Danieli
1 Mu mwaka wakwe citatu uwa kuteeka kwakwe Yeoyakimu umwene wa ku Yuda, Nebukadineza umwene uwa ku Babiloni waile azinguluka umusumba uwa Yelusalemu. 2 Lino papisile insita Yeova wapeezile Umwene Yeoyakimu uwa ku Yuda kuli aliwe pamwi ni viya ivya mu ng’anda yakwe Leza wa cumi, nawe wavitwazile uku mpanga ya Syinali* umu ng’anda yakwe leza wakwe. Nupya wavisile umu cipao.
3 Lyene umwene wanenyile Asyipenazi umukalamba wa kwi sano kuti amuletele Aina Izlaeli yamwi, maka maka ana ya mwene na antu aacindikwe. 4 Yaali nu kuya aalumendo aatalemala, aakaloleka ningo, aakwata mano, aamanya ivintu nupya aakailuka, aangaomba ukwi sano lya mwene. Wali nu kuyasambilizya ukulanda nu kulemba ululimi lwa Ina Kalideya. 5 Nupya umwene walanzile ukuti cila wanda yayapeela ivyakulya ivisuma pa vyakulya vino walyanga na waini wino wamwanga. Yaali nu kuyasambilizya pa myaka itatu nupya pa cisila ca myaka iiyo yaali nu kutandika ukuombela umwene.
6 Pa yalumendo yayo paali na yamwi aafumile umu mutundu wakwe Yuda, kuli kuti Danieli,* Hananiya,* Misyaeli,* na Azaliya.* 7 Nupya umukalamba wa yaomvi ya pi sano wayapeezile mazina yauze,* Danieli wamupeezile izina lyakuti Belitesyazali, Hananiya wamupeezile izina lyakuti Syadilaki, Misyaeli wamupeezile izina lyakuti Misyaki, Azaliya nawe wamupeezile izina lyakuti Abedenigo.
8 Lelo Danieli wapanzile umu mwenzo wakwe ukuti atalatala aikowezye uku vyakulya vya mwene nanti kuli waini wakwe. Fwandi walenzile uku mukalamba wa yaomvi ya kwi sano ukuti ataalyako ivintu vii pakuti ataikowezya. 9 Nupya Leza wa cumi walenzile umukalamba wa yaomvi ya kwi sano ukuya ni cikuuku nu luse kuli Danieli. 10 Lelo umukalamba wa yaomvi ya kwi sano wanenyile Danieli ati: “Nkoopa umwene umusambazi wane, uwalanda ivyakulya ni vya kumwa vino mulinzile ukupeelwa. Uzye cilaya uli ndi cakuti wazana ukuti musikuloleka ningo wa yalumendo yauze yano mulingine nayo? Mulaleka inje nu mulandu uku mwene.” 11 Lelo Danieli wanenyile umulinzi wino umukalamba wa yaomvi ya kwi sano wasonsile kuti aasakamala Danieli, Hananiya, Misyaeli, na Azaliya ati: 12 “Twapaapata ezya swe yaomvi yako pa manda 10, uwatupeela sile ivilimwa na manzi; 13 lyene uce ulinganye imilolekele itu uku miloleke ya yanji aakulya ivyakulya ivisuma ivya mwene nupya vino ulalola avino uce ucite kuli swe yaomvi yako.”
14 Nawe uvwile vino yalenzile nu kuyezya pa manda 10. 15 Lino papisile amanda 10 alumendo yaa yalolekanga ningo nupya yaali nu umi usuma* ukucila auze aalyanga ivyakulya ivisuma ivya mwene. 16 Umulinzi watolanga ivyakulya vyao ivisuma na waini nu kuyapeela ivilimwa. 17 Nupya Leza wa cumi wapeezile alumendo yaa 4 amano, kumanya, nu kwiluka ivyalembwa vyonsi nupya Danieli wapeezilwe amano ya kwiluka ivilolwa vyonsi ni viloto.
18 Lino insita ino Umwene Nebukadineza walanzile ukuti yace yayatwale kuli aliwe yafisile, umukalamba wa yaomvi ya kwi sano wayatwazile kuli aliwe. 19 Lino umwene walanzile nayo, waweni ukuti kutaali ali wensi api umba lyao uwali wakwe Danieli, Hananiya, Misyaeli, na Azaliya; nupya yatwalilile ukuombela umwene. 20 Lyonsi lino umwene wayuzya pa vintu ivikulondekwa mano nu kwiluka, wazananga ukuti iyacila ya simapepo yonsi aavinjelengwe na ya kasapoola aali umu mpanga yonsi ino wateekanga, imiku 10. 21 Nupya Danieli watwalilile ukuya kuuku kwene ukufika umu mwaka uwa kutandikilako uwa kuteeka kwa Mwene Sailasi.