Ezekeli

48 “Yaa ali mazina ya mitundu ukutandikila uku katutu: Incende yakwe Dani ilapita umu nzila iyaya uku Hetiloni ukuya uku Lebo-hamati* nu ku Hazali-enani, nu kuyapita umu mbali ya mupaka wa Damasika lwa ku katutu mupiipi na Hamati nupya ilafumilila uku mupaka uwa ku ufumondaka kufika uku mupaka wa ku uwondaka. 2 Impanga yakwe Asyeli ilapakana ni mpanga yakwe Dani, ukufuma uku mupaka wa ku ufumondaka ukufika umu mupaka uwa ku uwondaka. 3 Impanga yakwe Nafutali ilapakana ni mpanga yakwe Asyeli ukufuma uku mupaka uwa ku ufumondaka ukufika uku mupaka uwa ku uwondaka. 4 Impanga yakwe Manase ilapakana ni mpanga yakwe Nafutali ukufuma uku mupaka uwa ku ufumondaka ukufika uku mupaka uwa ku uwondaka. 5 Impanga yakwe Efulemu ilapakana ni mpanga yakwe Manase, ukufuma uku mupaka uwa ku ufumondaka ukufika uku mupaka uwa ku uwondaka. 6 Impanga yakwe Lubeni ilapakana ni mpanga yakwe Efulemu, ukufuma uku mupaka uwa ku ufumondaka ukufika uku mupaka uwa ku uwondaka. 7 Impanga yakwe Yuda ilapakana ni mpanga yakwe Lubeni, ukufuma uku mupaka uwa ku ufumondaka ukufika uku mupaka uwa ku uwondaka. 8 Pa mupaka wakwe Yuda ukufuma uku mupaka wa ku ufumondaka ukufika uku uwondaka muce musye incende iifisile uku makilomita 13 umu wipi, mu utali namo ice ilingane ni ncende iya mitundu yuze, kufuma uku mupaka uwa ku ufumondaka ukufika uku mupaka uwa ku uwondaka. Incende ya muzilo ilaya pakasi ka ncende kwene iiyo.

9 “Impanga ino mulinzile ukupeela Yeova ilinzile ukuya makilomita 13 mu utali na makilomita 5 umu wipi. 10 Yii ilaya impanga iya muzilo yakwe ya simapepo. Ku katutu makilomita 13 ku uwondaka makilomita 5, ku ufumondaka makilomita 5 nu ku kaeya makilomita 13. Incende ya muzilo yakwe Yeova ilaya pakasi ka ncende kwene iiyo. 11 Ilaya i yakwe ya simapepo aasoololwe ukufuma umu yana yakwe Zadoki aakaomba imilimo yane, nupya yatapondwike lino Aina Izlaeli na Ina Levi yampondokiile. 12 Yalapeelwa impanga iyapaatulwa ukuya iya muzilo sana pa mupaka wa Ina Levi.

13 “Aina Levi yalapeelwa impanga umupiipi ni ncende yakwe ya simapepo iilaya makilomita 13 mu utali na makilomita 5 mu wipi. (Incende yonsi ilaya makilomita 13 mu utali na makilomita 5 umu wipi.) 14 Yatalinzile ukukazya, ukukauzya, nanti ukupeela yauze impanga yii isuma sana, pano i ya muzilo kuli Yeova.

15 “Incende iyasyala iilaya ukucila pa makilomita yaili na afu umu wipi na makilomita 13 umu utali ilaya iya musumba, umwa kukuula mang’anda nu kucemela iviteekwa. Musumba ulaya pakasi ka ncende iiyo. 16 Vii avino ukulu wa musumba ulaya, ulalingana umu mbali zyonsi 4, ulaya makilomita yaili. 17 Incende iya kucemelamo iviteekwa iya mu musumba ilaya iilingane monsi, ilaya mamita 129 na afu.

18 “Incende iilasyala iilaya umupiipi ni ncende ya muzilo, ilaya makilomita 5 uku ufumondaka na makilomita 5 uku uwondaka. Vino yalaazombolamo vilaya ivyakulya ivya yantu aakaombela umu musumba. 19 Antu ya mu mitundu yonsi iya mu Izlaeli aakaombela umu musumba yalaalima umu ncende yii.

20 “Impanga yonsi ino mulapeela kuli Leza ilalingana monsi monsi, ilaya makilomita 13. Mulinzile ukuipaatula kuti iye iya muzilo kumwi ni mpanga ya musumba.

21 “Impanga iilasyala uku mbali zyoili izya ncende ya muzilo ni ncende iya musumba ilaya iya ntunguluzi. Ilaya umupiipi ni ncende ya muzilo iyaya makilomita 13 mu utali nupya iyafika uku ncende iya ku ufumondaka. Ku uwondaka ilaya umupiipi ni ncende iyaya makilomita 13 mu utali nupya ilafika uku ncende ya ku uwondaka. Impanga iya ntunguluzi ilapakana ni mpanga iya mitundu iili. Incende iya muzilo ni tempele vilaya pakasi ka ncende kwene iiyo.

22 “Incende ya Ina Levi ni ncende ya musumba ilaya pakasi ka ncende iya ntunguluzi. Incende ya ntunguluzi ilaya pakasi ka ncende yakwe Yuda ni ncende yakwe Benjamini.

23 “Impanga ino imitundu iyasyala ilapeelwa aeyi, impanga yakwe Benjamini ilafumilila uku mupaka uwa ku ufumondaka ukufika uku mupaka uwa ku uwondaka. 24 Impanga yakwe Simyoni ilapakana ni mpanga yakwe Benjamini, ukufuma uku mupaka uwa ku ufumondaka ukufika uku mupaka uwa ku uwondaka. 25 Impanga yakwe Isakali ilapakana ni mpanga yakwe Simyoni, ukufuma uku mupaka uwa ku ufumondaka ukufika uku mupaka uwa ku uwondaka. 26 Impanga yakwe Zebuluni ilapakana ni mpanga yakwe Isakali, ukufuma uku mupaka uwa ku ufumondaka ukufika uku mupaka uwa ku uwondaka. 27 Impanga yakwe Gadi ilapakana ni mpanga yakwe Zebuluni, ukufuma uku mupaka uwa ku ufumondaka ukufika uku mupaka uwa ku uwondaka. 28 Ku kaeya umupaka wa mpanga yakwe Gadi ulafuma uku Tamala ukufika uku manzi ya ku Meliba-kadesyi, kufika uku Mukonko* nu kutwalilila ukufika kuli Yemba Mukalamba.*

29 “Yii ali mpanga ino mulinzile ukwankanya imitundu ya mu Izlaeli, nupya ilaya impanga yao,” avino Yeova Umwene wa Papelapela walanda.

30 “Zii ali nzila izya kufumilamo umu musumba: Ku katutu musumba wakwata makilomita yaili.

31 “Impongolo zya mu misumba zilapeelwa mazina ya mitundu ya Ina Izlaeli. Pa mpongolo zitatu izya ku katutu, palaya impongolo yakwe Lubeni, impongolo yakwe Yuda, ni mpongolo yakwe Levi.

32 “Ku ufumondaka umusumba ulaya makilomita yaili mu utali, nupya kulaya impongolo zitatu: impongolo yakwe Jozefu, impongolo yakwe Benjamini, ni mpongolo yakwe Dani.

33 “Ku kaeya umusumba ulaya makilomita yaili, nupya ulakwata impongolo zitatu: impongolo yakwe Simyoni, impongolo yakwe Isakali, ni mpongolo yakwe Zebuluni.

34 “Ku uwondaka umusumba ulaya makilomita yaili umu utali, nupya ulakwata impongolo zitatu: impongolo yakwe Gadi, impongolo yakwe Asyeli, ni mpongolo yakwe Nafutali.

35 “Musumba onsi ukuzinguluka ulaya makilomita 9. Nupya ukufuma pa wanda kwene uwo musumba ulaamwa ukuti Yeova Amuno Ali.”