1 Samweli
6 Mbokosi ya Upangano yakwe Yeova ikazile umu mpanga iya Ina Filisti pa myezi 7. 2 Aina Filisti yamile ya simapepo na yakacita ya vinjelengwe nu kuyuzya iyati: “Tumacita uli ni Mbokosi ya Upangano yakwe Yeova? Tunenini vino tumacita pakuti tuiswilizye kuno yafumile.” 3 Nayo yaswike iyati: “Ndi cakuti mwaswilizya imbokosi ya upangano yakwe Yeova Leza wa Ina Izlaeli mutaiswilizya sile ukwaula upe. Mulinzile ukuiswilizizya pamwi ni lambo lya pa mulandu. Nga mwacita sile vivyo alino mumapoziwa, nupya alino cimamanyikwa kuli mwemwe umulandu uno Leza akumufulwila.” 4 Fwandi yuzizye iyati: “I lambo ci lya pa mulandu lino tulinzile ukutuma?” Nayo yaswike iyati: “Kulingana ni mpendwa yakwe ya mwene Aina Filisti, tumini ivikoline ni vikavimba apakafumila usaali vyakwe goldi ivili 5 alino ni vikoline na ya kuza vyakwe goldi ivili 5, pano icinkunka icili cimwi kwene icimuponela mwensi kumwi na ene inu. 5 Mulinzile ukupanga ivinkolanya vya ulwale uno mulwile uwa kuvimba apakafumila usaali ni vinkolanya vyakwe ya kuza aakonona impanga nupya mulinzile ukucindika Leza wa Ina Izlaeli. Limwi amacefya intazi iili pali mwemwe, pali leza winu nu mu mpanga inu. 6 U mulandu ci uno mungakomezya imyenzo inu wakwe vino Falao na Ina Ijipti yakomizye imyenzo? Lino Leza wayafulwile, yanenyile Aina Izlaeli kuti yapita, nayo yapisile. 7 Lyene pekanyini cikocikala icipya na ya nyina ng’ombe yaili aakweti utwana nupya atatala yakulikwapo umwi yoko. Muzikulike uku cikocikala nomba muswilizye utwana uku luwa pakuti tutakonka. 8 Mutole Imbokosi ya Upangano yakwe Yeova nu kuika pa cikocikala, nupya vyakwe goldi vino mukutuma kuli Leza ukuya ilambo lya pa mulandu, muvike umu mbokosi alino mwike imbokosi iiyo mupiipi ni Mbokosi ya Upangano. Lyene muleke ing’ombe zyapita 9 nupya mwike mano kuli cii: Ndi cakuti ing’ombe zyaya uku museo wa ku Beti-syemesyi kuno Imbokosi ya Upangano yafumile, ale Leza wao u watacita ivintu vii viipisye kuli sweswe. Lelo nga zitalungime kuko, tumamanya ukuti asi aliwe uwatatuletela intazi yii; ale iviicitikila sile ukwaula ukwenekela.”
10 Vikwene avino yacisile. Yatozile ya nyina ng’ombe yaili aakweti utwana nu kuyakulika uku cikocikala, nupya yasiile utwana umu luwa. 11 Lyene isile Imbokosi ya Upangano yakwe Yeova pa cikocikala, alino ni mbokosi umwali vinkolanya vyakwe ya kuza vyakwe goldi ni vinkolanya vya ulwale ukavimba apakafumila usaali vyakwe goldi. 12 Ing’ombe zyalungime uku museo wa ku Beti-syemesyi. Zyatwalilile ukupita umu museo kwene uwo, zyalilanga lino zikupita; zitaapaalukile ukwi lunji nanti kuli cimani. Nupya aene aa Ina Filisti yazilondelanga suka iyaya iyafika uku mupaka uwa Beti-syemesyi. 13 Aina Beti-syemesyi yazombolanga ingano mu mukonko uwayelile umu nyika. Lino yakatwisye manso nu kulola Imbokosi ya Upangano, yasansamwike sana. 14 Ing’ombe zyaile umu calo cakwe Yoswa Umwina Beti-syemesyi nupya zimilile umupiipi ni ciliwe icikalamba. Fwandi yaputozile imbao izyali uku cikocikala nupya yapeezile ing’ombe ukuya ilambo lya koca kuli Yeova.
15 Aina Levi isizye Imbokosi ya Upangano yakwe Yeova ni mbokosi iyali pamwi nayo umwali vyakwe goldi vino yapanzile, yazisile pa ciliwe cikalamba. Aina Beti-syemesyi yapeezile malambo ya koca na malambo yauze kuli Yeova pa wanda kwene uuwa.
16 Lino aene 5 aa Ina Filisti yaweni ivyacitike, yaswilile uku Ekiloni pa wanda kwene uuwa. 17 Ivinkolanya vyakwe goldi vya ulwale wa kuvimba apakafumila usaali vino Aina Filisti yatumile ukuya ilambo lya pa mulandu kuli Yeova aevi: conga cali icakwe Asyidodi, conga cali icakwe Gaza, conga cali icakwe Asyikeloni, conga cali icakwe Gati, alino na conga cali icakwe Ekiloni. 18 Nupya impendwa yakwe ya kuza ya unkolanya apangilwa na goldi yaalingine ni mpendwa ya misumba ya Ina Filisti yakwe ya mwene 5, kuli kuti misumba iyakwata malinga alino ni mizi iyayela umu mpanga.
Nupya iciliwe icikalamba pano isile Imbokosi ya Upangano yakwe Yeova caya unte kufika na ndakai mu calo cakwe Yoswa Umwina Beti-syemesyi. 19 Lelo Leza wakomile Aina Beti-syemesyi pa mulandu wakuti yaweni Imbokosi ya Upangano yakwe Yeova. Wakomile antu 50,070, nupya antu yatandike ukuloosya pa mulandu wakuti Yeova wakomile antu aingi sana. 20 Aina Beti-syemesyi yuzizye iyati: “A weni amaimilila pa nkoleelo yakwe Yeova Leza wii uwa muzilo? Cingazipa nga wafumile kuli sweswe nu kuya kuli yauze.” 21 Fwandi yatumile mazwi uku ikazi ya ku Kilyati-yealimu iyati: “Aina Filisti iyawezya Imbokosi ya Upangano yakwe Yeova. Izini muisende.”