Ezekeli
5 “Naawe we mwana wa muntu tola ulupanga ulukalipe ulwakuti uomvye ngi ca kupelelako. Upele inyele ni vilezu, lyene utole sikelo upime inyele nu kuziika umu mitumba itatu. 2 Mutumba onga uwa nyele uce ukaocele umu musumba lino manda akuuzinguluka yalasila. Lyene uce utole umutumba wakwe ciili nu kufuma ukuuputoola nu lupanga kuzinguluka musumba, nupya umutumba wakwe citatu ulausalanganyizizya umu muza, nani ndatola ulupanga nu kuzizinganya.
3 “Uce utole inyele zimwi nu kuziika uku visempe vya ca kuzwala cako. 4 Nupya uce utole zimwi nu kuzyoca pa moto. Umoto ulafuma pa nyele kwene zizyo nu kusalanganila pa ya mu ng’anda yakwe Izlaeli yonsi.
5 “Yeova Umwene wa Papelapela walanda wati: ‘Wii ali Yelusalemu. Namwika pakasi ka nko, wazingulukwa ni mpanga. 6 Lelo wapondokela upinguzi wane na masunde yane, akacita iviipe kucila ni nko ni mpanga izyamuzinguluka. Pano antu ya mu Yelusalemu yakakana upinguzi wane, nupya yasilondela masunde yane.’
7 “Fwandi Yeova Umwene wa Papelapela walanda wati: ‘Pa mulandu wakuti mwacitanga iviipe ukucila inko izyamuzingulwike nupya mutalondelanga masunde yane nanti upinguzi wane, lelo mwalondelanga vino inko izyamuzingulwike zyacitanga, 8 ne Yeova Umwene wa Papelapela nalanda nati: “Inja umulwani winu mwe yantu ya mu musumba, nupya ndaleta upinguzi pali mwemwe ala ni nko zikulolako. 9 Ndacita kuli mwemwe icintu cino ntatala nacitapo nupya cino ntalatala incitepo pa mulandu ni vintu vyonsi vya winyi vino mukacita.
10 “‘“Avyazi yalalya ana yao, na ana yalalya avyazi yao, nupya ndaleta upinguzi pali mwemwe nu kumusalanganyizizya mwensi mu ncende zyonsi.”’
11 “Ne Yeova ne Mwene wa Papelapela nkulapa ukuti, ‘Pa mulandu wakuti mwakowezya incende yane iya muzilo kuomvya ivilubi vinu vyonsi vya winyi ni vicitwa vinu vyonsi viipe, ndamukana; ntalamuvwila uluse nanti ukuya ni cikuuku kuli mwemwe. 12 Yamwi pali mwemwe yalafwa uku cikuko nanti ukufwa uku cipowe, yauze nayo yalafwa ku lupanga, na asyala ndayasalanganyizizya mu ncende izipusanepusane nupya ndatola ulupanga nu kuyazinganya. 13 Lyene ukali wane ulasila kumwi ni cipyu cane, nupya nduvwa ningo. Pa cisila ca kuyafulula, yalamanya ukuti ne Yeova, nemuno nkalonda sile ukupepwa nenga nene nalanzile.
14 “‘Ndakulenga ukuya incende iyononeke nupya ulazewana uku nko izyakuzinguluka na kuli yonsi aalaapita umupiipi naawe nu kukulola. 15 Ulazewana nupya yalaakutumfya, ni nko izyakuzinguluka ziluvwa intete nu kusambilila kuli vino vilakucitikila lino ndaleta upinguzi pali wewe, ala indi nu ukali ni cipyu nupya ala insoka sana pa kukufulula. Nene ne Yeova indanda.
16 “‘Ndatuma icipowe iciipisye iciliza pali mwemwe wa nceto. Cipowe cico cilalenga mufwe. Cilipisya pano ndaleka ivyakulya ukusila. 17 Ndatuma icipowe ni vilyanyi vikalipisye kuli mwemwe, nupya vilamukomela ana. Cipowe ni mfwa viliza pali mwemwe, nupya ndaleta ulupanga pali mwemwe. Avino ne Yeova nalanda.”’