Ezekeli

45 “‘Lino mukwankana impanga kuti iye ica upyanyi, mulinzile ukupeela impanga imwi pa mpanga iiyo kuli Yeova kuti iye iya muzilo. Ilinzile ukuya makilomita 13 umu utali umu wipi namo makilomita 5. Incende yii yonsi ilinzile ukuya iya muzilo. 2 Mukasi ka ncende iiyo mulaya incende iya muzilo iilingane monsi monsi, ilaya mamita 259 na afu umu utali na 259 na afu umu wipi, nupya umu mbali zyonsi mulaya incende iya kucemelamo iviteekwa ilaya mamita 26. 3 Mu ncende kwene yii iyatipimwa ulinzile ukupimamo makilomita 13 umu utali, umu wipi namo makilomita 5, lyene umukasi mulaya incende ya muzilo, kuli kuti incende ya muzilo sana. 4 Ilaya i mpanga ya muzilo yakwe ya simapepo aalaombela Yeova umu ncende ya muzilo. Amuno yalakuula mang’anda yao nupya ilaya incende ya muzilo.

5 “‘Aina Levi aakaombela api tempele yalapeelwa impanga iilaya makilomita 13 umu utali, mu wipi namo makilomita 5, nupya yalapeelwa imiputule ya kuliilamo 20.

6 “‘Incende iilaya iya musumba ilinzile ukuya makilomita 13 umu utali (kulingana ni ncende ya muzilo) nu mu wipi makilomita yaili na afu. Ilaya i ya Ina Izlaeli yonsi.

7 “‘Intunguluzi ilapeelwa impanga umu mbali zyoili izya ncende ya muzilo ni ncende ya musumba. Ilaya umupiipi ni ncende iya muzilo ni ncende apaya umusumba. Ilaya uku uwondaka nu ku ufumondaka. Ukulu wa mpanga iiyo ukufuma uku mupaka wa ku uwondaka ukufika uku mupaka wa ku ufumondaka ulalingana ni mpanga iyapeelwa kuli cila mutundu. 8 Ikwene iilaya impanga yakwe umu Izlaeli. Intunguluzi zyane zitalaacuzya antu yane nupya, zilapeela amu ng’anda yakwe Izlaeli impanga ukulingana ni mutundu yao.’

9 “Yeova Umwene wa Papelapela walanda wati: ‘Mwe ntunguluzi zya mu Izlaeli iimucilamo sile ukucita iviipe.’

“‘Tiini unkalwe nupya mutaacuzya antu, muye nu mulinganya nu ulungami. Tiini ukupoka antu yane impanga,’ avino Yeova Umwene wa Papelapela walanda. 10 ‘Mwaomvya ivya kupimilamo ivya cumi, kuli kuti ivya kupimilako ivintu ivyume ni vya manzi manzi. 11 Kulinzile ukuya icipimilo conga ica kupimilako ivintu ivyume ni ca kupimilako ivya manzi manzi. Ca kupimilako ivya manzi manzi cilinzile ukuya malita 22 ni ca kupimilako ivyuma malita 22. Homa* iilinzile ukuomviwa pa kupima. 12 Syekele* alinzile ukuya magela* 20. Nupya masyekele 20 ukwikapo na masyekele yauze 25 na masyekele yauze 15 yalapanga mane* wenga.’

13 “‘Pa makilogilamu 160 angaano muce mwapeelapo makilogilamu yatatu, na pa makilogilamu 130 yakwe baale muce mwapeelapo makilogilamu yaili. 14 Pa kupeela mafuta mulinzile ukuomvya icipimilo cino mukaomvya pa kupima ivya manzi manzi. Ca kupimilako ivya manzi manzi cilinzile ukwingizya malita 22, nupya ivya kupimilako ivya manzi manzi ivili 10 vingalingana na homa wenga. 15 Nupya ukufuma pa viteekwa vya mu Izlaeli, mulinzile ukupeela imfwele yonga pa mfwele 200. Vikwene ivilaya upe wa vyakulya, malambo ya koca, na malambo ya mutende pakuti antu yelelwe imembu,’ avino Yeova Umwene wa Papelapela walanda.

16 “‘Antu yonsi amu mpanga yalaapeela umusangulo uu uku ntunguluzi ya mu Izlaeli. 17 Lelo intunguluzi iilasakamala malambo yonsi aakoca, upe wa vyakulya, nu upe wa vyakumwa pa nsita ya mitebeto, pa myezi iipya, pa Masabata, na pa mitebeto yonsi ino amu ng’anda yakwe Izlaeli yalaakwata. Iliyo ilaapekanya ilambo lya pa luyembu, upe wa vyakulya, malambo ya koca, na malambo ya mutende pakuti amu ng’anda yakwe Izlaeli yelelwe.’

18 “Yeova Umwene wa Papelapela walanda wati: ‘Mu mwezi wa kutandikilako, pa wanda wa kutandikilako, ulinzile ukutola cipambasi umusuma nu kusangulula incende iya muzilo uku luyembu. 19 Simapepo alatola uwazi umwi ukufuma api lambo lya pa luyembu nu kupaka uku mafulemu ya kwi tempele uku makoona 4 aku ciputulwa cakwe ciili ca ulambo nu ku mafulemu ya pa mpongolo ya mu musolo wa mukasi. 20 Vikwene avino ulacita pa wanda uwalenga 7 umu mwezi pa mulandu nu muntu ali wensi uwayembuka ukwaula ukumanya; nupya mulinzile ukusangulula itempele uku luyembu.

21 “‘Mu mwezi uwa kutandikilako pa wanda uwalenga 14, mulaazevya Ucilo. Muce mwalya umukate uwaula icitutumusi pa manda 7. 22 Pa wanda uwo intunguluzi ilaapekanya cipambasi ngi lambo lya pa luyembu lwakwe na pa membu zya yantu yonsi amu mpanga. 23 Cila wanda umu manda 7 ilaapekanya ya cipambasi 7 na ya suuku 7 aakupeela kuli Yeova nga malambo ya koca, nupya cila wanda ilaapekanya sawe wenga uwa kupeela ngi lambo lya pa luyembu. 24 Ilinzile nu kupekanya makilogilamu 11 angaano pali cipambasi wenga, na makilogilamu 11 angaano pali suuku wenga, alino na malita yatatu na afu aamafuta pa makilogilamu 11 angaano.

25 “‘Mu mwezi uwalenga 7, pa wanda wanda uwalenga 15, pa manda 7 amutebeto, ilinzile ukupekanya ilambo ilili limwi lya pa luyembu, ilambo lya koca, upe wa vyakulya na mafuta.’”