Ibuku Lyakwe Ciili Lyakwe Samweli
14 Lyene Yoabu mwana Zeluya wizile amanya ukuti umwene akuluuka sana Abusalomu. 2 Fwandi Yoabu watumile aakuyaama umwanaci umwi umucenjele ku Tekoa nupya wizile amunena ati: “Ucite kwati ukuloosya, uzwale ivyakuzwala vya ndoosya nupya utapakala mafuta. Ucite kwati u mwanaci uwataloosya pa nsita itali. 3 Uye ukanene umwene vii.” Lyene Yoabu wanenyile umwanaci ivya kuyalanda.
4 Lyene umwanaci Umwina Tekoa waile uku mwene aya afukama alino afupama, nu kulanda ati: “Mwene, si ngazwe!” 5 Umwene nawe watiile: “I cani?” Umwanaci waswike ati: “Nene mukamfwilwa, ya wane yafwa. 6 Nupya ne muomvi wako nakweti ana aonsi yaili, ana yaa yatandike ukulwa ala yali umu mpanga. Kutaali uwakuyatasya, nupya wenga umile umuze mpaka afwa. 7 Lyene ulupwa lonsi ilunkatukila ne muomvi wako, nupya yakunena iyati, ‘Leta umwanako uwakomile umwinakwe pakuti tumukome pa mulandu na vino wakomile umwinakwe, nanti cakuti aliwe afwile ukuya impyanyi!’ Yakulonda ukunkomela umwana uwasyala sile wenga uwaya kwati ikala lya moto ilyatilisyala sile lyonga nu kulovya izina lyakwe ya wane kumwi nu mwana uwasyala.”
8 Lyene umwene wanenyile umwanaci ati: “Swilila ukwako, namaombelapo pa mulandu wako.” 9 Umwanaci Umwina Tekoa nawe wanenyile umwene ati: “Musambazi wane leka umulandu uye pali nene na pa ya mu ng’anda yakwe tata, lelo wemo uye uwa kaele pamwi nu wene wako.” 10 Lyene umwene watiile: “Ndi cakuti umwi walanda kuli wewe nupya api lyasi lii ukamulete kuno, nupya atalatala akucuzyepo.” 11 Lelo umwanaci watiile: “We mwene, si uce wiusye Yeova Leza wako, pakuti kalandula wa wazi ataca ankomele umwana.” Umwene nawe watiile: “Nkulapa pali Yeova Leza wa umi, kusi ulunyele nanti longa ulwa mwanako ululapona pansi.” 12 Lyene umwanaci wanenyile umwene ati: “Si leka ne muomvi wako ndande vimwi kuli wewe.” Umwene nawe watiile: “Landa!”
13 Umwanaci uzizye umwene ati: “U mulandu ci uno welenganyizizye ukucita icintu ca musango uu uku yantu yakwe Leza? Vino wazinga umwanako umonsi nu kukana ukumuwezya uli nu mulandu pali vino watulanda. 14 Cumi kwene tulafwa nupya tulaya wa manzi atiitilwa pansi aatanga yazyoleke. Nomba Leza atanga akome umuntu, akaika mano pali vino vyativilenga umwi azingwe pakuti atatwalilila ukuya umuzingwe kuli aliwe. 15 Iniza kuti ndande mazwi yaa uku musambazi wane pa mulandu na vino antu yantiinyizye. Fwandi acino ne muomvi wako inelenganya nati, ‘Nkandande nu mwene. Limwi umwene amacita ukulingana na vino umuomvi wakwe amamulenga. 16 Si umwene auvwe nu kumpususya ne muomvi wakwe ku muntu wino akulonda ukunkoma nu kukoma umwanane umulumendo wenga sile pakuti atakapyane vino Leza watupeela.’ 17 Lyene ne muomvi wako inelenganya nati, ‘Si amazwi ya musambazi wane yanteekezye,’ pano umusambazi wane waya sile kwati a malaika wakwe Leza wa cumi mu kupusanya icisuma ni ciipe. Si Yeova Leza wako aye naawe.”
18 Lyene umwene wanenyile umwanaci ati: “Utamfisa vyonsi vino namauzya.” Umwanaci nawe waswike ati: “Uzya musambazi wane.” 19 Lyene umwene uzizye ati: “Uzye a Yoabu uwatakutuma?” Umwanaci nawe waswike ati: “Nkulapa na pa umi wako, musambazi wane, cili wakwe vino watulanda, pano Yoabu umuomvi wako u watantuma kuti nize ndande mazwi yonsi yaa. 20 Yoabu muomvi wako watacita icintu cii pakuti asenule vino ivintu vili, lelo we musambazi wane wakwata mano wakwe malaika wakwe Leza wa cumi nupya wamanya vyonsi ivikacitika umu mpanga itu.”
21 Lyene umwene wanenyile Yoabu ati: “Icisuma, namacita vivyo kwene. Pitanga ukawezye Abusalomu.” 22 Lino Yoabu uvwile vivyo wafukime nu kufupama nupya walumbanyizye umwene. Yoabu watiile: “Musambazi wane ilelo namanya ukuti wantemwa pano wacita vino ne muomvi wako inkulenga.” 23 Lyene Yoabu waile uku Gesyuli nupya waile asenda Abusalomu nu kumutwala uku Yelusalemu. 24 Lelo umwene watiile: “Lekini aswilile ukwakwe, nupya atalolana nani.” Fwandi Abusalomu waswilile ukwakwe nupya ataloline nu mwene.
25 Mu Izlaeli monsi mutaali umuntu wino yalumbilizyanga sana pa mulandu wa kuyemba wakwe Abusalomu. Ataakweti ulema uli onsi ukutandikila pa tukando mpaka apa mutwe. 26 Lyonsi pa mpela ya mwaka wapelanga inyele pa mulandu wakuti zyamufinilanga, nga wapela, inyele zyafinanga ukucila pa makilogilamu yaili* ukulingana ni cipimilo cino yaomvyanga umwi sano.* 27 Abusalomu wakweti ana aonsi yatatu nu mwanaci wenga, uwi zina lyakuti Tamala. Wali umuyembe sana.
28 Abusalomu watwalilile ukwikala umu Yelusalemu pa myaka iili ukwaula ukuti alolane nu mwene. 29 Abusalomu watumile aakuyaama Yoabu pakuti amutume uku mwene, lelo Yoabu wakanyile ukuya kuli Abusalomu. Nupya kwene Abusalomu watumile aakuyaama Yoabu, Yoabu nupya kwene wakanyile ukuyako. 30 Lyene Abusalomu wanenyile aomvi yakwe ati: “Icalo cakwe Yoabu cakwe baale caya umupiipi ni calo cane. Yangini mukacoce.” Fwandi aomvi yakwe Abusalomu yaile iyoca icalo cakwe Yoabu. 31 Lyene Yoabu waile uku ng’anda yakwe Abusalomu nu kuyamuzya ati: “U mulandu ci uno aomvi yako yangocela icalo?” 32 Abusalomu waswike Yoabu ati: “Natumile aakwizakwama pakuti nkutume uku mwene nu kuyamuzya ukuti: ‘U mulandu ci uno nafumile uku Gesyuli? Nga cazifile intwalilila ukwikala kuuku kwene. Nkulonda ukulolana nu mwene, ndi cakuti nkweti umulandu, lyene alinzile ukunkoma.’”
33 Fwandi Yoabu waile uku mwene nu kuyamunena vino Abusalomu walanzile. Lyene umwene wamile Abusalomu, nawe waile uku mwene ayafukama nu kufupama pa nkoleelo ya mwene. Umwene nawe watonswile Abusalomu.