Ezekeli
6 Nupya kwene Yeova wanenyile ati: 2 “We mwana wa muntu, lozya icinso cako uku myamba iya ku Izlaeli nupya useseme pali vino vilacitikila imyamba iiyo. 3 Uyinene uti, ‘Mwe myamba iya mu Izlaeli uvwini mazwi yakwe Yeova Umwene Uwa Papelapela: Yeova Umwene Uwa Papelapela wanena imyamba, tumyamba, inguzi, ni mikonko wati: “Ndaleta ulupanga pali mwemwe, nupya ndonona incende zinu zya kupepelapo. 4 Maulambo inu yalononwa na vino mukaocelapo ivinunkile vilatamolwa nupya ndasumbila antu inu aalakomwa pa nkoleelo ya vilubi vinu ivya winyi.* 5 Ndasumbila ivitumbi vya Ina Izlaeli pa nkoleelo ya vilubi vyao ivya winyi, nupya ndasalanganya mafupa inu kuzinguluka maulambo yao yonsi. 6 Mu ncende zyonsi zino mukaikalamo, misumba iyayamo ilononwa, ni ncende izya kupepelapo zilononwa nu kusyala apaula icili consi. Maulambo inu yalononwa nu kuvungolwa, ivilubi vinu ivya winyi vilononwa, vino mukaocelapo ivinunkile vilaputolwa ni vintu vino mwapanga vilafumiziwapo. 7 Aingi yalakomwa muli mwemwe, nupya mulamanya ukuti nene Yeova.
8 “‘“Lelo ndasyako yamwi, pano yamwi muli mwemwe yalapusuka uku lupanga umu nko lino mulasalanganila umu mpanga yonsi. 9 Nupya aalapusuka yalanjiusya ala yali umu nko izyayasenda umu uzya. Yaliusya ukuti nasosile pali vino yataali ni cisinka kuli nene na vino yalondesyanga ukupepa ivilubi vyao ivya winyi. Yaluvwa insonyi nu uyi pa viipe vyonsi ni vintu vya winyi vino yaacita. 10 Yalamanya ukuti nene Yeova nu kuti vino natiile ndaleta intazi pali aliyo vitaali ivya ufi.”’
11 “Yeova Umwene Uwa Papelapela walanda wati: ‘Toota nu kuponda pansi nupya loosya pa viipe vyonsi na pa vintu ivya winyi vino amu ng’anda yakwe Izlaeli yaacita pano yalakomwa uku lupanga, ku cipowe, nu ku cikuko. 12 Aali ukutali alafwa uku cikuko, aali umupiipi alafwa uku lupanga, na wensi uwapusuka kuli vii nu kutwalilila ukuya nu umi, alafwa uku cipowe, nupya ndaleta ukali pali aliyo. 13 Nupya mulamanya ukuti nene Yeova lino ivitumbi vya yantu yao aalakomwa vilaya pamwi ni vilubi vyao ivya winyi, kuzinguluka maulambo yao yonsi pa tumyamba tonsi ututumpuke, pa myamba yonsi, mwisika lya miti yonsi iyembe nu mwisika lya misambo ya miti yonsi ikulu muno yapeelelanga ivya upe ivinunkile pakuti yazanzye ivilubi vyao ivya winyi. 14 Ndakonzolwela ikasa lyane pali aliyo nu kuleka impanga yao ukusyala umwaula icili consi ni ncende zyao zyonsi zino yakaikalamo zilasyala umwaula icili consi ukucila na vino ulwanga ulwaya umupiipi nu ku Dibula lwaya. Nupya yalamanya ukuti nene Yeova.’”