2 Milandu
10 Leoboamu waile uku Syekemu, pano Aina Izlaeli yonsi akuno yaile pakuti yakamwike pa wene. 2 Lino Yeloboamu mwana Nebati uvwile sile ivyacitike (pa nsita iiya ala acili uku Ijipti kuno utukiile lino wapuukanga Umwene Solomoni), wawezile ukufuma uku Ijipti. 3 Lyene yatumile aakuyamwama, nupya Yeloboamu na Ina Izlaeli yonsi yaile kuli Leoboamu nu kuyamunena iyati: 4 “Tata wako walesile kuti ivintu vyatutalila, lelo wemo ndi cakuti watwangusizya uwikazi nu kusisya ivisendo ivifine pa mitwe itu tumakuombelanga.”
5 Leoboamu nawe wayanenyile ati: “Pitangini, muce muwele pa cisila ca manda yatatu.” Nayo yapisile. 6 Lyene uzizye aikolo aombelanga Solomoni isi ala acili nu umi ati: “Uzye mungampanda uli amano pali vino ningasuka antu yaa?” 7 Nayo yamwaswike iyati: “Ndi cakuti umacitilanga antu yaa ivisuma nu kuyalenga ukuya ni nsansa nupya wayasuka ningo, yamakuombelanga lyonsi.”
8 Lelo wakanyile ukuvwa kuli aliyo, nupya waile umu kuzya aonsi acance alingine nawe umusinku nupya amuombelanga. 9 Wayuzizye ati: “Uzye mungampanda uli amano pali vino tungasuka antu akulanda yakuti, ‘Utwangusizye icisendo cino tata wako wisile pali sweswe’?” 10 Aonsi yayo acance yamunenyile iyati: “Antu aakulanda ukuti, ‘Tata wako walesile ivintu vyatutalila, lelo wemo utwangusizyeko icisendo’; ukayanene uti, ‘Ndalenga ukuti mwaombesya ukucila vino tata wacisile. 11 Tata walenzile icisendo ukumufinila, lelo nemo ndalenga cifinileko. Tata wamumanga sile ni mikota, lelo nemo ndaamuma na swepu.’”
12 Yeloboamu na antu yonsi yaile kuli Leoboamu pa wanda wakwe citatu, wakwe vino wayanenyile ati: “Muce muwele pa wanda uwalenga citatu.” 13 Lelo Umwene Leoboamu wayakalipile. Wakanyile ukuomvya amano yano aikolo yamupanzile. 14 Wayanenyile wakwe viivi kwene vino aonsi acance yamupanzileko amano ati: “Ndalenga icisendo cinu ukufinilako ukucila na vino cili ndakai. Tata wamumanga sile ni mikota, lelo nemo ndaamuma na swepu.” 15 Fwandi umwene atuvwile kuli vino antu yalanzile, pano Leza wa cumi u walenzile ukuti ciye vivyo, pakuti amazwi yano Yeova walanzile ukupitila muli Ahiya Umwina Syilo ukulozya kuli Yeloboamu mwana Nebati yafikiliziwe.
16 Lino Aina Izlaeli yonsi yaweni ukuti umwene wakana ukuvwa kuli aliyo, yalanzile iyati: “Lekini ica upyanyi ca mwana wakwe Yese cimusyalile. Mwensi kwene pitangini kuli ya leza inu. Naawe Devedi syala na amu ng’anda yako!” Lyene Aina Izlaeli yonsi yaswilile uku mang’anda yao.
17 Lelo Leoboamu watwalilile ukuteeka Aina Izlaeli aikalanga umu misumba yakwe Yuda.
18 Lyene umwene Leoboamu watumile Hadolamu uwangalilanga aombanga umulimo wa kupatikiziwa, lelo Aina Izlaeli yamutamile na mawe mpaka afwa. Umwene Leoboamu wene wakwezile iceleta lyakwe autukila uku Yelusalemu. 19 Nupya Aina Izlaeli yatwalilila ukupondokela amu ng’anda yakwe Devedi ukufika na ndakai.