Ezekeli
24 Mu mwaka uwalenga 9, mu mwezi uwalenga 10, pa wanda uwalenga 10, nupya kwene Yeova wanenyile ati: 2 “We mwana wa muntu lemba uwanda uu. Ilelo umwene uwa ku Babiloni watatandika ukuzanza Yelusalemu. 3 Landa ipinda pali yacipondoka nupya uyanene uti:
“‘Yeova Umwene wa Papelapela walanda wati:
“Teka impoto pa moto; uwitilemo na manzi.
4 Uwikemo ni vipimfya vya nyama ivisuma,
Impamba ni viye; uwikemo na mafupa asuma sana.
5 Utole imfwele isuma sana, upembele ni inkwi izingi umwisika lya mponto.
Uweleke ivipimfya ivya nyama na mafupa.”’
6 “Yeova Umwene wa Papelapela walanda wati:
‘Kalanda uku musumba uukazwisya uwazi uwaya wa mpoto iyakwata ingalawa zino zitafumiziwako!
Fumyamo icipimfya conga na conga; ukwaula ukupendoola.
7 Uwazi uno umusumba uu wazwisya ucili umu musumba.
Wapongolwelilwe pa ciliwe, utaapongolwelilwe pansi, pakuti uziikwe nu lukungu.
8 Nika uwazi uno wazwisya api iwe ilikaengesa,
Pakuti utwalilile ukuloleka
Ukufika ince ndete icilanduzi apa musumba uu.’
9 “Fwandi Yeova Umwene wa Papelapela walanda wati:
‘Kalanda uku musumba uukazwisya uwazi!
Ndatuulika umutumba wa nkwi ukalamba.
10 Tuulika inkwi nu kupemba umoto,
Eleka sana iminyefu, fumyamo umusunyi, leka mafupa yapye sana nu kusikisa.
11 Teka impoto iyaulamo icili consi pa munyeswa iyapangilwa na koopa,
Pakuti ikaye sana.
Ivikwi ivyayako vimasunguluka ni ngalawa zimapya.
12 Umulimo wa kuzifya impoto uukome nupya ukutonsya.
Pano ingalawa zisikufumako.
Sumbila impoto umu moto kumwi ni ngalawa!’
13 “‘Wizile uya umukowele pa mulandu ni vicitwa vyako ivya winyi. Nezizye ukukusangulula lelo utasangulwike uku kukowela kwako. Utalatala usanguluke ukufika icipyu cane cice cisile. 14 Nene ne Yeova indanda. Cilacitika. Ndacita vivyo ukwaula ukufilwa, ukwaula ulanda nanti ukulanguluka. Yalakupingula ukulingana ni miyele yako ni vicitwa vyako,’ avino Yeova Umwene wa Papelapela walanda.”
15 Nupya kwene Yeova wanenyile ati: 16 “We mwana wa muntu, nimalenga mamako wino watemwa ukufwa umu kupumikizya. Utalinzile ukuloosya nanti ukulila nanti ukuponya minsozi. 17 Uye sile nu ulanda uwa mu mwenzo nupya utalondela ni ntambi zya pa kuloosya. Uzwale ica kuvimba uku mutwe ni ndyatu. Utavimba pa mulomo,* nupya utalya ivyakulya vino yakukuletela ukufuma uku yantu yauze.”
18 Lyene nalanzile na antu katondo, na manguzi mamane wafwile. Fwandi uwanda uwalondelilepo katondo nacisile vino Leza wanenyile. 19 Antu yanguzyanga iyati: “Uzye vintu vii vino ukucita ivitukuma uli?” 20 Nani nayasukanga inti: “Yeova watanena ati, 21 ‘Nena amu ng’anda yakwe Izlaeli uti: “Yeova Umwene wa Papelapela walanda wati, ‘Namazewanya incende yane iya muzilo ino mukauvwilapo icilumba ino mwatemwa nupya ino imyenzo inu ikalonda. Na ana inu aonsi na anaci yano mutiza nayo kuno yalakomwa uku lupanga. 22 Lyene mulacita wakwe vino incita. Mutalavimba pa milomo inu nupya mutalalya ivyakulya ivilafuma uku yantu yauze. 23 Mulavimba uku mitwe inu nupya mulazwala indyatu. Mutalaloosya nanti ukulila. Lelo mulacula pa mulandu ni membu zinu, nupya mulaya nu ulanda. 24 Ezekeli wataya icimanyililo kuli mwemwe. Vino watacita avino namwe mulacita. Lino cii cilacitika alino mulamanya ukuti nene Yeova Umwene wa Papelapela.’”’”
25 “Naawe we mwana wa muntu, uwanda uno ndonona incende iikalenga yayuvwa acingililwe, kuli kuti icintu cisuma icikayalenga ukuya ni nsansa, cino yatemwa nupya cino imyenzo yao ikalonda kumwi na ana yao aonsi na akazyana, 26 aalapusuka aliza kuli wewe nu kukunena ivilacitika. 27 Pa wanda uuwa ulalanda na atiyapusuka nupya utalatwalilila ukuya mya. Ulaya icimanyililo kuli aliyo, nayo yalamanya ukuti nene Yeova.”