Yakapingula
3 Zii aali nko zino Yeova walesile ukuti zitwalilile ukwikala umu mpanga pakuti zyaezya Aina Izlaeli yonsi aatalwileko inkondo na Ina Kenani 2 (cali vivyo pakuti inkulo zya Ina Izlaeli izyali nu kukonkapo nazyo zice zilweko inkondo): 3 ya mwene 5 aa Ina Filisti, Aina Kenani yonsi, Aina Sidoni, na Ina Hivi aikalanga umu ncende ya Mwamba wa Lebanoni kufuma uku Mwamba wa Baali-helimoni ukufika uku Lebo-hamati.* 4 Yezyanga Ina Izlaeli pakuti cimanyikwe nga yaali nu kutwalilila ukuvwila masunde yano Yeova wapeezile uku vikolwe vyao ukupitila muli Mose. 5 Fwandi Aina Izlaeli yatwalilile ukwikala umu Ina Kenani, Aina Hiti, Aina Amoli, Aina Pelizi, Aina Hivi na Ina Yebusi. 6 Yatwalizyanyanga nayo, nupya yatandike ukuombela ya leza yao.
7 Fwandi Aina Izlaeli yasosizye Yeova nupya iliile Yeova Leza wao nu kutandika ukupepa ya Baali ni ncesi.* 8 Lyene Yeova wasokiile sana Aina Izlaeli, nupya wayakazizye uku mwene Kusyani-lisyataimu wa ku Mesopotamya. Aina Izlaeli yaombiile Kusyani-lisyataimu pa myaka 8. 9 Lino Aina Izlaeli yalenzile ukuti Yeova ayazwe, Yeova wayasontiile uwa kuyapususya, Otinieli mwana Kenazi, umuto wakwe Kalebu. 10 Umupasi wakwe Yeova wizile pali aliwe, nupya wizile aya a kapingula umu Izlaeli. Lino waile uku nkondo, Yeova wapeezile umwene Kusyani-lisyataimu wa ku Mesopotamya mu minwe yakwe, nupya wacimvizye Kusyani-lisyataimu. 11 Fwandi umu mpanga mwizile imuya umutende pa myaka 40. Lyene Otinieli mwana Kenazi wafwile.
12 Nupya kwene Aina Izlaeli yasosizye Yeova. Fwandi Yeova walesile ukuti umwene Egiloni uwa Ina Moabu acimvye Aina Izlaeli, pano yacisile iviipe kuli Yeova. 13 Nupya walesile nu kuti Aina Amoni na Ina Amaleki yayazanze. Yazanzile Aina Izlaeli nu kupoka umusumba wa tuncindu. 14 Aina Izlaeli yaombiile umwene Egiloni uwa ku Moabu pa myaka 18. 15 Lyene Aina Izlaeli yalenzile ukuti Yeova ayazwe, fwandi Yeova wayasontiile uwa kuyapususya, Eudi mwana Gela, uwa mu mutundu wakwe Benjamini uwaomvyanga ikasa lyakwe cimani. Lino papisile insita, Aina Izlaeli yamutumile kuti atwale umusangulo uku mwene Egiloni uwa ku Moabu. 16 Eudi wasuzile ulupanga ulunyolwe konsi koili ulwatalimfile umupiipi na masentimita 38,* lyene walufisile umu cakuzwala cakwe ku lupamba lwa kwi kulu lya kwi lunji. 17 Lyene watwazile umusangulo kuli Egiloni umwene wa ku Moabu. Egiloni wali umwine sana.
18 Lino Eudi wamazile ukupeela imisangulo, walesile ukuti antu asenzile imisangulo yaapita. 19 Lelo lino wafisile pano iimbanga mawe uku Giligali, waswilile nu kuyalanda ati: “Mwene, inkukwatila ilyasi lya nkama.” Fwandi umwene walanzile ati: “Tale tusyini swenga!” Lino aomvi yakwe yonsi yuvwile vivyo, yafumilepo. 20 Lyene Eudi waile uku mwene Egiloni lino watenzi wenga umu muputule wakwe uwa papela uwali uzuke. Lyene walanzile ati: “Inkukwatila ilyasi ukufuma kuli Leza.” Fwandi umwene wakatwike pa cilimba cakwe ica wene. 21 Lyene Eudi wasomwile ulupanga ulwali pa lupamba lwakwe ulwa kwi lunji ukuomvya ikasa lyakwe cimani, nupya watosile Egiloni umu lunda. 22 Lupanga lwingile lonsi kumwi ni cilemelo, nupya mafuta yacilike pano lwingilile pa mulandu wakuti atalufumizye, nupya usaali wafumile. 23 Eudi wafumiile api windo, wayazile ivisaasa vya mu muputule wa papela asya wamufungilila. 24 Lino wapisile, aomvi yaswilile, nupya yazanyile ivisaasa vya pa milyango ya mu muputule wa papela ivifunge. Fwandi yatiile: “Afwile akuyazwilizya umu muputule wa mukasi uzuke.” 25 Yatwalilile ukuloleela iyasuka iyasakamikwa, lelo lino yaweni ukuti asikuyula ivisaasa vya mu muputule wa papela yatozile maki nu kuyula, nupya yaweni umusambazi wao atapona pansi ala atafwa!
26 Eudi utwike ala yacili yakuwayawaya, nupya waile apita pano iimbanga mawe nu kuya uku Seila. 27 Lino wafisile, walizizye ipenga mu ncende ya myamba yakwe Efulemu; nupya Aina Izlaeli yatentemwike umu ncende ya myamba ala akuyatungulula. 28 Lyene wayanenyile ati: “Nkonkini, pano Yeova watapeela alwani inu, kuli kuti Aina Moabu mu minwe inu.” Fwandi yamukonsile nu kuyapoka incende apa kulambila Uluzi Lwa Yodani pakuti yacilikile Aina Moabu, nupya yataazumilizye ali wensi ukulamba uluzi. 29 Pa nsita kwene iiya yakomile aonsi Aina Moabu mupiipi na 10,000, yonsi yaali aamaka sana; kusi nanti awenga uutwike. 30 Fwandi pa wanda kwene uuwa Aina Izlaeli yacimvizye Aina Moabu; nupya umu mpanga mwali umutende pa myaka 80.
31 Pali Eudi palondiile Syamuga umwana wakwe Anati uwakomile aonsi Aina Filisti 600 kuomvya ica kutunkwilako ing’ombe; nawe kwene wapuswisye Aina Izlaeli.