Ezekeli
8 Mu mwaka uwalenga 6, mu mwezi uwalenga 6, pa wanda uwalenga 5, lino natenzi umu ng’anda yane pamwi na akalamba ya mu Yuda, ikasa lyakwe Yeova Umwene wa Papelapela lyandemile. 2 Naweni umuntu uwalolekanga wa moto, kufuma umu musana kwiza pansi walolekanga wa moto; nupya ukufuma umu musana kuya papela waengesanga wa cela.* 3 Lyene wakonzolwile cimwi icalolekanga wi kasa nu kunyemwila uku nyele, nupya umupasi wansenzile umupela iuntwala uku Yelusalemu mu vilolwa vyakwe Leza pa mpongolo ya mukasi iyalozya uku katutu apaaimi cilubi icimililangako uzuwa. 4 Nupya paapa kwene apaali ululumbi lwakwe Leza wakwe Izlaeli ulwali wa cilolwa cino naweni umu nyika.
5 Lyene wanenyile ati: “We mwana wa muntu, lola uku katutu.” Nani nacisile vivyo kwene nupya uku katutu ka mpongolo ya kuyila uku ulambo kwali cilubi icimililangako uzuwa. 6 Nupya wanenyile ati: We mwana wa muntu, uzye walola ivya winyi viipe sana vino amu ng’anda yakwe Izlaeli yakucita paa, ivintu ivikalenga inje ukutali sana ni ncende yane iya muzilo? Lelo umalola ivya winyi iviipisye ivicizile pali vii.
7 Lyene wantwazile pa kwingilila mu musolo, nupya naweni cipongo mu ciumba. 8 Wanenyile ati: “We mwana wa muntu, kuzya icipongo icili uku ciumba.” Fwandi nakuzizye cipongo, nupya naweni inzila. 9 Lyene wanenyile ati: “Ingila ukalole ivya winyi viipe vino yakucita.” 10 Nani ningile nu kulola ivilubi vya vintu ivikasela ivya misango yonsi ni vilyanyi vya winyi ni vilubi vyonsi vya winyi,* ivya yantu ya mu ng’anda yakwe Izlaeli, vyali ivileenge ku ciumba consi. 11 Nupya akalamba 70 amu ng’anda yakwe Izlaeli imiliile pa nkoleelo ya vintu vivyo, pamwi na Yazaniya mwana Syafani. Cila muntu walemile ica kocelapo ivinunkile ala ni cunsi ca vintu vinunkile cikuya umupela. 12 Lyene wanenyile ati: “We mwana wa muntu, uzye walola vino akalamba ya mu ng’anda yakwe Izlaeli yakucita umu mfinzi? Cila muntu ali umu muputule wa mukasi umwaya ivilubi vyakwe. Pano yakati, ‘Yeova asitulola. Yeova wasya impanga.’”
13 Nupya watwalilile ukunena ati: “Umalola ivya winyi na vyuze iviipisye ukucila napo.” 14 Fwandi wantwazile uku mpongolo ya ku katutu ka ng’anda yakwe Yeova, nupya kuuku kwene akuno naweni anaci iikala yakuloosya Tamuzi leza wao.
15 Nupya kwene wanenyile ati: “We mwana wa muntu, uzye walola ivikucitika? Umalola ivya winyi viipisye sana kucila na pali vii.” 16 Fwandi wantwazile umu musolo wa mukasi uwa mu ng’anda yakwe Yeova, lyene pa mulyango wi tempele lyakwe Yeova pakasi ka muputule wa kwingilila umwi tempele nu ulambo, paali aonsi 25 aalozizye matundu yao ukwi tempele lyakwe Yeova ni vinso vyao ku ufumondaka, ala yakupepa ilanzi.
17 Wanenyile ati: “We mwana wa muntu uzye watulola ivikucitika? Uzye u mulandu unono vino amu ng’anda yakwe Yuda yakucita ivintu vii vya winyi, kulenga umu mpanga muye unkalwe nu kutwalilila ukunsosya? Yakwingizya umusambo* mu mpuno yane. 18 Fwandi ndaya ni cipyu pali aliyo, ntalayuvwila uluse nanti ukuya ni cikuuku kuli aliyo. Nanti yangalilila uli kuli nene ntaluvwa.”