1 Yamwene
1 Walanga Umwene Devedi watakota, nupya wali ni myaka ingi sana, atuvwanga ukukaya nanti yezye ukumuvimba. 2 Fwandi aomvi yakwe yalanzile iyati: “Musambazi witu, leka tukulondele umwanaci nacisungu uwakuti akusakamala. Amalaalanga umupiipi naawe pakuti uwauvwa ukukaya.” 3 Yalonzile umukazyana umusuma mu mpanga yonsi iya Izlaeli, nupya yazanyile Abisyagi Umwina Syunemu nu kumutwala uku mwene. 4 Mukazyana wali umusuma sana, nupya watandike ukusakamala umwene nu kumupeela ivyakulya, lelo umwene ataatazile apange icupo nawe.
5 Lyene Adoniya mwana Hagiti waitutumulanga nu kulanda ati: “Nene ndaya umwene!” Walesile ukuti yamupekanyizizye iceleta alino na aonsi akukwela pa mfwalasi na aonsi 50 aakusimula pa nkoleelo yakwe. 6 Lelo isi ataatazile amukalipila ati: “U mulandu ci uno ukucitila vii?” Alino walolekanga ningo sana nupya wali umuto wakwe Abusalomu. 7 Watandike ukuvwana na Yoabu mwana Zeluya na Abiata simapepo, nupya yamwazwilizyanga nu kumutungilila. 8 Lelo Sadoki simapepo, Benaya mwana Yeoyada, Natani kasesema, Syimei, Lei, na asilika ya maka yakwe Devedi yatatungililanga Adoniya.
9 Lyene Adoniya waile umu kupeela ilambo lya mfwele, ing’ombe ni nyama iziine pi we lya Zoeleti ilyali umupiipi na Eni-logeli, nupya wamile aina yakwe yonsi aali ana ya mwene, alino na aonsi yonsi amu Yuda aali aomvi ya mwene. 10 Lelo ataamileko Natani kasesema, Benaya, na asilika ya maka, nanti sile a Solomoni umwinakwe. 11 Lyene Natani uzizye Batisyeba nyina wakwe Solomoni ati: “Uzye watuuvwa ukuti Adoniya mwana Hagiti wataya umwene, nupya Devedi umusambazi witu atamanyile nanti acimwi? 12 Fwandi napaapata, iza kuno nkupandeko mano pakuti upususye umi wako nu umi wakwe Solomoni umwanako. 13 Yanga uku Mwene Devedi nupya ukamuzye uti: ‘Musambazi wane, uzye asi wewe walafile uku muomvi wako uti, “Solomoni umwanako aalaya umwene pa cisila cane nupya aalikala pa cilimba cane ica wene”? Fwandi u mulandu ci uno Adoniya watayela umwene?’ 14 Lino ucili ukulanda nu mwene, nani nimaiza nu kunena umwene inti vino ukulanda ivya cumi.”
15 Fwandi Batisyeba waile uku mwene mu muputule wa mukasi. Walanga umwene watakota sana, nupya Abisyagi Umwina Syunemu u wamusakamalanga. 16 Lyene Batisyeba wafupime uku mwene, nupya umwene wamuzizye ati: “I cani cino ukulonda?” 17 Nawe waswike ati: “Musambazi, wewe walafile uku muomvi wako kupitila umwi zina lyakwe Yeova Leza wako uti, ‘Solomoni umwanako aalaya umwene pa cisila cane nupya aalikala pa cilimba cane ica wene.’ 18 Nomba lola! Adoniya wataya umwene nupya we musambazi wane utamanyile icili consi. 19 Watapeela malambo yakwe ya cipambasi, inyama iziine, ni mfwele izingi, nupya aaliwama ana ya mwene yonsi na Abiata simapepo alino na Yoabu umukalamba wa yasilika; lelo ataamile Solomoni umuomvi wako. 20 Fwandi we musambazi wane, manso ya Ina Izlaeli yonsi yali pali wewe pakuti uyanene aalikala pa cilimba cako ica wene. 21 Nga cisi vivyo, lino we musambazi wane ulafwa sile nu kuziikwa wa vikolwe vyako, nene kumwi na Solomoni umwanane yalaatulola wa yalwani.”
22 Nupya walanga acili akulanda nu mwene, Natani kasesema wafisile. 23 Lilyo kwene sile yanenyile umwene iyati: “Kasesema Natani wiza!” Nawe wingile umwali umwene nu kufupama. 24 Lyene Natani uzizye ati: “Musambazi wane, uzye walanzile uti, ‘Adoniya aalaya umwene pa cisila cane, nupya aalikala pa cilimba cane ica wene’? 25 Pano ilelo wataaya umu kupeela ilambo lyakwe ya cipambasi, inyama iziine, ni mfwele izingi, nupya wataama ana ya mwene yonsi, akalamba ya yasilika, na Abiata simapepo. Yakulya nu kumwa pamwi nawe nupya yakulanda yakuti, ‘Uwikale manda aingi Mwene Adoniya!’ 26 Lelo atangamileko, nanti a Sadoki simapepo, nanti a Benaya mwana Yeoyada kumwi na Solomoni umuomvi wako. 27 Uzye musambazi wane watuzumilizya icintu cii ukwaula ukunena umuomvi wako aalakupyana pa cilimba cako ica wene?”
28 Umwene Devedi walanzile ati: “Ngamilini Batisyeba.” Nawe wingile nu kwimilila pa nkoleelo yakwe. 29 Lyene umwene walafile ati: “Nalapa umwi zina lyakwe Yeova Leza wa umi uwampuswisye umu macuzi yonsi, 30 ilelo nimacita wakwe viivi kwene vino nalafile kuli wewe umwi zina lyakwe Yeova Leza wa Ina Izlaeli, ukuti, ‘Solomoni umwanako aalaya umwene pa cisila cane nupya aalikala pa cilimba cane ica wene.’” 31 Lyene Batisyeba wafupime pa nkoleelo ya mwene nu kulanda ati: “Si Devedi umusambazi wane aye nu umi manda pe!”
32 Lilyo kwene Umwene Devedi walanzile ati: “Ngamilini Sadoki simapepo, Natani kasesema, na Benaya mwana Yeoyada.” Nayo yaile uku mwene. 33 Umwene wayanenyile ati: “Sendini aomvi ya musambazi winu, nupya mukwezye Solomoni umwanane pali punda wane nu kumutwala uku Gihoni. 34 Sadoki simapepo na Natani kasesema yamaya yakamwitulwile mafuta kuuku kwene kuti aye umwene wa Izlaeli lyene mukalizye mapenga nu kulanda ukuti, ‘Uwikale manda aingi Mwene Solomoni!’ 35 Lyene pa kuwela, mwize mumukonke pa cisila, nawe wizaingila nu kwikala pa cilimba cane ica wene, nupya wizampyana pa wene nani nizamusonta ukuya intunguluzi umu Izlaeli nu mu Yuda.” 36 Lilyo kwene Benaya mwana Yeoyada wanenyile umwene ati: “Ameni! Si Yeova Leza wa musambazi wane acizumilizye. 37 Wakwe vino Yeova wali nu musambazi wane, avino aye na Solomoni, nupya si Leza amulenge ukuya sana na maka ukucila umusambazi wane Devedi.”
38 Lyene Sadoki simapepo, Natani kasesema, Benaya mwana Yeoyada, na Ina Keleti na Ina Peleti yapisile nu kuyakwezya Solomoni pali punda wa Mwene Devedi alino iyamutwala uku Gihoni. 39 Lyene Sadoki simapepo waile atola mafuta umwi tenti aitulwila Solomoni, nupya yatandike ukulizya mapenga na antu yonsi yapundanga iyati: “Uwikale manda aingi Mwene Solomoni!” 40 Pa cisila, antu yonsi yamukonsile, yalizyanga imitolilo ala yali sana ni nsansa, yapanganga sana icongo icakuti ni insi yasunkananga.
41 Adoniya na antu yonsi yano wamile yuvwile ivyacitike ala iyamala ukulya. Lino Yoabu uvwile sile iciunda ca mapenga, uzizye ati: “U mulandu ci uno mu musumba muyelile sana icongo?” 42 Lino acili akulanda, Yonatani mwana Abiata simapepo wizile, lyene Adoniya wamunenyile ati: “Ingila, pano wewe muntu musuma, nupya ufwile uli ni lyasi lisuma.” 43 Lelo Yonatani wanenyile Adoniya ati: “Awe! Devedi umusambazi witu wataika Solomoni pa wene. 44 Umwene iwatuma Sadoki simapepo, Natani kasesema, Benaya mwana Yeoyada, na Ina Keleti, na Ina Peleti, nayo iyamukwezya pali punda wa mwene. 45 Lyene Sadoki simapepo na Natani kasesema iyaya yamwitulwila mafuta uku Gihoni kuti aye umwene. Pa cisila iyawela ala yali ni nsansa nupya antu yonsi umu musumba iyatemwa sana. Ali congo cino imuvwa. 46 Nupya Solomoni wataikala pa cilimba ca wene. 47 Cuze icakuti, aomvi ya mwene iiyaya umu kutaizya umusambazi witu Devedi nu kumunena iyati, ‘Si Leza wako alenge izina lyakwe Solomoni ukucindikwa sana kucila izina lyako, nupya alenge uwene wakwe ukukoma kucila uwene wako!’ Lyene umwene iwafukama pano akalaala nu kupepa kuli Leza. 48 Nupya umwene iwalanda nu kuti, ‘Si Yeova Leza wa Ina Izlaeli alumbanyiziwe uwataleka ukuti kuye umuntu uwa kwikala pa cilimba cane ica wene ilelo, nupya uwatazumilizya ukuti nani indoleko icintu cii.’”
49 Antu yonsi yano Adoniya wamile yuvwile sana intete, nupya yakatwike nu kusalangana. 50 Adoniya nawe kwene uvwile intete pa mulandu wakwe Solomoni, fwandi wapisile nu kuyalema impembe zya ulambo. 51 Yamwi yanenyile Solomoni iyati: “Adoniya atauvwa intete pa mulandu naawe; nupya watalemelela impembe zya ulambo, nu kulanda ati, ‘Tale umwene Solomoni aize alape kuli nene ukuti asikunkoma nu lupanga.’” 52 Lyene Solomoni walanzile ati: “Ndi cakuti u wa cumi, kusi ulunyele lwakwe ululi lonsi ulumapona pansi; lelo ndi cakuti wazanwa nu mulandu, amakomwa.” 53 Fwandi Umwene Solomoni watumile aakuyasenda Adoniya ukufuma uku ulambo. Lyene waile uku Mwene Solomoni nu kumufukamila, Solomoni wamunenyile ati: “Pitanga ukwako.”