Yakapingula

11 Yefuta Umwina Gilyadi wali umusilika uwa maka; wali umwana wakwe cizelele nupya Gilyadi wali ali isi. 2 Lelo Gilyadi wakweti ana na yauze aonsi umu muci wakwe. Lino ana ya muci wakwe yakuzile, yazinzile Yefuta nu kumunena iyati: “Utalakwata ica upyanyi umu ng’anda yakwe tata, pano wewe mwana wa mwanaci muze.” 3 Fwandi Yefuta utwike aina yakwe aya aikala umu mpanga iya Tobu. Nupya aonsi aatakweti ivyakucita yaile kuli aliwe nu kutandika ukumulondela.

4 Lino papisile insita Aina Amoni yalwisizye Aina Izlaeli. 5 Nupya lino Aina Amoni yalwisizye Aina Izlaeli, lilyo kwene akalamba ya mu Gilyadi yaile umu kusenda Yefuta ku mpanga ya Tobu. 6 Yanenyile Yefuta iyati: “Iza ututungulule umu ulwi pakuti tukalwisye Aina Amoni.” 7 Lelo Yefuta uzizye akalamba ya mu Gilyadi ati: “Uzye asi mwemwe mwampasile sana mpaka imunzinga nu mu ng’anda yakwe tata? U mulandu ci uno lyene mwizila kuli nene lino mwakwata intazi?” 8 Akalamba ya mu Gilyadi nayo yamwaswike iyati: “Uwo kwene ali mulandu uno itwizila. Ndi cakuti wapita naswe umu kulwisya Aina Amoni, ulaya intunguluzi itu mu mpanga yonsi ya Gilyadi.” 9 Lyene Yefuta wayanenyile ati: “Ndi cakuti mwansenda umu kulwisya Aina Amoni nupya Yeova wangavwa ukuyacimvya, ale umu cumi ndaya intunguluzi inu.” 10 Akalamba ya mu Gilyadi nayo yamunenyile iyati: “Yeova ali kambone, tulacita ukulingana na vino walanda.” 11 Fwandi Yefuta wapisile pamwi na akalamba ya mu Gilyadi, nupya antu yamusoolwile ukuya intunguluzi yao nu kuya umukalamba wa yasilika. Nupya Yefuta waswilizye ukulanda amazwi yakwe yonsi pa nkoleelo yakwe Yeova uku Mizipa.

12 Lyene Yefuta watumile inkombe uku mwene wa Ina Amoni, ati: “U mulandu ci uno wansokela pakuti uwize umu kuzanza impanga yane?” 13 Lyene umwene uwa Ina Amoni waswike inkombe zyakwe Yefuta ati: “A pa mulandu wakuti lino Aina Izlaeli yafumanga uku Ijipti yaposile impanga yane iyafumilila uku Alinoni yapita uku Yaboki nu kuyafika uku Luzi Lwa Yodani. Acino umbwezezye impanga iiyo umu mutende.” 14 Lelo Yefuta nupya kwene watumile inkombe uku mwene wa Ina Amoni, 15 kuti zikamunene ziti:

“Yefuta watalanda ati: ‘Aina Izlaeli yataaposile impanga iya Ina Moabu ni ya Ina Amoni, 16 pano lino Aina Izlaeli yafumanga umu Ijipti yaapisile umu lwanga iyaya iyapita kuli Yemba Muyenzu alino iyaya uku Kadesyi. 17 Lyene Aina Izlaeli yatumile inkombe uku mwene wa ku Edomu iyati: “Twapaapata leka tupite umu mpanga yako,” lelo umwene ataayazumilizye. Nupya yatumile amazwi nu ku mwene wa ku Moabu, lelo nawe kwene ataayazumilizye. Fwandi Aina Izlaeli yatwalilile ukwikala umu Kadesyi. 18 Lino yapitanga umu lwanga, yapambite impanga ya Edomu ni mpanga ya Moabu. Yapisile uku ufumondaka wa mpanga ya Moabu nu kuyapanga inkambi mu ncende ya Alinoni; yatingile umu mupaka wa mpanga ya Moabu pano uluzi lwa Alinoni lwali ali mupaka wa Ina Moabu.

19 “‘Lyene Aina Izlaeli yatumile inkombe kuli Sihoni umwene wa Ina Amoli uwateekanga umu Hesyiboni, iyati: “Twapaapata leka tupite umu mpanga yako pakuti tuye uku mpanga itu.” 20 Lelo Sihoni atazumilizye Aina Izlaeli ukupita umu ncende yakwe, fwandi wakolonganike antu yakwe yonsi nu kuyapanga inkambi ku Yahazi nupya walwisizye Aina Izlaeli. 21 Lyene Yeova Leza wa Ina Izlaeli wapeezile Sihoni na antu yakwe yonsi mu minwe ya Ina Izlaeli, nayo yayacimvizye nu kupoka impanga yonsi ino Aina Amoli ikalangamo. 22 Fwandi yaposile incende yonsi ya Ina Amoli kufuma uku Alinoni kufika uku Yaboki nu kufuma uku lwanga ukufika uku Yodani.

23 “‘Yeova Leza wa Ina Izlaeli aliwe wazinzile Aina Amoli pa nkoleelo ya Ina Izlaeli, uzye wewe umazinga Ina Izlaeli? 24 Uzye usitola impanga ino Kemosyi leza wako wakupeela? Fwandi naswe kwene wensi wino Yeova Leza witu watuzingila ali wino tulazinga. 25 Uzye watucila Balaki mwana Zipoli, umwene wa ku Moabu? Uzye Balaki watazile acimvyanyapo na Ina Izlaeli nanti ukuyalwisya? 26 Lino Aina Izlaeli ikalanga umu Hesyiboni nu mu misumba inono iyalimo, mu Aloeli nu mu misumba inono iyalimo alino nu mu misumba yonsi iyayelile umu mbali ya luzi lwa Alinoni pa myaka 300, u mulandu ci uno utayaapokile impanga? 27 Ntaluvyanya icili consi kuli wewe, lelo watuluvyanya pa kwiza umu kunzanza. Leka Yeova kapingula apingule ilelo pa Ina Izlaeli na pa Ina Amoni.’”

28 Lelo umwene uwa Ina Amoni wakanyile ukuvwa mazwi yano Yefuta watumile kuli aliwe.

29 Umupasi wakwe Yeova wizile pali Yefuta, nupya wapisile umu Gilyadi nu mu ncende yakwe Manase aya uku musumba wa Mizipa uwayelile umu mpanga ya Gilyadi, lyene wafumile uku Mizipa aya uku Ina Amoni.

30 Lyene Yefuta walafile umulapo kuli Yeova ati: “Ndi cakuti wapeela Ina Amoni mu minwe yane, 31 ale wensi alatandikilapo ukufuma umu ng’anda yane nu kwiza nkomenkanya lino ndawela umutende ukufuma uku Ina Amoni, alaya uwakwe Yeova nupya ndamupeela wa upe wa koca.”

32 Fwandi Yefuta waile umu kulwisya Aina Amoni nupya Yeova wayapeezile umu minwe yakwe. 33 Wayacimvizye nu kuyakoma icipisye ukufuma uku Aloeli kuyafika nu ku Miniti, kuli kuti wacimvizye imisumba 20 kuyafika nu ku Abeli-kelamimu. Vikwene avino Aina Izlaeli yacimvizye Aina Amoni.

34 Mu kusyalikizya Yefuta waswilile ukwakwe uku Mizipa, nupya lolini! umwanakwe umukazyana waile umu kumukomenkanya, ala akulizya kangoma nu kucina. Wikwene ali mwana sile wino Yefuta wakweti. Ataakweti umwana muze umonsi nanti umwanaci. 35 Lino wamuweni, walepwile ivyakuzwala vyakwe nu kulanda ati: “Iye mwanane! Wanguvwisya sana uyi, pano wewe nimazinga. Nalavile kuli Yeova, nupya ntanga nsenuke.”

36 Lelo umwanakwe wamunenyile ati: “Tata ndi cakuti mwalafile umulapo kuli Yeova, mulinzile ukucita ukulingana na vino mwalavile, pano Yeova watamwazwilizya ukucimvya alwani inu, Aina Amoni.” 37 Nupya wanenyile isi ati: “Nkulenga sile icintu conga. Lekini inje nenga pa myezi iili, nupya lekini inje uku myamba nu kuyaloosya pali unacisungu wane pamwi na anaci yanji.”*

38 Isi wamunenyile ati: “Pitanga!” Fwandi wapisile pa myezi iili nu kuya uku myamba pamwi na anaci yauze umu kuloosya pali unacisungu wakwe. 39 Pa cisila ca myezi iili, waswilile kuli isi, nupya isi wacisile kuli aliwe ukulingana nu mulapo uno walafile. Mwana Yefuta ataatazile alaalepo nu monsi. Nupya umu Izlaeli mwizile imuya ulutambi lwakuti: 40 Cila mwaka anaci acance Aina Izlaeli yaya umu kukomelezya mwana Yefuta umwina Gilyadi pa manda 4.