2 Milandu
12 Lino uwene wakwe Leoboamu wakomile sile akwata na maka, wene pamwi na Ina Izlaeli yonsi yatiile ukulondela masunde yakwe Yeova. 2 Umu mwaka uwalenga 5 uwa kuteeka kwa Mwene Leoboamu, Umwene Syisyaki uwa ku Ijipti wizile umu kuzanza amu Yelusalemu pano yatiile ukuya ni cisinka kuli Yeova. 3 Wakweti maceleta 1,200 na aonsi aakukwela pa mfwalasi 60,000, alino na asilika yauze atanga yapendwe yano wizile nayo ukufuma uku Ijipti, kuli kuti Aina Libya, Aina Suki na Ina Etiopia. 4 Waposile imisumba ya malinga iya mu Yuda asuka afika nu ku Yelusalemu.
5 Syemaya kasesema waile kuli Leoboamu na kuli ya cilolo ya mu Yuda aakolongine uku Yelusalemu pa mulandu wa kutiina Syisyaki, nupya wayanenyile ati: “Yeova walanda wati, ‘Pa mulandu wakuti imumpondokela, nani imupeela umu minwe yakwe Syisyaki.’” 6 Lino ya cilolo ya mu Izlaeli nu mwene yuvwile vivyo, yaicefizye nu kulanda iyati: “Yeova u mulungami.” 7 Lino Yeova waweni ukuti yaicefya, Yeova wanenyile Syemaya ati: “Iyaicefya. Fwandi nsikuyonona, nimayapususya likwene. Ntalaleta ukali wane pali Yelusalemu ukuomvya Syisyaki. 8 Lelo yalaya aomvi yakwe pakuti yamanye upusano uwaya pa kumbombela nu kuombela ya mwene ya mu mpanga zyuze.”
9 Lyene Umwene Syisyaki uwa ku Ijipti wizile umu kulwisya Yelusalemu. Wasenzile ivyuma vya mu ng’anda yakwe Yeova ni vya mwi sano. Wasenzile vyonsi sile kumwi ni visyangu vyakwe goldi vino Solomoni wapanzile. 10 Fwandi Umwene Leoboamu wapanzile ivisyangu vyakwe koopa ivya kupyanikizya pa visyangu vivyo nu kuvipeela uku ntunguluzi zyakwe ya kalinda aalindanga pa mpongolo ya kwi sano. 11 Lyonsi lino umwene waya uku ng’anda yakwe Yeova, alinzi iingilanga nu kusenda ivisyangu vivyo, nupya pa cisila yaviswilizyanga umu muputule wao. 12 Pa mulandu wakuti umwene waicefizye, ukali wakwe Yeova utizile pali aliwe nupya atayononyile yonsi, yamwi yasyazile. Nupya antu ya mu Yuda yazanyilwe ni miyele imwi isuma.
13 Umwene Leoboamu wakwatiileko maka umu Yelusalemu nupya watwalilile ukuteeka; wali ni myaka 41 lino watandike ukuteeka nupya wateesile imyaka 17 mu musumba wa Yelusalemu uno Yeova wasoolwile kufuma umu mitundu yonsi iya mu Izlaeli kuti muye izina lyakwe. Nyina wali a Naama Umwina Amoni. 14 Lelo pa mulandu wakuti Leoboamu atalondelanga utunguluzi wakwe Yeova nu mwenzo onsi calenzile kuti aacita viipe.
15 Ilyasi lyonsi ilikalanda pali Leoboamu, kufuma pa kutandika ukufika uku mpela, lyalembwa umu mazwi yakwe kasesema Syemaya, na yakwe Ido kalola wa vilolwa, aaya umu vyalembwa ivikalanda vino indupwa zyakonkine. Nupya lyonsi Leoboamu na Yeloboamu yalwisyanyanga. 16 Lyene Leoboamu wafwile nu kuziikwa ukwalaala ivikolwe vyakwe umu Musumba Wakwe Devedi, nupya Abiya umwanakwe u wamupyanyile pa wene.