Ezekeli
25 Nupya kwene Yeova wanenyile ati: 2 “We mwana wa muntu piliukila uku Ina Amoni nu kusesema ivilayacitikila. 3 Unene Aina Amoni uti, ‘Uvwini amazwi yakwe Yeova Umwene wa Papelapela. Yeova Umwene wa Papelapela walanda wati: “Pa mulandu wakuti mwalanzile imuti ‘Cazipa!’ lino incende yane iya muzilo yakoweziwe na lino impanga ya Izlaeli yasiile umwaula icili consi, nupya lino amu ng’anda yakwe Yuda yasenzilwe umu uzya, 4 namamupeela uku yantu aku ufumondaka. Yalapanga inkambi umu mpanga inu nu kutanikamo matenti. Yalalya ivyakulya vinu nu kumwa umukaka winu. 5 Ndalenga umusumba wa Laba ukuya incende umwa kuliila ingamila, ni mpanga iya Ina Amoni ukuya umwa kupuuzila imfwele; nupya mulamanya ukuti nene Yeova.”’”
6 “Yeova Umwene wa Papelapela walanda wati: ‘Pa mulandu wakuti mwatoosile nu kuponda pansi nupya mwasansamwike ala muli ni mitumfyo pa mulandu ni vyacitikiile impanga ya Izlaeli, 7 ndakonzolwela ikasa lyane pali mwemwe nu kumupeela uku nko wa cintu ica kupoka. Ndamufumya umu yantu nu kumonona. Ndamulovya nupya mulamanya ukuti nene Yeova.’
8 “Yeova Umwene wa Papelapela walanda wati: ‘Pa mulandu wakuti Aina Moabu na Ina Seili iyalanda iyati, “Amu ng’anda yakwe Yuda iyaya wa nko zyonsi,” 9 namalenga imisumba iyaya pa mupaka wa mpanga iya Moabu ukukanaya icingililwe kumwi ni misumba isuma sana iya mu mpanga iiyo, kuli kuti Beti-yesyimoti, Beti-baali-meoni, kumwi sile na Kilyataimu. 10 Ndapeela impanga ya Moabu kumwi na Aina Amoni uku yantu aku ufumondaka, pakuti kutaca kuye uwa kwiusya Aina Amoni umu nko. 11 Nupya ndapingula Aina Moabu, nayo yalamanya ukuti nene Yeova.’
12 “Yeova Umwene wa Papelapela walanda wati: ‘Aina Edomu yalandula uku ya mu ng’anda yakwe Yuda nupya yaya nu mulandu ukulu pa kulandula kwao; 13 fwandi Yeova Umwene wa Papelapela walanda wati: “Ndakonzolwela ikasa lyane na pali Edomu nu kukoma antu aayamo ni viteekwa, nupya ndalenga impanga ya Edomu isyale umwaula icili consi. Antu yalakomwa uku lupanga ukufuma uku Temani ukufika uku Dedani. 14 ‘Ndaleta icilanduzi pali Edomu kuomvya antu yane Aina Izlaeli. Yalaleta ukali wane ukalamba apa Ina Edomu pa kuti yace yalole icilanduzi cane,’ avino Yeova Umwene wa Papelapela walanda.”’
15 “Yeova Umwene wa Papelapela walanda wati: ‘Pa mulandu wakuti Aina Filisti yakoma sana imyenzo, yakalondesya ukulandula apa Ina Izlaeli nu kuyonona. 16 Fwandi Yeova Umwene wa Papelapela walanda wati: “Nimakonzolwela ikasa lyane pa Ina Filisti nupya ndakoma Aina Keleti nu konona antu asyalako aakaikala umu mbali yakwe yemba. 17 Ndaleta icilanduzi icipisye pali aliyo nu kuyafulula icipisye nupya yalamanya ukuti nene Yeova lino ndalandula pali aliyo.”’”