Luti
3 Naomi wanenyile Luti nyinavyala ati: “Mwanane, uzye citanga cizipe nga nakulondiile umonsi wa kukutwala,* pakuti ivintu vikuzipile? 2 Boasi a lupwa witu. Ali mwineco wa yaomvi akazyana yano waombanga nayo. Ilelo manguzi amaelanga baale pa lwano. 3 Fwandi fulala nu kupakala mafuta anunkile; lyene uzwale ivyakuzwala ivisuma sana nu kuya uku lwano. Utaya ukalolekele kuli aliwe ukufikila lino Boasi wamala ukulya nu kumwa. 4 Ndi cakuti walaala, ukamanye pano amalaala; lyene ukamuvimbule uku ntambalilo akuno ulaale. Amaya akakunene vino ufwile ukucita.”
5 Lino Luti uvwile vivyo, waswike ati: “Nimacita vyonsi vino mwanena.” 6 Luti waile uku lwano nupya wacisile vyonsi vino nyinavyala wamunenyile. 7 Lyene Boasi waliile nu kumwa nupya wasansamwike. Nupya waile alaala umu mbali ya mutumba wakwe baale. Pa cisila, Luti wapisile cimyamya aya amuvimbula uku ntambalilo akuno alaala. 8 Usiku pakasi Boasi watandike ukuzakaza, nupya lino wakatwisye ica mutwe waweni umwanaci aizi uku ntambalilo. 9 Wamuzizye ati: “Wewe weni?” Nawe wamwaswike ati: “Nene Luti umuomvi winu. Vimbini umuomvi winu, pano mwemwe muli kakulula.” 10 Lyene Boasi walanzile ati: “Si Yeova akupaale mwanane. Umuku uu watulanga sana ukutemwa kwa cisinka ukucila na vino cali pa muku wa kutandikilako, pano utalondelile alumendo, yaye apiina nanti aakankala. 11 Acino mwanane, utuvwa intete. Ndakucitila consi cino ukulonda, pano antu yonsi umu musumba yamanya ukuti wewe mwanaci musuma sana. 12 Nanti icakuti i cacumi nene kakulula, kuli kakulula umupalamisye sana ukucila nene. 13 Tale laala pakwene vino ucili usiku, nupya ndi cakuti alakukulula katondo, ale cazipa! Kace akukulule. Lelo ndi cakuti atalakukulula, nene kwene ndakukulula, nalapa umwi zina lyakwe Yeova, Leza wa umi. Laala pakwene ukufikila katondo.”
14 Fwandi waizi uku ntambalilo ukufika katondo, nupya wakatwike ale pacili ipafita pakuti umwi atamumanya. Boasi aatalondanga cimanyikwe ukuti umwanaci waile uku lwano.” 15 Lyene Boasi wanenyile Luti ati: “Leta icakuzwala ca kunzi, nupya cikonzolole.” Fwandi wakonzolwile, nawe witiilepo ivipimo 6 vyakwe baale* nu kumutwika, pa cisila Boasi waile umu musumba.
16 Luti waile kuli nyinavyala, nawe waile amuzya ati: “Vyakupitila uli mwanane?” Nawe wamunenyile vyonsi vino Boasi wamucitiile. 17 Wamunenyile nu kuti: “Ali wampeela ivipimo 6 vyakwe baale nu kuneena ati, ‘Utapita minwe kuli nyokovyala.’” 18 Lino Naomi uvwile vivyo, walanzile ati: “Ikala paa mwanane, ukufikila umanye vino ivintu vimaya, pano Boasi asikwikala sile mpaka amale umulandu uu ilelo kwene.”