ 12 Fwandi yasesemele uti, ‘Yeova Umwene wa Papelapela walanda wati: “Mwe yantu yane, ndayula malindi inu nu kumufumyamo nupya ndamuswilizya uku mpanga ya Izlaeli. 13 Lyene mulamanya ukuti nene Yeova lino ndayula malindi inu nu kumufumyamo.”’ 14 ‘Ndika umupasi wane muli mwemwe namwe mulaya nu umi, nupya ndamulenga ukwikala umu mpanga inu; lyene mulamanya ukuti nene ne Yeova nalanzile nu kucita vivyo kwene,’ avino Yeova walanda.”
15 Nupya kwene Yeova wanenyile ati: 16 “We mwana wa muntu tola kamuti nupya ulembepo uti, ‘Kamuti kakwe Yuda na Ina Izlaeli aali nawe.’ Lyene utole kamuti kauze ulembepo uti, ‘Kamuti kakwe Jozefu akakwimililako Efulemu na amu ng’anda yakwe Izlaeli yonsi aali nawe.’ 17 Lyene utulemele pamwi ukwi kasa lyonga pakuti tuye wa kamuti konga. 18 Nga antu yako yakunena yati, ‘Tunene vino ivintu vii vikupiliula,’ 19 uyanene uti, ‘Yeova Umwene wa Papelapela walanda wati: “Ndatola kamuti kakwe Jozefu akali umu minwe yakwe Efulemu ni mitundu ya Ina Izlaeli iili nawe nu kuyalemenkanya uku kamuti kakwe Yuda, nupya ndalenga utumiti tuto tuye kamuti konga lyene tulaya kamuti konga umu minwe yane.”’ 20 Uleme utumiti tuno watulembapo pakuti yatulola.
21 “Lyene yanene uti, ‘Yeova Umwene wa Papelapela walanda wati: “Ndawezya Aina Izlaeli ukufuma umu nko zino yasalanganilamo, nupya ndayakolonganika ukufuma umu mpanga zyonsi nu kuyatwala umu mpanga yao. 22 Ndayalenga ukuya uluko longa, nupya yalaikala pa myamba ya mu Izlaeli, yalateekwa nu mwene wenga, nupya yatalatwalilila ukuya inko ziili; nanti ukupaatukana ukuya mawene yaili. 23 Yatalatwalilila ukuikowezya uku vilubi vyao ivya winyi,* ku vintu vya winyi vino yakacita na kuli vyonsi vino yakaluvyanya. Ndayapususya kuli ucipondoka wao onsi nupya ndayasangulula. Yalaya antu yane, nani ndaya Leza wao.
24 “‘“Devedi umuomvi wane alaya ali mwene wao, nupya yonsi kwene yalakwata kacema wenga. Yalauvwila vino nayanena nu kulondela sana masunde yane. 25 Yalaikala umu mpanga ino napeezile umuomvi wane Yakobo umwikalanga ivikolwe vinu, nupya yalikalamo manda pe, kuli kuti yene kumwi na ana yao na ana ya yana yao. Na Devedi umuomvi wane aalaya intunguluzi yao manda pe.
26 “‘“Ndapangana nayo upangano wa mutende; ulaya upangano wa manda pe. Ndayakomya nu kuyavuzya, nupya ndika itempele lyane muli aliyo manda pe. 27 Itenti lyane* lilaya muli aliyo, nani ndaya Leza wao, nayo yalaya antu yane. 28 Nupya inko zilamanya ukuti nene ne Yeova nkucindamika Aina Izlaeli pa kwika itempele lyane muli aliyo manda pe.”’”