Yakapingula
21 Aonsi ya mu Izlaeli yalafile umulapo uku Mizipa iyati: “Kusi ali wensi muli sweswe aalatwalizya umwanakwe umukazyana uku monsi wa mu lupwa lwakwe Benjamini.” 2 Lyene antu yaile uku Betele nu kwikala pa nkoleelo yakwe Leza wa cumi kufika manguzi, ala yakulila nu kuloosya sana. 3 Nupya yalandanga yakuti: “Iye, we Yeova Leza wa Ina Izlaeli u mulandu ci uno ca musango uu cacitikila umu Izlaeli? U mulandu ci uno ilelo mutundu onga iulila umu Izlaeli?” 4 Uwanda uwalondelilepo antu yakatwike katondo iyakuula ulambo kuuku kwene nu kupeelelapo malambo ya koca na malambo ya mutende.
5 Lyene Aina Izlaeli yuzizye iyati: “A weni mu mitundu yonsi ya Ina Izlaeli aatizile umu kukolongana pa nkoleelo yakwe Yeova?” pano yalafile ukuti wensi aatalaya kuli Yeova uku Mizipa alakomwa. 6 Fwandi Aina Izlaeli yuvwile sana uyi pali vino vyacitike kuli Benjamini umwinao. Yalanzile iyati: “Ilelo umutundu onga watiufumiziwa umu Izlaeli. 7 Uzye vino twalafile kuli Yeova ukuti tutalayapeela ana itu akazyana kuti yaye aci yao, tumacita uli pakuti aonsi atiyasyala yakwate aci?”
8 Yuzizye iyati: “U mutundu ci pa mitundu yonsi ya Ina Izlaeli uutizile kuli Yeova uku Mizipa?” Lyene cazanyilwe ukuti kusi ali wensi kufuma uku Yabesyi-gilyadi uwizile uku nkambi kuno Aina Izlaeli yonsi yakolongine. 9 Lino yapenzile antu yazanyile ukuti, pataali nanti aumwi pa ikazi ya mu Yabesyi-gilyadi. 10 Fwandi yatumile asilika ya maka sana 12,000, yayanenyile iyati: “Yangini mukakome aikazi ya ku Yabesyi-gilyadi nu lupanga, mukome kumwi na anaci na ana. 11 Vino mulinzile ukuyacita aevi: Umonsi wensi alinzile ukukomwa kumwi nu mwanaci wensi uwalaalapo nu monsi.” 12 Mu ikazi ya mu Yabesyi-gilyadi yazanyilemo ya nacisungu 400. Fwandi yayatwazile umu nkambi uku Syilo mu mpanga iya Kenani.
13 Lyene antu yonsi akolongine yatumile amazwi ku ya mutundu wakwe Benjamini aali uku ciliwe ca Limoni nupya yapanzile umutende. 14 Fwandi amu mutundu wakwe Benjamini yawezile. Nayo yayapeezile anaci yano yasunzile aafumile uku Yabesyi-gilyadi, lelo yacefile. 15 Nupya antu yuvwile uyi pali vino vyacitikile amu mutundu wakwe Benjamini pa mulandu wakuti Yeova walenzile ukuti mitundu ya Ina Izlaeli ipatukane. 16 Akalamba ya mu Izlaeli yalanzile iyati: “Uzye vino anaci yonsi amu mutundu wakwe Benjamini yaakomwa, tumacita uli pakuti tulondele aonsi atiyasyala anaci?” 17 Yalanzile nu kuti: “Amu mutundu wakwe Benjamini aapuswike, yalinzile ukupeelwa ica upyanyi pakuti mutundu utalowa umu Izlaeli. 18 Lelo tutazumiliziwa ukutwalizya ana itu akazyana kuli aliyo pa mulandu wakuti antu ya mu Izlaeli yalafile iyati: ‘Aye umutiipwe umuntu uwatwalizya umwanakwe umukazyana uku monsi wa mu lupwa lwakwe Benjamini.’”
19 Lyene yatiile: “Lolini! Cila mwaka kukaya umutebeto kuli Yeova uku Syilo, musumba wa Syilo waya pakasi kakwe Betele na Lebona, wayela uku ufumondaka wa museo uwafuma uku Betele ukuya uku Syekemu.” 20 Fwandi yanenyile aonsi ya mutundu wakwe Benjamini iyati: “Yangini mukafisame mu vyalo vya myangazi. 21 Nupya ndi mwalola akazyana ya mu Syilo yafuma nu kwiza umu kucinila pamwi ala yakuzinguluka, muce mufume umu vyalo vya myangazi, nupya cila muntu ace aleme umukazyana wenga uwa ku Syilo nu kumusenda kuti aye umuci wakwe, nupya muce muswilile uku mpanga yakwe Benjamini. 22 Nupya ndi cakuti ya isi nanti aina yao iza umu kuilizyanya kuli sweswe tulayanena tuti, ‘Yaazwini pa mulandu witu, pano twafizilwe ukuyapeela akazyana aakumanile, nupya namwe mutanga muitemelwe ukuyapeela ana inu akazyana pano cingalenga muye nu mulandu.’”
23 Fwandi amu mutundu wakwe Benjamini yacisile vivyo kwene, nupya cila muntu wasenzile umukazyana ukufuma pa yanaci aacinanga kuti aye umuci wakwe. Na pa cisila yaswilile uku mpanga yao iyaya yakuula imisumba cipya cipya nu kutandika ukwikalamo.
24 Lyene Aina Izlaeli yasalangine ukufuma pano yaali iyaya umu mitundu nu mu ndupwa zyao, nupya cila muntu waswilile uku mpanga yakwe.
25 Mu manda yaya mu Izlaeli mutaali umwene. Cila muntu wacitanga cino akulola ukuti ali cilungame.