Ibuku Lyakwe Ciili Lyakwe Samweli
6 Devedi nupya kwene wakolonganike asilika aamanyile sana ivya ulwi mu Izlaeli, yonsi pamwi yaali 30,000. 2 Lyene Devedi pamwi na aonsi yonsi yano wali nayo yaile uku Baali-yuda umu kusenda Imbokosi ya Upangano yakwe Leza wa cumi, pano antu yakapepela Yeova wa maumba uwikala papela* yakwe ya kelubi. 3 Nomba pa kufumya Imbokosi ya Upangano yakwe Leza wa cumi ku ng’anda yakwe Abinadabu iyayelile pa mwamba; yaisile pa cikocikala icipya nupya Uza na Ahiyo, kuli kuti ana yakwe Abinadabu, aatungululanga ing’ombe izyatintanga icikocikala.
4 Fwandi yafumizye Imbokosi ya Upangano yakwe Leza wa cumi uku ng’anda yakwe Abinadabu iyayelile pa mwamba, nupya Ahiyo wali pa nkoleelo ya cikocikala umwali Imbokosi ya Upangano. 5 Devedi na Ina Izlaeli yonsi yazevyanga pa nkoleelo yakwe Yeova ala yakulizya mazeeze, mabanjo, tungoma, na vyuze ivyakulizizyako inyimbo. 6 Nomba lino yafisile pa lwano lwakwe Nakoni, Uza watambalike ikasa nu kulema Imbokosi ya Upangano yakwe Leza wa cumi pano ing’ombe zyakasi ziiponye. 7 Cii calenzile Yeova asokele sana Uza pa mulandu wa kukanacindika isunde lyakwe, na Leza wa cumi wamukomile nupya wafwilile umupiipi ni Mbokosi ya Upangano yakwe Leza wa cumi. 8 Nomba Devedi wasosile pa mulandu na vino Yeova wasokiile Uza; nupya incende iiya ikaamwa ukuti Pelezi-uza* ukufika na ndakai. 9 Fwandi Devedi watiinyile sana Yeova pa wanda uuwa nu kulanda ati: “Uzye Imbokosi yakwe Yeova ingiza uli kuli nene?” 10 Devedi atalondanga ukutwala Imbokosi ya Upangano yakwe Yeova mu musumba uno wikalangamo uno yamanga ukuti Musumba Wakwe Devedi. Lelo walesile ukuti yaitwale uku ng’anda yakwe Obedi-edomu Umwina Gati.
11 Imbokosi ya Upangano yakwe Yeova yatwalilile ukwikala umu ng’anda yakwe Obedi-edomu Umwina Gati pa myezi itatu, nupya Yeova watwalilile ukupaala Obedi-edomu na amu ng’anda yakwe yonsi. 12 Yanenyile Umwene Devedi ukuti: “Yeova watapaala amu ng’anda yakwe Obedi-edomu na vyonsi vino wakwata pa mulandu wa Mbokosi ya Upangano yakwe Leza wa cumi.” Fwandi Devedi waile umu kusenda Imbokosi ya Upangano yakwe Leza wa cumi kufuma uku ng’anda yakwe Obedi-edomu nu kuitwala uku Musumba Wakwe Devedi ala watasansamuka. 13 Lino aasenzile Imbokosi ya Upangano yakwe Yeova yatampwile intampulo 6, Devedi wapeezile cipambasi nu mwana wa ng’ombe umwine ukuya ilambo.
14 Devedi wacinanga ala akuzinguluka pa nkoleelo yakwe Yeova na maka yakwe yonsi; wazwite efodi wa nsalu isuma. 15 Devedi na Ina Izlaeli yonsi yatwalanga Imbokosi ya Upangano yakwe Yeova umu musumba ala iyasansamuka nupya yalizyanga mapenga. 16 Nomba lino yafisizye Imbokosi ya Upangano yakwe Yeova umu Musumba Wakwe Devedi, Mikala mwana Saulo wasungamile api windo nu kulola Umwene Devedi akutolooka nu kucina ala akuzinguluka pa nkoleelo yakwe Yeova; nupya watandike ukutumfya Devedi umu mwenzo. 17 Fwandi yatwazile Imbokosi yakwe Yeova mu musumba nu kuika pano ifwile ukuya umwi tenti lino Devedi wapanzile. Lyene Devedi wapeezile malambo ya koca na malambo ya mutende kuli Yeova. 18 Lino Devedi wamazile ukupeela malambo ya koca na malambo ya mutende, wapaazile antu umwi zina lyakwe Yeova wa maumba. 19 Lyene wapeezile antu amu Izlaeli yonsi, aonsi na anaci yonsi, mukate uulungane uwa cipongo pakasi, ya keke aapangilwa ni vizao vya tuncindu, na ya keke aapangilwa ni myangazi iyume, nupya yonsi yapisile cila muntu ukwakwe.
20 Lino Devedi waile umu kupaala amu ng’anda yakwe, Mikala umwana umukazyana wakwe Saulo waile umu kumukomenkanya. Walanzile ati: “Iye mwe vino umwene wa Ina Izlaeli wataizewanya ilelo pa manso ya yaomvi yakwe akazyana, wataizewanya kwati u muntu muwelewele!” 21 Devedi nawe wanenyile Mikala ati: “Nkuzevya kuli Yeova uwansoolwile ukucila ukusoolola so na amu ng’anda yakwe yonsi nupya wansoolwile ukuya intunguluzi ya yantu yakwe Yeova Aina Izlaeli. Fwandi namazevya pa nkoleelo yakwe Yeova, 22 namaicefya ukucila na pali vino injicefya nupya namailolanga umusuulwe. Lelo uku yaomvi yane akazyana yano watulandapo, namacindamikwa.” 23 Fwandi Mikala umwana umukazyana wakwe Saulo ataakwetipo ana ukufikila na pa wanda uno wafwile.