Milimo ya Atumwa
27 Lyene vino yatupingwilile ukuti tupite nu wato uku Itali, Paulo na afungwa yauze yayapeezile kuli musika wa yasilika uwi zina lyakuti Julyasi uwatungululanga asilika yakwe Ogasitasi. 2 Lino twakwezile uwato uwafumile uku Adilamityamu uwali apiipi nu kuya umu ncende izyali umu mbali yakwe yemba umu citungu ca Asia, twapisile na Alisitaka umwina Makedoniya uwafumile uku Tesalonika. 3 Uwanda uwalondelilepo twafisile uku Sidoni nupya Julyasi wali ni cikuuku kuli Paulo, wamuzumilizye ukuya kuli ya cuza yakwe pakuti yakamusakamale.
4 Nupya lino twafumile kuuku, twaile umupiipi ni cilila ca Kupulo kuno twacingililwe uku muza uwafumanga kuno twayanga. 5 Lyene twapisile pakasi kakwe yemba mupiipi na Kilikiya na Pamfuliya nu kuyaimilila apakafikila mawato pa Mila ku Likiya. 6 Kuuku kwene akuno musika wa yasilika wazanyile uwato uwafumile uku Alekizandilya ala ukuya uku Itali, nupya watunenyile ukuti amuno tukwele. 7 Lyene pa cisila ca kucula amanda iingi pali yemba, twafisile uku Kinido. Pa mulandu wakuti umuza walenzile ukuti tutatwalilila nu ulendo, twalungime pa cilila ca Kilete ituya itwimilila pa Salimone. 8 Nupya pa cisila ca kucula pa kupita umu mbali yakwe yemba, twafisile apa ncende ino yamanga yakuti Apakafikila Mawato Apasuma, apiipi nu musumba wa Laseya.
9 Papisile insita itali nupya twali umu uzanzo pa manzi, pano nu kuta ukulya ukwa pa Wanda wa Kwelelwa Imembu ala ikupita, fwandi Paulo wanenyile antu 10 ati: “Mwe yantu mwe nkulola ukuti ulwendo luu lumaonona ivingi asi sile iviya vitu nu wato lelo naswe kwene.” 11 Lelo musika wa yasilika uvwilile kapisya wa wato nu mwineco wa wato ukucila ukuvwila vino Paulo walanzile. 12 Vino apakafikila mawato pataali ningo umu nsita ya mpepo, aingi yalanzile ukuti yatwalilile nu ulendo ukulola ndi cakuti yangaya yakafike umu Fonikisi, apakafikila amawato umu Kilete lwa ku ufumondaka pakuti akuno yakikale umu nsita ya mpepo.
13 Lino umuza watandike ukupuunga panono, yelenginye ukuti vino yapingwilepo vyali sile ningo, nupya yakatwisye inanga nu kutandika ukupita mu mbali yakwe yemba umu Kilete. 14 Lelo pa cisila ca nsita inono umuza wa maka uno yamanga yakuti Yulokwilo* wapuungiile pa wato. 15 Vino umuza wapumile umu wato, uwato watiile ukuya uku nkoleelo, fwandi twautiile itutandika ukusendwa nu muza. 16 Lyene twalungiime uku cilila cinono cino yakaama ukuti Kauda, lelo catutaliile sana ukukwezya kawato* kano uwato uno twalimo watintanga uku cisila. 17 Lelo pa cisila ca kukatintila umu wato ukalamba, yakanyepelile umu ciwato, nupya vino yatiinanga ukuti uwato ungapuma umu mucanga wa Suliti,* yasapwile intambo izyalemile matanga* pakuti wapita sile nu muza. 18 Pa mulandu wakuti umuza wasunkanyanga sana uwato, yatandike ukusumbila iviya muli yemba pa wanda uwalondelilepo pakuti uwato wangupale. 19 Nupya pa wanda wakwe citatu, yasumbiile iviombelo vya wato muli yemba.
20 Vino tutaweni ilanzi ni ntanda pa manda iingi nupya ni cimuza icipisye catwaliliile ukupuunga, upaalilo uno twakweti uwakuti tumapusuka watandike ukusila. 21 Lino yapisile insita itali ukwaula ukulya, Paulo wimiliile pa nkoleelo yao nu kulanda ati: “Mwe yantu mwe, cumi i muvwila vino nalanzile nga tutaakatwike ukufuma umu Kilete nupya nga tutacuzile umusango uu nu konona iviya. 22 Lelo nanti ciye vivyo, nkumukomelezya ukuti musipe pano kusi nanti aumwi pali mwemwe amafwa, suka uwato sile uumaononeka. 23 Ilelo usiku, Leza wane wino nkaombela iwatuma malaika uwali wiza wimilila umupiipi nani 24 nu kulanda ati: ‘Paulo utatiina. Ulinzile ukwimilila pa nkoleelo yakwe Kaisale, nupya lola! Leza amakupususya kumwi na yonsi yano uli nayo umu wato.’ 25 Fwandi sipini, pano intaila ukuti Leza amacita viivi kwene vino malaika wali wanena. 26 Lelo uwato umatusumbila umupiipi ni cilila cimwi.”
27 Lyene pa wanda uwalenga 14 usiku, ala icimuza cikusunkanya uwato pali Yemba wa Adiliya, usiku pakasi ya kapisya ya wato yatandike ukwelenganya ukuti yali umupiipi nu kufika pa cilila cimwi. 28 Yapimile ukuzika kwakwe yemba nupya yazanyile ukuti paali mamita umupiipi na 36, nupya lino yapisile panono yapimile nupya kwene nu kuzana ukuti pali mamita umupiipi na 27. 29 Nupya vino yatiinanga ukuti uwato ungaya ukapume umu mawe pansi yakwe yemba, yasumbiile inanga 4 muli yemba uku cisila ca wato nupya yalondesyanga ukuti uce zuwa. 30 Lelo lino ya kapisya ya wato yalondanga ukupuuka ukufuma umu wato nupya yezyanga nu kufumya kawato pakuti yakiike muli yemba ala yakucita kwati yakulonda ukusumbila inanga uku nkoleelo ya wato, 31 Paulo wanenyile musika wa yasilika na asilika ati: “Ndi cakuti aonsi yaa yafuma umu wato, mutakupusuka.” 32 Lyene asilika yaputwile intambo zya ku kawato nu kukaleka ikapona.
33 Lyene lino kwali umupiipi nu kuca, Paulo wayakomelizye yonsi ukulya ivyakulya ati: “Ilelo u wanda uwalenga 14 kufuma pano mwikalila asakamale, nupya mutaatala mwalyapo icili consi. 34 Fwandi nkumukomelezya ukuti mulye ivyakulya; cico cimalenga ukuti ivintu vimuzipile, pano kusi nanti awenga pali mwemwe amafwa.” 35 Pa cisila ca kulanda vivyo, watozile umukate, ataizya kuli Leza pa nkoleelo yakwe yonsi, aumokoola nu kutandika ukulya. 36 Lyene yonsi yakomeleziwe nupya yatandike ukulya ivyakulya. 37 Swensi pamwi umu wato twali 276. 38 Lino yaliile ikuta, yasumvile ingano muli yemba pakuti uwato wangupale.
39 Lino waciile, yataamanyile kuno yaali, lelo yaweni umucanga umu mbali yakwe yemba nupya yapingwilepo ukwimika uwato paapa kwene nga yangakwanisya. 40 Fwandi yaputwile inanga nu kuleka iziponela muli yemba, pa nsita ili imwi kwene yatelwile intambo izyalemile inkafi; nupya lino yakatwisye itanga lya ku nkoleelo nu kulilozya ukwafumanga umuza, uwato waile umu mbali yakwe yemba. 41 Lino yafisile apatazisile, uwato wakumizye apansi nupya watisile iuta nu kusunkana, lelo maimbi yatandike ukuma uku mpinda ya wato itandika nu kulepoka. 42 Lyene asilika yapingwilepo ukukoma afungwa pakuti pataya nanti aumwi uwakuti aowe nu kupuuka. 43 Lelo musika wa yasilika walondesyanga ukupususya Paulo nupya walesizye asilika ukucita vino yalondanga. Wanenyile yonsi amanyile ukowa ukuti yatolokele muli yemba nu kutandikilapo ukufika uku cituntu, 44 na asyala yali nu kulondela pa cisila, yamwi yaali nu kulema uku mbao, yauze nayo ku tupimfya twa wato. Fwandi yonsi yafisile umutende uku cituntu.