Ezekeli
11 Nupya umupasi wanyemwile nu kuntwala ku mpongolo ya pa ng’anda yakwe Yeova iyalozya uku ufumondaka. Kuuku kwene akuno naweni aonsi 25 nupya pali aliyo paali na Yazaniya mwana Azuli na Pelatiya mwana Benaya, kuli kuti ya cilolo ya yantu. 2 Lyene Leza wanenyile ati: “We mwana wa muntu yaa ali yonsi aakupanga ukucita iviipe nu kupanda mano aipe mu musumba uu. 3 Yakulanda yakuti, ‘Uzye yii asi insita ya kukuula mang’anda? Umusumba uli wa mpoto ya kwelekela, naswe tuli wa nyama.’
4 “Fwandi we mwana wa muntu sesema. Yasesemele ivilayacitikila.”
5 Lyene umupasi wakwe Yeova wizile pali nene, nupya Leza wanenyile ati: “Landa uti, ‘Yeova walanda wati: “Mwe ya mu ng’anda yakwe Izlaeli, vino imulanda ivya cumi, nupya imanya vino mukwelenganya. 6 Mwalenga antu aingi umu musumba uu ukufwa, nupya mwazuuzya ivitumbi umu miseo.”’” 7 “Fwandi Yeova Umwene wa Papelapela walanda wati: ‘Vitumbi vino mwasalanganya umu musumba ali nyama, nu musumba ali mpoto. Lelo mwemo mulafumiziwamo.’”
8 Yeova Umwene wa Papelapela walanda wati: “Ulupanga luno mukaopa aluno ndaleta pali mwemwe. 9 Ndamufumya umu musumba nu kumupeela uku yantu ya ku mpanga zyuze nupya ndamupingula. 10 Mulakomwa uku lupanga nupya ndamupingwila pa mupaka wa mu Izlaeli, alino mulamanya ukuti nene Yeova. 11 Musumba utalaya impoto ya kumwelekelamo, nupya mutalaya inyama ya kwelekela umu mpoto iiyo; ndamupingwila pa mupaka wa mu Izlaeli, 12 nupya mulamanya ukuti nene Yeova. Pano mutalondelanga masunde yane nu upinguzi wane, lelo mwacitanga wa yantu ya mu nko izyamuzinguluka.”
13 Lino nasesiime sile, Pelatiya mwana Benaya wafwile nupya naponyile pansi imfupama nu kulila ni izwi likalamba inti: “Iyee we Yeova Mwene wa Papelapela! Uzye umakoma na Ina Izlaeli yonsi kwene asyala?”
14 Nupya kwene Yeova wanenyile ati: 15 “We mwana wa muntu, aina yako akwata insambu zya kukala impanga cipya cipya pamwi na amu ng’anda yakwe Izlaeli yonsi yayanena ku yantu ya mu Yelusalemu ukuti, ‘Talukiini kuli Yeova. Impanga iitu; yapeelwa kuli sweswe.’ 16 Fwandi landa uti, ‘Yeova Umwene wa Papelapela walanda wati: “Nanti cakuti nayazingila mu nko izya kutali nupya nayasalanganyizizya umu mpanga zyuze, pa nsita inono ndaya incende yao iya muzilo ku mpanga zino yayako.”’
17 “Landa uti, ‘Yeova Umwene wa Papelapela walanda wati: “Ndamukolonganika nu kumufumya mu yantu ya mu mpanga zino mwasalanganilamo, nupya ndamupeela impanga ya Izlaeli. 18 Nupya yalawela nu kwizafumyamo ivintu vyonsi ivikowele ni vya winyi. 19 Ndayalenga ukuya alemane, nupya ndayapeela melenganyo apya; ndafumya umwenzo uwaya wi we muli aliyo nu kuyapeela umwenzo utonte, 20 pakuti yace yalondela masunde yane nu kuvwila upinguzi wane. Lyene yalaya antu yane, nani ndaya Leza wao.”’
21 “‘“Lelo yayo alatwalilila ukucita ivikowele ni vya winyi ndayafulula ukulingana ni vicitwa vyao,” avino Yeova Umwene wa Papelapela walanda.’”
22 Lyene ya kelubi yakatwisye maapa yao, na mateelo yaali umupiipi nayo, nupya ululumbi lwakwe Leza wakwe Izlaeli lwali papela yao. 23 Lyene ululumbi lwakwe Yeova lwafumile umu musumba nu kuya pa mwamba uku ufumondaka wa musumba. 24 Umupasi wakwe Leza wansenzile umu cilolwa nu kuntwala ku yantu aasenzilwe umu uzya ku Kalideya. Lyene icilolwa cino naweni casizile. 25 Nupya natandike ukunena antu aasenzilwe umu uzya ivintu vyonsi vino Yeova wandanzile.