Ezekeli
7 Nupya kwene Yeova wanenyile ati: 2 “We mwana wa muntu, Yeova Umwene wa Papelapela walanda ukulozya uku mpanga ya Izlaeli wati: ‘Impela! Impela yatiiza pa mpanga yonsi. 3 Impela yatiiza pali mwemwe, nupya ndaleta ukali wane pali mwemwe, ndamupingula ukulingana ni miyele inu nu kulingana ni vicitwa vinu vyonsi vya winyi. 4 Ntalamuvwila uluse; nanti ukuya ni cikuuku kuli mwemwe, pano ndamufulula pa mulandu na vino mukacita, nupya mulacula pa mulandu ni vicitwa vinu vya winyi. Lyene mulamanya ukuti nene Yeova.’
5 “Yeova Umwene wa Papelapela walanda wati: ‘Lolini! Intazi iipisye nupya itaatala yayako ikwiza. 6 Impela ikwiza; impela iliza; iliiza pali mwemwe umu kupumikizya. Ee ikwiza. 7 Mweikala mpanga impela inu yatiiza, insita ikwiza, uwanda iupalama. Mu myamba muli cimvulunganya nupya musi nsansa.
8 “‘Likwene sile ndaleta ukali wane pali mwemwe ala indi sana ni cipyu, nupya ndamupingula ukulingana ni miyele inu nu kulingana ni vicitwa vinu vyonsi vya winyi. 9 Ntalamuvwila uluse; nanti ukuya ni cikuuku kuli mwemwe. Ndamufulula pa mulandu na vino mukacita nupya mulacula pa mulandu ni vicitwa vinu ivya winyi. Lyene mulamanya ukuti ne Yeova nene nkumufulula.
10 “‘Lolini, uwanda ukwiza! Impela inu yatiiza; intuwa yatiwalula nupya cilumba icileemba. 11 Unkalwe iuya intuwa ya kufulwilako ya kacita ya viipe. Yatalaipususya nanti sile ivyuma vyao nu ucindami wao navyo kwene vitalayapususya. 12 Insita iliza nu wanda ulafika. Aakukala atazanga, na aakukazya ataloosya, pano ukali ukwiza pa yantu yonsi. 13 Aakukazya nanti wapusuka atalaswilila kuli vino wakazizye, pano ivyali mu cilolwa viliza pa yantu yonsi. Kusi alapusuka nupya kusi kacita wa viipe aalatwalilila ukuya nu umi.
14 “‘Iyalizya ipenga nupya yonsi iyaipekanya, lelo kusi ali wensi akuya umu ulwi, pano ukali wane uli pa yantu yonsi. 15 Kunzi ya musumba kuli ulupanga, mukasi namo muli cikuko ni cipowe. Yonsi aali mu mpanga yalafwa uku lupanga, nupya aali umu musumba yalafwa ku cipowe nu ku cikuko. 16 Aalapusuka yalaya uku myamba, nupya yalalila pa membu zyao wakwe vino inkunda zya mu mikonko zikalila. 17 Yonsi yalasila maka umu makasa, nupya yonsi yalaakonkoloka manzi umu makokola.* 18 Yalazwala ivyakuzwala vya kulangilamo ulanda, nupya yalaya ni ntete. Umuntu wensi alazewana nupya wensi alaya ni pala.*
19 “‘Yalasumba siuva wao umu miseo, nupya goldi wao yalaamulola wa cintu ca winyi. Siuva wao na goldi vitalayapususya umu wanda wa ukali wakwe Yeova. Yatalikuta nanti ukuzuuzya inda zyao, pano siuva na goldi vyayaleenga ukuyembuka. 20 Yayuvwilanga mu viyembelo vyao, nupya yapangangamo* ivilubi vyao ivya winyi. Ali mulandu uno ndavileengela ukuya ivintu vya winyi kuli aliyo. 21 Ndaleka ukuti antu ya ku mpanga zyuze yavipoke na antu aipe yavisende, nupya yalavikowezya.
22 “‘Ndafumya icinso cane pali aliyo nupya yalakowezya incende yane ifisame,* nupya vipondo vilingila nu kukowezya incende iiyo.
23 “‘Pangini maceni ya yafungwa, pano umu mpanga imuzuula uwazi wa yantu aafyenzilwe nupya umu musumba muli sana unkalwe. 24 Ndaleta antu aipisye amu nko, nayo yalapoka mang’anda yao, nupya ndamala icilumba ca yantu ya maka ni ncende zyao izya muzilo zilakoweziwa. 25 Lino yalaya nu ulanda yalalonda umutende, lelo utalaloleka. 26 Intazi zilaiza umu kukonkana, na malyasi aipe yalavula, nupya antu yaluzya kasesema ndi cakuti kuli cilolwa cino watalola, lelo ya simapepo yatalaasambilizya masunde na akalamba yatalaapanda mano. 27 Umwene alaloosya ni ntunguluzi ilaya nu landa, nupya antu ya mu mpanga yalaya ni ntete. Ndacita kuli aliyo kulingana ni vicitwa vyao nupya ndayapingula wakwe vino yakapingula. Lyene yalamanya ukuti nene Yeova.’”