2 Milandu
11 Lino Leoboamu wafisile sile uku Yelusalemu, wakolonganike amu lupwa lwakwe Yuda na amu lupwa lwakwe Benjamini, kuli kuti asilika 180,000 asambilile ivya kulwa, kuti yakalwisye Aina Izlaeli pakuti yamuwezezye uwene. 2 Lyene Yeova wanenyile Syemaya umuntu wakwe Leza wa cumi ati: 3 “Ukanene Leoboamu mwana Solomoni umwene wa ku Yuda na Ina Izlaeli aakaikala umu mpanga yakwe Yuda na yakwe Benjamini uti, 4 ‘Yeova watalanda ati: “Mutalinzile ukuya umu kulwisya aina inu. Mwensi swililini uku mang’anda inu, pano nene indenga ukuti vintu vii vicitike.”’” Fwandi yuvwile vino Yeova walanzile nu kuswilila nupya yataile umu kulwisya Yeloboamu.
5 Leoboamu watenzi umu Yelusalemu nupya wakuuzile imisumba ya malinga umu mpanga iya Yuda. 6 Misumba ino wakuuzile a Betelemu, Etamu, Tekoa, 7 Beti-zuli, Soko, Adulamu, 8 Gati, Malesya, Zifu, 9 Adolaimu, Lakisyi, Azeka, 10 Zola, Aijaloni, na Hebuloni, kuli kuti misumba ya malinga iyaali umu mpanga yakwe Yuda, na yakwe Benjamini. 11 Lyene wakomizye malinga aikamo na asilika nupya wayapeelanga ivyakulya, mafuta, na waini, 12 nupya umu misumba yonsi watwazilemo ivisyangu vikalamba na masumo; wakomizye sana misumba iiyo nupya impanga yakwe Yuda na yakwe Benjamini yatwalilile ukuya iyakwe.
13 Nupya ya simapepo na Ina Levi aali umu Izlaeli monsi yafumile kuno ikalanga, nu kuya umu kumutungilila. 14 Aina Levi yasiile incende zyao izya kucemelamo iviteekwa ni vyuma vyao nu kuya uku Yuda nu ku Yelusalemu, pano Yeloboamu na ana yakwe yayazinzile kuti yataya ya simapepo yakwe Yeova. 15 Yeloboamu waisontiile ya simapepo aakuti yaombela pa ncende zino yalolanga ukuti izya muzilo na aakuti yatungulula antu pa kupepa iviwa ivyalolekanga wa mbuzi alino ni vilubi vyuze vino wapanzile. 16 Nupya amu mitundu ya Ina Izlaeli yonsi aalondanga ukuombela Yeova Leza wa Ina Izlaeli yalondiile ya simapepo na Ina Levi uku Yelusalemu mu kupeela malambo kuli Yeova Leza wa vikolwe vyao. 17 Pa myaka itatu yakomizye uwene wa mu Yuda nu kutungilila Leoboamu mwana Solomoni, pano pa myaka iiyo yapepanga Leza wakwe vino Devedi na Solomoni yacitanga.
18 Lyene Leoboamu watwazile Maalati mwana Yelimoti umwana wakwe Devedi, nupya Maalati wali umwana wakwe Abihaili umwana umukazyana wakwe Eliabu mwana Yese. 19 Lino papisile insita wamuvyaliile ana aonsi, kuli kuti Yeusyi, Syemaliya, na Zahamu. 20 Lyene watwazile na Maaka umwizikulu wakwe Abusalomu. Nawe wamuvyaliile Abiya, Atai, Ziza, na Syelomiti. 21 Leoboamu watemilwe sana Maaka umwizikulu wakwe Abusalomu ukucila aci yonsi asyala na aci yakwe aapa mbali, wakweti aci 18 na aci yauze 60 aapa mbali, nupya wizile akwata ana aonsi 28 na akazyana 60. 22 Fwandi Leoboamu wasonsile Abiya mwana Maaka ukuya umukalamba nupya intunguluzi pa ina yakwe, pano walondanga ukumwika pa wene. 23 Lelo waomvizye ukwiluka atuma anakwe aonsi yamwi umu ncende yonsi yakwe Yuda ni ncende yakwe Benjamini, mu misumba yonsi ya malinga nupya wayapeezile ivintu ivingi na aci aingi.