Ezekeli
29 Mu mwaka uwalenga 10, mu mwezi uwalenga 10, pa wanda uwalenga 12, Yeova wanenyile ati: 2 “We mwana wa muntu lozya icinso cako kuli Falao umwene wa ku Ijipti, nupya useseme pali aliwe na pali vino vilacitikila impanga ya Ijipti yonsi. 3 Ulande uti: ‘Yeova Umwene wa Papelapela walanda wati:
“Inja umulwani wako we Falao umwene wa ku Ijipti,
We cilyanyi cikalamba ica mu manzi icaya umu mifoolo iyafuma umu luzi lwa Naelo,
Wemuno ukalanda uti, ‘Uluzi Lwa Naelo u lwane.
Nene nalupanga.’
4 Lelo ndakoweka maswelo umu nzekete zyako nu kulenga inswi zya mu luzi lwako ulwa Naelo ukulematila uku mamba yako.
Ndakufumya umu Luzi Lwa Naelo pamwi ni nswi zyonsi izilalematila uku mamba yako.
5 Ndakusya umu lwanga, wemo pamwi ni nswi zyonsi izya mu Luzi Lwa Naelo.
Ulaponela apa ncende apataaya nanti acimwi nupya kusi alakusola nu kukuziika.
Ndalenga uye icakulya ku vilyanyi vya mu mpanga nu ku vyunyi vya mu lwelele,
6 Lyene Aina Ijipti yonsi yalamanya ukuti nene Yeova,
Pano yatiile ukutungilila amu ng’anda yakwe Izlaeli, yaali sile wi tete ilitonte,
7 Lino yakulemile nu kusintilizya pali wewe wakontwike,
Nupya walenzile iviye vyao ukuvunika.
Lino yasintilile pali wewe wakontwike,
Nupya walenzile makulu yao ukuteembooka.”
8 “‘Fwandi Yeova Umwene wa Papelapela walanda wati: “Nkuleta ulupanga pali wewe, nupya ndakoma antu yako ni nyama. 9 Impanga ya Ijipti ilasyala umwaula icili consi nupya iyononeke; lyene yalamanya ukuti nene Yeova, pano walanda wati, ‘Uluzi Lwa Naelo u lwane, nene nalupanzile.’ 10 Fwandi nkukufulula pamwi nu Luzi Lwa Naelo, nupya ndalenga impanga ya Ijipti ukononeka nu kuuma, ilasyala umwaula icili consi kufuma uku Migidoli kufika uku Siyene mpaka nu ku mupaka wa ku Etiopia. 11 Kusi umuntu nanti viteekwa ivilaapitamo nupya kusi aalikalamo pa myaka 40. 12 Ndalenga impanga ya Ijipti ukusyala umwaula icili consi kucila impanga zyuze, nupya imisumba iyayamo ilasyala umwaula icili consi ukucila imisumba yuze pa myaka 40; nupya ndasalanganyizizya Aina Ijipti umu nko nu mu mpanga zyuze.”
13 “‘Yeova Umwene wa Papelapela walanda wati: “Pa cisila ca myaka 40 ndawezya Aina Ijipti kufuma umu yantu yano yasalanganilamo; 14 Aina Ijipti aasendwa umu uzya ndayawezya uku mpanga yao uku Patulosi nupya uwene wao utalakwata maka. 15 Ijipti alaya umunono sana ukucila mawene yauze nupya atalatala atungululepo inko zyuze, ndalenga ukuti yaye aanono sana icakuti yatanga yacimvye inko zyuze. 16 Amu ng’anda yakwe Izlaeli yatalatala yamutaailepo nupya, lelo ivilamucitikila vilaayiusya sile vino yaluvyanyizye pa kulenga uwazwilizyo kuli aliwe, nupya yalamanya ukuti nene Yeova Umwene wa Papelapela.”’”
17 Lyene umu mwaka uwalenga 27, mu mwezi wa kutandikilako, pa wanda wa kutandikilapo, Yeova wanenyile ati: 18 “We mwana wa muntu, Nebukadineza umwene wa ku Babiloni walenzile asilika yakwe ukuombesya sana apa kulwisya Tuli. Yonsi yasyazile sile na mapala, ni viye vyao vyakuzulwike. Lelo wene na asilika yakwe yatapokelile icilambu pali vino yaombisye pa kulwisya Tuli.
19 “Fwandi Yeova Umwene wa Papelapela walanda wati, ‘Nkupeela impanga ya Ijipti kuli Nebukadineza umwene wa Babiloni, nawe alasenda ivyuma ni vintu ivyayamo; nupya vivyo kwene ivilaya amalipilo ya yasilika yakwe.’
20 “‘Pa kumulipila vino waombisye pa kulwisya Tuli ndamupeela impanga ya Ijipti pali vino wambombile,’ avino Yeova Umwene wa Papelapela walanda.
21 “Mu wanda uuwa ndalenga ulupembe ukumela umu ya mu ng’anda yakwe Izlaeli,* nupya ndakupeela isyuko lya kulanda nayo; lyene yalamanya ukuti nene Yeova.”