2 Milandu
30 Hezekiya watumile amazwi uku Ina Izlaeli yonsi nu ku yantu ya mu Yuda, nupya walemvile na makalata ku ya mu mutundu wakwe Efulemu na wakwe Manase, kuti yaye uku ng’anda yakwe Yeova umu Yelusalemu ku kuzevya Ucilo kuli Yeova Leza wa Ina Izlaeli. 2 Lelo umwene, ya cilolo, na antu yonsi amu Yelusalemu, yasoolwilepo ukuzevya Ucilo umu mwezi wakwe ciili, 3 pa mulandu wakuti yataazevizye Ucilo pa nsita ino yalinzile ukuzevyezyapo pano ya simapepo aingi yataisangulwile nupya antu yataakolongine umu Yelusalemu. 4 Mapekanyo yaa yalenzile umwene na antu ukuvwa ningo. 5 Fwandi yamanyisizye umu mpanga yonsi iya Izlaeli, kutandikila uku Belisyeba kufika uku Dani, ukuti antu yalinzile ukuya umu kuzevya Ucilo kuli Yeova Leza wa Ina Izlaeli uku Yelusalemu, pano yataatazile yazevezye pamwi ukulingana na vino calemvilwe umu masunde.
6 Lyene yano yatumile yaile umu mpanga ya Izlaeli monsi nu mu mpanga ya Yuda ala yasenzile makalata aafumile uku mwene na kuli ya cilolo yakwe ukulingana na vino umwene walanzile ala yakuti: “Mwe Ina Izlaeli, welini kuli Yeova Leza wakwe Abulahamu, Leza wakwe Isaki, nupya Leza wakwe Izlaeli pakuti nawe awele kuli mwemuno mwapusuka kuli ya mwene ya ku Asilya. 7 Mutaya wa vikolwe vinu na ina inu aapondokile Yeova Leza wa vikolwe vyao na cico calenzile ukuti Leza ayafulule, nupya auvwile nu kulolako yazungwike wakwe vino namwe mukulola. 8 Mutakomya imyenzo wa vikolwe vinu. Uvwilini Yeova nu kwiza uku cikuulwa cakwe ica muzilo cino wasangulula manda pe, nupya mwaombela Yeova Leza winu pakuti ukali wakwe ufume pali mwemwe. 9 Pano nga mwawela kuli Yeova, aina inu na ana inu yalayuvwila uluse kuli yano yayasenda umu uzya nupya yalayazumilizya ukuwela uku mpanga yii, pano Yeova Leza winu wakwata icikuuku nu luse nupya atalamwilila nga mwaswilila kuli aliwe.”
10 Yano yatumile yapisile umu misumba yonsi iya mu mpanga yakwe Efulemu na yakwe Manase nu mu mpanga yakwe Zebuluni, lelo antu yayatumfyanga nu kuyaseka. 11 Lelo antu yamwi ukufuma umu mutundu wakwe Asyeli, wakwe Manase, na wakwe Zebuluni, yaicefizye nu kwiza uku Yelusalemu. 12 Nupya Leza wa cumi wapaazile antu ya mu mpanga ya Yuda nu kuyazwa ukulondela vino umwene na ya cilolo yalanzile ukulingana na vino Yeova walanzile.
13 Antu aingi sana yakolongine uku Yelusalemu ku kuzevya Umutebeto wa Mukate Uwaula Icitutumusi umu mwezi wakwe ciili. 14 Yakatwike nu kufumya maulambo aali umu Yelusalemu, nupya yafumizye maulambo yonsi aakocelapo ivinunkile nu kuyasumbila umu Mukonko wa Kiduloni. 15 Lyene pa wanda uwalenga 14 umu mwezi wakwe ciili, yakomile ilambo lya pa wanda wa Ucilo. Ya simapepo na Ina Levi yuvwile insonyi, fwandi yaisangulwile nu kuleta malambo ya koca uku ng’anda yakwe Yeova. 16 Imilile umu ncende zyao ukulingana na vino Isunde Lyakwe Mose umuntu wakwe Leza wa cumi lyalanzile; lyene ya simapepo yatozile uwazi uwafumile uku Ina Levi nu kuusansa pa ulambo. 17 Kwali antu aingi aataisangulwile nupya Aina Levi ali yano yakomanga malambo ya pa wanda wa Ucilo aa yantu yonsi aataisangulwile, pakuti yayasangulule pa nkoleelo yakwe Yeova. 18 Antu aingi aataisangulwile yafumile umu mutundu wakwe Efulemu, Manase, Isakali, na Zebuluni, lelo yaliile icakulya ca pa wanda wa Ucilo ukupusana ni vyalembwa. Nomba Hezekiya wayapepiile ati: “Si Yeova uwaya umusuma aeleele 19 muntu wensi uwataipeelesya ukuombela Yeova Leza wa cumi, Leza wa vikolwe vyakwe nu mwenzo onsi, nanti cakuti ataisangulwile ukulingana na masunde aakalanda pa kuisangulula.” 20 Yeova uvwile kuli Hezekiya nupya welezile antu.
21 Aina Izlaeli aali umu Yelusalemu yazevizye Umutebeto wa Mukate Uwaula Icitutumusi pa manda 7 ala yali sana ni nsansa, nupya Aina Levi na ya simapepo yalumbanyanga Yeova cila wanda, ala yakwiimba inyimbo zyakwe Yeova ukuomvya ivya kulizizyako. 22 Nupya Hezekiya walanzile nu kukomelezya Aina Levi yonsi aisile mano ku kuombela Yeova. Nupya yaliile pa manda yonsi 7 aa mutebeto ala yakupeela malambo ya mutende nu kutaizya Yeova Leza wa vikolwe vyao.
23 Lyene antu yonsi yazevizye umutebeto pa manda na yauze 7, nupya yacisile vivyo ala yali ni nsansa. 24 Umwene Hezekiya uwa ku Yuda wapekanyizizye antu ya cipambasi 1,000 ni mfwele 7,000, ya cilolo nayo yapekanyizizye antu ya cipambasi 1,000 ni mfwele 10,000; nupya ya simapepo aingi yaisangululanga. 25 Antu yonsi amu mpanga ya Yuda, ya simapepo, Aina Levi, antu yonsi aafumile umu mpanga ya Izlaeli, na antu aku mpanga zyuze aafumile umu Izlaeli na aikalanga umu mpanga ya Yuda, yatwalilile ukusansamuka. 26 Nupya antu yasansamwike sana umu Yelusalemu, pano ukufuma umu manda yakwe Solomoni mwana Devedi umwene wa ku Izlaeli, ica musango uu citaatazile cicitike umu Yelusalemu. 27 Lyene ya simapepo Aina Levi imilile nu kupaala antu; nupya Leza uvwile mazwi yao, ni pepo lyao lyafisile ukwi yulu uku ncende ya muzilo kuno wikala.