Ezekeli
44 Lyene wambwezizye ukuomvya inzila ya ku mpongolo ya kunzi iya ku ncende ya muzilo iyalozizye uku ufumondaka, nupya yaali iiyalwe. 2 Yeova lyene wanenyile ati: “Impongolo yii ilatwalilila ukuya iiyalwe. Italatala iyulwe nupya kusi muntu aalingililapo; pano Yeova Leza wakwe Izlaeli wataingililapo, fwandi ilinzile ukutwalilila ukuya iiyalwe. 3 Lelo intunguluzi ilikala apa mpongolo yii nu kuliila umukate pa nkoleelo yakwe Yeova, pano yene i ntunguluzi. Ilingila ukuomvya kamuputule ka pa mpongolo nu kufuma ukuomvya kamuputule kwene kako.”
4 Lyene wanjingizizye pa mpongolo ya ku katutu antwala pa nkoleelo yi tempele. Lino natumpwile amanso naweni ukuti ululumbi lwakwe Yeova iluzuula umwi tempele lyakwe Yeova, fwandi nafupime pansi. 5 Lyene Yeova wanenyile ati: “We mwana wa muntu, ikako mano, ulolekesye nupya uuvwikisye vyonsi vino nkukunena pa masunde ya pi tempele lyakwe Yeova, uwikisye mano uku nzila zya kwingilila umwi tempele nu ku milyango yonsi iya kufumila uku ncende ya muzilo. 6 Ulinzile ukunena amu ng’anda yakwe Izlaeli ya cipondoka uti, ‘Yeova Umwene wa Papelapela walanda wati: “Imucilamo sile ukucita ivya winyi mwe ya mu ng’anda yakwe Izlaeli. 7 Nga mwaleta antu aafuma uku mpanga zyuze aataya ni cuvwila umu ncende yane iya muzilo, yakakowezya itempele lyane. Mukapeela ivyakulya, mafuta nu wazi, kuno ala mukutama upangano wane pa mulandu ni vya winyi vino mukacita. 8 Musisakamala ivintu vyane ivya muzilo lelo mwapeela yauze ukuomba imilimo ya mu ncende yane iya muzilo.”’
9 “‘Yeova Umwene wa Papelapela walanda wati: “Kusi umuntu aali wensi aakaikala umu Ina Izlaeli aataya ni cuvwila aalinzile ukwingila umu ncende yane iya muzilo.”’
10 “‘Lelo Aina Levi aatiile ukundondela lino Aina Izlaeli yampondokiile nu kulondela ivilubi vyao ivya winyi yalafululwa pali vino yacisile. 11 Yalaaombela umu ncende yane iya muzilo, kuli kuti ukwangalila impongolo zya pi tempele nu kuombela api tempele kwene. Yalaakoma malambo ya koca na malambo yauze aayantu nupya yalaaombela antu. 12 Pa mulandu wakuti yaombelanga antu apepanga ivilubi vya winyi nupya izile iyaya ica kupumikako nu kulenga amu ng’anda yakwe Izlaeli ukuyembuka ali mulandu uno nakatusizye ikasa lyane nu kulapa pali aliyo nupya yalafululwa pa kuluvyanya kwao,’ avino Yeova Umwene wa Papelapela walanda. 13 ‘Yatalatala yambombelepo nga ya simapepo nupya nanti ukulema uku vintu vyane ivya muzilo nanti ivya muzilo sana, nupya yalazewana pa mulandu ni vintu vya winyi vino yacisile. 14 Ndaleka ukuti yaomba imilimo ya pi tempele nu kusakamala vyonsi ivikacitikapo.’
15 “‘Lelo ya simapepo Aina Levi ya mwana Zadoki aaombelanga umu ncende yane iya muzilo lino Aina Izlaeli yampondokiile, yalaambombela nu kwimilila pa nkoleelo yane pakuti yampeele mafuta nu wazi,’ avino Yeova Umwene wa Papelapela walanda. 16 ‘Ali yano yalaingila umu ncende yane iya muzilo nupya aalaombela pali tebo wane, yalaambombela imilimo.
17 “‘Lino yakwingila umu mpongolo zya mu musolo wa mukasi yalinzile ukuzwala ivyakuzwala vya nsalu. Yatalinzile ukuzwala ivyakuzwala vya mavumbu lino yakuombela umu mpongolo zya mu musolo wa mukasi nanti umu ncende zya mukasi. 18 Yalinzile ukuzwala ivitambala vya nsalu uku mitwe na makaputula ya nsalu aakuvimba intungu. Yatalinzile ukuzwala icili consi icingalenga ukuti yakailwe. 19 Lino yatatala yaya uku musolo wa kunzi, kuli kuti umusolo muno antu yakuzanwa yalinzile ukuzuula ivyakuzwala vino iyakuombelamo nu kuvika umu miputule ya muzilo iya kuliilamo. Lyene yalinzile ukuzwala ivyakuzwala vyuze pakuti yatalenga antu ukuya amuzilo pa mulandu ni vyakuzwala vyao. 20 Yatalinzile ukupela inyele uku mitwe nanti ukuleka ukuti zitalimpe sana, yalinzile ukuzisentoola. 21 Ya simapepo yatalinzile ukumwa waini lino yakwingila umu musolo wa mukasi. 22 Yatalinzile ukutwala mukamfwilwa nanti umwanaci wino yaata; lelo yangatwala umwanaci nacisungu wa mu Izlaeli nanti mukamfwilwa wino iya waali asimapepo.’
23 “‘Yalinzile ukusambilizya antu pa upusano uwaya pa cintu ca muzilo ni cisi ca muzilo; nupya yalinzile ukuyasambilizya pa upusano uwaya pa cintu icikowele ni cisanguluke. 24 Yalinzile ukulapingula imilandu, yalinzile ukulapingula ukulingana na masunde yane. Yalinzile ukulasunga masunde yane aakalanda pa mitebeto yonsi nu kulola masabata yane ukuti amuzilo. 25 Yatalinzile ukupalama uku citumbi ca muntu aali wensi pano yangakowela. Lelo yangapalama uku citumbi cakwe ya isi, ya nyina, umwanao umonsi, umwanao umukazyana, kalume wao nanti kaci wao aatatwalwa. 26 Pa cisila icakuti simapepo wasangululwa, alinzile ukuloleela amanda 7 pakuti atandike ukuomba nupya. 27 Pa wanda uno wingila umu ncende ya muzilo umu musolo wa mukasi kuti aaombelemo, alinzile ukupeela ilambo lyakwe ilya pa luyembu,’ avino Yeova Umwene wa Papelapela walanda.
28 “‘Nupya icilaya ica upyanyi cao aeci: Nene indi ca upyanyi cao. Mutalinzile ukuyapeela impanga iili yonsi umu Izlaeli, pano nene indi ca upyanyi cao. 29 Aalaalya upe wa vyakulya, malambo ya pa luyembu na malambo ya pa mulandu nupya vyonsi ivya muzilo umu Izlaeli vilaya i vyao. 30 Ivizao vyonsi ivisuma sana ivyatandikilapo ukuca nu upe onsi uno mwapeela vilaya i vyakwe ya simapepo. Nupya mufwile ukupeela ya simapepo fulaulo umusuma uwafuma kuli vino mwatandikilapo ukuzombola. Cii cilalenga amu mang’anda inu yapaalwe. 31 Ya simapepo yatalinzile ukulya icunyi icili consi nanti inyama iyatiifwila nanti ukukomwa ni cilyanyi.’