Ezekeli
47 Lyene wanswilizye pa mulyango wi tempele, nupya paapa kwene apano naweni manzi aakonkolokelanga lwa ku ufumondaka ukufuma pansi lwa pa mulyango wi tempele, pano itempele lyalozizye uku ufumondaka. Manzi yakonkolokanga ukufuma pansi ukwi lunji li tempele, kuli kuti uku kaeya ka ulambo.
2 Lyene wamfumizye ukuomvya inzila iyaya uku mpongolo ya ku katutu, nupya wamfumizye apanzi nu kunzingulusya uku mpongolo ya panzi iyalozya uku ufumondaka, lyene naweni manzi yakukonkoloka ukufuma ukwi lunji.
3 Lino umonsi uwalemile intambo ya kupimilako waile lwa ku ufumondaka, wapimile uluzi mamita 518 ukufuma pa mpongolo, nupya walesile ukuti mpite umu manzi; nayo yamfisile mu kankulungu.
4 Lyene wapimile mamita na yauze 518 nu kuleka impite mu manzi, nupya yamfisile umu makokola.
Wapimile mamita na yauze 518 nu kuleka impite umu manzi, nupya manzi yamfisile umu musana.
5 Lino wapimile mamita na yauze 518, manzi yaakweti sana umukuku imfilwa nu kulamba pano uluzi lwali uluzike icakuti umuntu afwile sile ukowa, lwakweti sana umukuku nupya umuntu atanga alambe pa ngazo.
6 Lyene wanguzizye ati: “We mwana wa muntu, uzye walola?”
Nupya walesile ukuti impite nu kuswilila uku cituntu. 7 Lino naswilile, naweni ukuti umu mbali zyonsi zyoili izya luzi mwali imiti ingi sana. 8 Lyene wanenyile ati: “Manzi yaa yakakonkolokela uku citungu ca ku ufumondaka ukufika nu ku Alaba* nupya yakaingila muli yemba. Nga ingila muli yemba, manzi amuli yemba yakasanguluka. 9 Viumbwa ivya umi ivingi vikaikala konsi kuno manzi yaya. Konsi kuno manzi yafika kulaya inswi izingi. Manzi ya muli yemba yalasangululwa, konsi kuno uluzi lwaya kulaya uumi.
10 “Ya kavuwa ya nswi yalaimilila umu mbali ya luzi kufuma uku Eni-gedi ukufika uku Eni-egilaimu, ukulaya incende iya kwanikako masumbo. Kulaya inswi izingi izya misango ipusanepusane wa nswi izyaya muli Yemba Mukalamba.*
11 “Lulakwata inyika ni ncende zya matipa nupya vyene vitalazipa. Mu ncende zii mulasyala sile umusilya.
12 “Mu mbali zyonsi zyoili izya luzi mulaya imiti ya misango yonsi iikaseeka ivizao. Mafwa ya miti iiyo yatalaauma; ni vizao vitalaalukuta. Cila mwezi ilaaseeka ivizao vyuze, pano manzi alaaikontelela yalaafuma uku ncende ya muzilo. Vizao vya ku miti iiyo vilaya i vyakulya na mafwa yalaaomviwa uku kupozya.”
13 Yeova Umwene wa Papelapela walanda wati: “Ikwene ali ncende ino ulapeela uku mitundu 12 iya Ina Izlaeli kuti iye ica upyanyi, nupya Jozefu alapeelwa iviputulwa viili. 14 Mulikalamo, nupya mwensi mulapeelwa incende ilingane. Nalafile ukupeela impanga yii uku vikolwe vinu lyene imupeela kuti iye impanga inu.
15 “Mupaka wa mpanga uwa ku katutu aewu: Wafuma kuli Yemba Mukalamba ukuya uku nzila iyaya uku Hetiloni lwa ku Zedadi, 16 ku Hamati, ku Belota, nu ku Sibilaimi, incende iyaya pakasi kakwe Damasika na Hamati, ukufika uku Hazeli-hatikoni, incende iyayela uku mupaka wa ku Haulani. 17 Fwandi umupaka ulafuma kuli yemba uye uku Hazali-enoni, upite umu mbali ya mupaka wakwe Damasika ukuya uku katutu ukafike nu ku mupaka wa Hamati.
18 “Mupaka wa ku katutu ulapita pakasi ka ncende ya Haulani na Damasika nu mu mbali ya luzi lwa Yodani pakasi kakwe Gilyadi ni mpanga iya Izlaeli. Mulinzile ukupima ukufuma uku mupaka ukufika kuli yemba wa ku ufumondaka.* Ukwene ali mupaka wa ku ufumondaka.
19 “Mupaka wa ku kaeya ulafuma uku Tamala uye uku manzi ya ku Meliba-kadesyi, alino upite ukuya uku Mukonko* na kuli Yemba Mukalamba. Ukwene ali mupaka uwa ku kaeya.
20 “Uku uwondaka umupaka ulaya a Yemba Mukalamba, ukufuma kuno umupaka uwa ku kaeya wapelela ukufika uku ncende iyalozyanya na Lebo-Hamati.* Ukwene ali mupaka wa ku uwondaka.”
21 “Mulinzile ukwankanya impanga yii ukulingana ni mitundu 12 iya Ina Izlaeli. 22 Mulinzile ukwankanya impanga nu kupeelako antu aafuma uku mpanga zyuze aakaikala namwe aakweti ana ala yacili yakwikala namwe; nupya muce mwayalola wa Ina Izlaeli. Yalapeelwa impanga pamwi na mwe mitundu ya Ina Izlaeli. 23 Mulinzile ukupeela umuntu wa ku mpanga yuze impanga umu ncende ya mutundu uno akaikalamo,” avino Yeova Umwene wa Papelapela walanda.