Danieli

3 Mwene Nebukadineza wapanzile icilubi cakwe goldi icali makyubiti 60* mu utali na makyubiti 6* mu wipi. Wacimike umu nyika ya Dula umu citungu ca Babiloni. 2 Lyene Umwene Nebukadineza watumile akuyaama intunguluzi zya mu vitungu, aangalizi, aalasi, impandamano, ya kasunga ya vipao, ya kapingula, aomvi ya mu vilye, ni ntunguluzi zyuze zyonsi kuti ize yazevye pa mulandu ni cilubi cino wapanzile.

3 Fwandi ntunguluzi zya mu vitungu, aangalizi, aalasi, impandamano, ya kasunga ya vipao, ya kapingula, aomvi ya mu vilye, ni ntunguluzi zyuze zyonsi yakolongine uku kuzevya pa cilubi cino Umwene Nebukadineza wapanzile. Nupya yaile iimilila pa nkoleelo ya cilubi. 4 Muomvi wa kwi sano uumanga imbila wapunzile ati: “Mwe yantu mwe, mwe nko, na mwe mitundu, nkumunena ukuti, 5 lino mumauvwa ukulila kwi penga, mutolilo, izeeze, banjo ni vya kulizizyako inyimbo vyuze, mufukame nu kusimpa imitwe pansi nu kupepa icilubi cakwe goldi cino Umwene Nebukadineza wataimika. 6 Wensi aasikufukama nu kupepa, amasumbilwa umwi lungu lya moto lilyo kwene sile.” 7 Fwandi lino antu yonsi, inko ni mitundu yuvwile ukulila kwi penga, mutolilo, izeeze, banjo ni vya kulizizyako inyimbo vyuze, yafukime iyasimpa imitwe pansi nu kupepa icilubi cakwe goldi cino Umwene Nebukadineza wimike.

8 Pa nsita iiya Aina Kalideya yamwi yaile uku mwene nu kulandilila Ayuda. 9 Yanenyile Umwene Nebukadineza iyati: “Mwene, uye nu umi manda pe. 10 Mwene, wewe walanzile uti umuntu wensi uuvwa ukulila kwi penga, mutolilo, izeeze, banjo ni vya kulizizyako inyimbo vyuze alinzile ukufukama asimpe umutwe wakwe pansi nu kupepa icilubi cakwe goldi; 11 nu kuti wensi aasikufukama nu kupepa alinzile ukusumbilwa umwi lungu lya moto. 12 Lelo kuli Ayuda yamwi yano wasonta ukuya intunguluzi umu citungu ca Babiloni, kuli kuti Syadilaki, Misyeki, na Abedenigo. We mwene aonsi yaa yataakucindika, yasikuombela ya leza yako, nupya iyakana ukupepa icilubi cakwe goldi cino wimika.”

13 Lyene Nebukadineza wasosile sana nu kutuma akuti yakalete Syadilaki, Misyeki, na Abedenigo. Fwandi yaleesile aonsi yaa pa nkoleelo yakwe. 14 Nawe wayuzizye ati: “Syadilaki, Misyeki, na Abedenigo, uzye i ca cumi ukuti musikuombela ya leza yane nupya mukukana ukupepa icilubi cakwe goldi cino nimika? 15 Lino mumauvwa nupya ukulila kwi penga, mutolilo, izeeze, banjo, ni vya kulizizyako inyimbo vyuze, nupya mwafukama nu kupepa icilubi cino napanga, ale cazipa. Lelo nga mwakana ukupepa, lilyo kwene sile mumasumbilwa umwi lungu lya moto, nupya uzye a leza ci aangamupususya umu minwe yane?”

16 Syadilaki, Misyeki, na Abedenigo yaswike Nebukadineza iyati: “Mwene kusi vino tungalanda pa mulandu uu. 17 Nga caya vivyo, Leza witu wino tukaombela akweti maka ya kutupususya umwi lungu nu mu minwe yako we mwene. 18 Lelo nanti atatupuswisye, umanye ukuti tutakutala tuombele ya leza yako nanti ukupepa icilubi cakwe goldi cino wimika.”

19 Lyene Nebukadineza wasokiile sana Syadilaki, Misyeki, na Abedenigo icakuti ni cinso cakwe iciluwana, nupya walanzile ukuti yakavye ilungu imiku 7 kucila vino likakaya lyonsi. 20 Wanenyile aonsi yamwi aamaka ukufuma pa yasilika yakwe kuti yanyepe Syadilaki, Misyeki, na Abedenigo nu kuyayasumbila umwi lungu lya moto.

21 Fwandi yayanyefile ala iyazwala imingila, ivisote ni vyakuzwala vyao vyuze vyonsi, nupya yaile iyayasumbila umwi lungu lya moto. 22 Pa mulandu wakuti vino umwene walanzile wavilanzile ala watasoka sana, ilungu lyakaisye, nupya aonsi aasenzile Syadilaki, Misyeki, na Abedenigo aliyo yaafwile uku cimbilimbili ca moto. 23 Lelo aonsi yaa yatatu kuli kuti Syadilaki, Misyeki, na Abedenigo yaponiile umwi lungu lya moto ala iyanyepwa.

24 Lyene Umwene Nebukadineza uvwile sana intete nupya lilyo kwene wakatwike nu kuzya impandamano zyakwe ati: “Uzye tutali twanyepa aonsi yatatu nu kuyasumbila umu moto?” Nayo yamwaswike iyati: “Ee mwene.” 25 Lyene watiile: “Lolini! Nkulola aonsi 4 aatanyefilwe yakupitaana pakasi ka moto, nupya yatapiile, nu walenga 4 akuloleka wa mwana wakwe ya leza.”

26 Nebukadineza wapalamiile apa mulyango wi lungu lya moto nu kupunda ati: “Syadilaki, Misyeki, na Abedenigo mwe yaomvi yakwe Leza wa Papelapela fumini mwize kuno!” Syadilaki, Misyeki, na Abedenigo nayo yafumile umu moto. 27 Intunguluzi zya mu vitungu, aangalizi, aalasi, ni mpandamano zya mwene aakolongine kuuku yaweni ukuti umoto utacisile icili consi uku yonsi yaa; nanti sile inyele zya ku mitwe yao zitaawayosile, ivyakuzwala vyao vitaapiile, nupya yataanunsile nanti cunsi.

28 Lyene Nebukadineza walanzile ati: “Alumbanyiziwe Leza wakwe Syadilaki, Misyeki, na Abedenigo, uwali watuma malaika wakwe nu kupususya aomvi yakwe. Iiyamutaila nu kukana ukulondela isunde lya mwene nupya iiyaipeelesya nu kufwilapo ukucila ukuombela nanti ukupepa leza muze suka sile Leza wao. 29 Fwandi nkupeela isunde lyakuti antu aali yonsi, uluko, nanti umutundu aalalanda icili consi ciipe pali Leza wakwe Syadilaki, Misyeki, na Abedenigo yalinzile ukuputoolwa na mang’anda yao yalinzile ukuya ivimbusu vya yantu yonsi* pano kutaaya Leza muze aangapususya wakwe wii.”

30 Lyene umwene wapeezile Syadilaki, Misyeki, na Abedenigo ivifulo vya papela umu citungu ca Babiloni.