Ezaya
7 Lyene umu manda yakwe Ahazi mwana Yotamu mwana Uziya umwene uwa ku Yuda, Lezini umwene uwa ku Silya na Peka mwana Lemaliya umwene uwa ku Izlaeli, yaile umu kulwisya umusumba wa Yelusalemu lelo ataauposile.* 2 Yamwi yanenyile amu ng’anda yakwe Devedi iyati: “Asilika Aina Silya yakuombela pamwi na asilika amu mutundu wakwe Efulemu.”
Lyene Ahazi na antu yakwe yatandike ukuzakaza, wakwe vino imiti ya mu mpanga ikatenkana nga kuli umuza.
3 Yeova wanenyile Ezaya ati: “Pitanga pamwi na Syeali-yasyubu umwanako, mukakomenkanye Ahazi umupiipi ni ca kusungilamo manzi icaya papela, icayela umu nzila iyalungama kuno kawasya akaombela. 4 Ukamunene uti, ‘Teeka umwenzo. Utuvwa intete nupya utatoovoka pa mulandu na maumba yaa yaili aali wa visonsololwa ivikusuuka, kuli kuti pa mulandu nu ukali wakwe Lezini umwene wa ku Silya na mwana Lemaliya. 5 Aina Silya pamwi na amu mutundu wakwe Efulemu mwana Lemaliya iyakupangila iyati: 6 “Lekini tukalwisye impanga ya Yuda nu kuicimvya alino tuipoke, tusonte na mwana Tabeeli aliwe aiteeka.”
7 “‘Yeova Umwene wa Papelapela walanda wati:
“Yatalakwanisya,
Nupya vino yakulonda vitalacitika.
8 Pano Damasika aali musumba ukalamba uwa mu Silya,
Na Lezini aakatungulula Aina Damasika.
Mu myaka sile 65
Uluko lwa yantu amu mutundu wakwe Efulemu lulata ukuyako nupya lulalowa.
9 Samaliya aali musumba ukalamba mu mutundu wakwe Efulemu,
Nupya mwana Lemaliya aakatungulula Aina Samaliya.
Ndi cakuti utakweti utailo ukome,
Uwene wako utalakoma.”’”
10 Yeova watwalilile ukunena Ahazi ati: 11 “Lenga icimanyililo kuli Yeova Leza wako; cingaya icizike wi Lindi* nanti icitali wa mwi yulu.” 12 Lelo Ahazi walanzile ati: “Nsikulenga icimanyililo nanti ukwezya Yeova.”
13 Lyene Ezaya walanzile ati: “Uvwini mwe ya mu ng’anda yakwe Devedi. Uzye citakumana vino mukasosya antu? Suka musosye na Leza kwene? 14 Fwandi Yeova amamupeela icimanyililo icakuti: Umukazyana alakwata inda nu kuvyala umwana umonsi, nupya alamutemela ni zina ilyakuti Emanweli.* 15 Pa nsita ino alamanya ukukana iviipe nu kusoolola ivisuma alaya ale watandika mpiti ukulya bata nu uci. 16 Pano lino umulumendo atatala wamanya ukukana iviipe nu kusoolola ivisuma, impanga yakwe ya mwene yaili yano ukatiina ilasyala umwaula antu. 17 Yeova alaleta intazi pali wewe, pa yantu yako alino na pa yantu ya mu ng’anda yakwe tata wako iitatala yayako ukufuma pano Efulemu wafumiile muli Yuda, pano alamutumila umwene wa ku Asilya.
18 “Mu wanda uuwa Yeova alakuwa umuluvi nu kwama insazi umu nguzi zya kutali izyafuma umu luzi lwa Naelo alino ni nzimu zya mu mpanga ya Ina Asilya, 19 navyo viliza nu kwikala umu mikonko iyakwata amanzi, mu milale iya mu mawe, mu vimiti ivya myunga vyonsi ivya mu mpanga, nu mu ncende muno inyama zikamwela amanzi.
20 “Mu wanda uuwa, Yeova alaomvya akaleza akazime ukufuma ku ncende ya Luzi,* kuli kuti umwene wa ku Asilya nu kupela inyele zyao, upipi kumwi ni vilezu kwene.
21 “Mu wanda uuwa umuntu alapususya ing’ombe yonga ni mfwele ziili. 22 Nupya pa mulandu wakuti umukaka ulavula, alaalya bata, pano yonsi aalasyala umu mpanga yalaalya bata nu uci.
23 “Pa wanda uuwa, ponsi apaali imiti ya myangazi 1000 iingakalwa pa mpiya zyakwe siuva 1000 palaya sile ivimiti vya myunga ni vikoona. 24 Antu yalayako na maulapwa ni nceto pano umu mpanga yonsi mulaya ivimiti vya myunga ni vikoona. 25 Nupya imyamba yonsi ino mwazifyanga ukuomvya amase, mutalaayako pa mulandu nu kutiina imyunga ni vikoona, ya cipambasi yalaaliilamo, ni mfwele zilaalyatolamo.”