Ezekeli

2 Lyene wanenyile ati: “We mwana wa muntu,* katuka pakuti ndande naawe.” 2 Lino wanenyile vivyo, umupasi wizile muli nene nupya walenzile ukuti nkatuke pakuti nuvwe kuli vino walandanga nani.

3 Lyene wanenyile ati: “We mwana wa muntu, nimakutuma uku Ina Izlaeli, uku nko umwaya antu aampondokela. Yene pamwi ni vikolwe vyao yatwalilila ukuyembuka ukufika na ndakai. 4 Nimakutuma uku yana ya cintuvwa nupya aakoma imyenzo, ukayanene uti, ‘Vii avino Yeova Umwene Uwa Papelapela walanda.’ 5 Vino aacipondoka, asi mulandu yaluvwa nanti foo, yalamanya ukuti kasesema wali pakasi kao.

6 “Lelo wemo we mwana wa muntu utayopa, nupya utaca uuvwe intete pa mulandu na mazwi yao nanti cakuti wazingulukwa ni myunga nupya ukaikala pamwi na makalela. Utuvwa intete pa mulandu na mazwi yao nupya utoopa pa mulandu na vino yakaloleka, pano yene aacipondoka. 7 Ulinzile ukuyanena mazwi yane, asi mulandu yaluvwa nanti foo pano aacipondoka.

8 “Lelo wemo we mwana wa muntu, uvwa vino nkukunena. Utapondoka wa yantu yaa yacipondoka. Asama nu kulya vino nkukupeela.”

9 Lino nalolekisye, naweni ikasa ilikonzolwelwa kuli nene, nupya lyalemile ulupapulo ululembwe. 10 Lino walupombolwile pa nkoleelo yane, naweni ukuti lwalemvilwe konsi koili. Mwali inyimbo zya ulanda, ukuloosya nu kulila.