Luti
4 Boasi waile ku mpongolo ya musumba nu kwikala kuuku kwene. Lyene kakulula wino Boasi walandangapo wapitanga. Boasi wanenyile umuntu wiyo ati: “Iza nduwikale pano.” Nawe waile aikala. 2 Lyene Boasi wamile akalamba ya mu musumba 10 nu kuyanena ati: “Ikalini paa.” Nayo iikazile.
3 Boasi wanenyile kakulula ati: “Naomi wino wawela ukufuma uku mpanga ya Moabu, alinzile ukukazya impanga ino yaali iyakwe Elimeleki umwina witu. 4 Fwandi inelenganya ukuti nkunene inti, ‘Kala impanga pa manso ya yantu aakaikala kuno na akalamba ya yantu itu. Ndi cakuti ukulonda ukukala impanga yii, kala. Lelo ndi cakuti usikulonda ukukala, neene pakuti imanye, pano wewe ukweti insambu ya kuikala nupya nene indi wakwe ciili pali wewe.’” Nawe waswike ati: “Injipeelesya ukuikala.” 5 Boasi walanzile ukuti: “Uwanda uno ulakala impanga kuli Naomi, uce uwiusye nu kuti ale ukukala na kuli Luti kwene Umwina Moabu mukamfwilwa, pakuti ica upyanyi ca muntu umufwe cingatwalilila ukuya icakwe.” 6 Lino uvwile vivyo, umuntu wiyo walanzile ati: “Ntanga nkwanisye ukukala impanga yii, pano ningonona ica upyanyi cane. Wewe kwene kala ukuomvya insambu zyane, pano nemo ntanga nkwanisye.”
7 Lyene ukulingana nu lutambi ulwaliko umu Izlaeli ukulozya ku nsambu zya kukala nu kukauzya pakuti paye usininkizyo, vino yacitanga aevi: Umuntu wazuulanga indyatu nu kupeela umuze, nupya nga yacita vivyo ale alino paya usininkizyo wakuti iyazumilizyanya. 8 Fwandi lino umuntu wiyo wanenyile Boasi ukuti, “Wewe kwene kala impanga yii,” wazuuzile indyatu. 9 Lyene Boasi wanenyile akalamba na antu yonsi ati: “Ilelo mwemwe ya kambone pali vino nkukala kuli Naomi vyonsi ivyali ivyakwe Elimeleki na vyonsi ivyali ivyakwe Kilyoni na Maaloni. 10 Nupya nimatola Luti Umwina Moabu, uwali umuci wakwe Maaloni, aye a mamane pakuti ica upyanyi ca muntu uwafwa citwalilile ukuya icakwe, na pakuti izina lya muntu uwafwa litwalilile umu ina yakwe na pa mpongolo ya musumba uno wikalangamo. Ilelo mwemwe ya kambone.”
11 Lino antu yonsi aali pa mpongolo ya musumba kumwi na akalamba yuvwile vivyo, yalanzile iyati: “Sweswe ya kambone! Si Yeova apaale umwanaci wino ukutwala pakuti angaya wakwe Lakeli na Leya, muno uluko lwa Ina Izlaeli lwafumile. Si vintu vikuzipile umu Efulata nupya upange izina lisuma umu Betelemu. 12 Si ulupwa lwako luye wa lupwa lwakwe Pelezi, wino Tamala waviile kuli Yuda, ukupitila umu mwana wino Yeova alakupeela umu mukazyana wii.”
13 Boasi watwazile Luti. Wapanzile nawe icupo, nupya Yeova walenzile ukuti akwate inda nu kuvyala umwana umonsi. 14 Lyene anaci yanenyile Naomi iyati: “Alumbanyiziwe Yeova, uwatakupeela kakulula ilelo. Si izina lya mwana wii lisimikwe umu Izlaeli! 15 Umwana wii watakuwezezya umi nupya alaakusakamala umu ukote, pano watavyalwa kuli nyokovyala uwakutemwa, nupya nyokovyala wii u musuma kuli wewe ukucila ana aonsi 7.” 16 Naomi watozile umwana amufukatila nu kutandika ukumusakamala. 17 Lyene anaci ainamupalamano yamuteemile izina. Yalanzile iyati, “Umwana umonsi watavyalwa kuli Naomi,” nupya yamuteemile izina iyati a Obedi. A isi wakwe Yese, isi wakwe Devedi.
18 Lyene vii ali vino ulupwa lwakwe Pelezi lwali: Pelezi wali a isi wakwe Eziloni; 19 Eziloni wali a isi wakwe Lamu; Lamu wali a isi wakwe Aminadabu; 20 Aminadabu wali a isi wakwe Nasoni; Nasoni wali a isi wakwe Salimoni; 21 Salimoni wali a isi wakwe Boasi; Boasi wali a isi wakwe Obedi; 22 Obedi wali a isi wakwe Yese; Yese nawe wali a isi wakwe Devedi.