Luti
2 Naomi wakweti lupwa wakwe uwali u mukankala sana, wino wali a lupwa wakwe iya; izina lyakwe wali a Boasi, nupya wali uwa mu lupwa lwakwe Elimeleki.
2 Luti Umwina Moabu wanenyile Naomi ati: “Lekini napita uku vyalo umu kutolelezya baale ku muntu ali wensi aamaya akanguvwile uluse.” Naomi nawe wamunenyile ati: “Pitanga mwanane.” 3 Lyene Luti wapisile nu kuyatandika ukutolelezya vino aazombolanga yasyanga. Ukwaula ukumanya, waile aingila umu calo cakwe Boasi wino wali a lupwa wakwe Elimeleki. 4 Pataalengile Boasi wafisile umu calo ukufuma uku Betelemu nupya wanenyile aazombolanga ati: “Yeova aye namwe.” Nayo yamwaswike iyati: “Yeova amupaale.”
5 Lyene Boasi uzizye umulumendo uwangalilanga azombolanga ati: “Uzye umukazyana wii u wa mu lupwa ci?” 6 Nawe waswike ati: “U Mwina Moabu uwiza na Naomi ukufuma ku mpanga ya Moabu. 7 Iwandenga ndi cakuti angatolelezya baale wino aakuzombola yakusya. Nupya kufuma pano aizile katondo wali akuomba sile, likwene alino wikala pakuti apuzeko panono.”
8 Boasi wanenyile Luti ati: “Uvwa kuno mwanane. Utaaya umu kutolelezya* umu calo cuze, nupya utaaya ukuli konsi; uwaombela umupiipi na aomvi yane akazyana. 9 Uwalola icalo cino yakuzombolamo, nupya uwapitila pamwi nayo. Inena alumendo ukuti yataakupumvyanya. Nga uvwa ulusala, uwaya umu kumwa manzi yano alumendo iyatapa.”
10 Lino Luti uvwile vivyo, wafukime nu kuzya Boasi ati: “U mulandu ci uno mwalangila icikuuku kuli nene nu kunsakamala lino nene wa ku mpanga yuze?” 11 Boasi waswike ati: “Nuvwa vyonsi vino wacitiile nyokovyala pa cisila cakuti uwako wafwa na vino wasiile ya tata yako na ya mayo yako ni mpanga ukwaya ya lupwa yako nu kwiza uku yantu yano utaamanyile nu kumanya. 12 Si Yeova akupeele icilambu pali vino wacita, nupya Yeova Leza wa Ina Izlaeli akupeele icilambu icikalamba sana, wino wemo wizako pakuti aakucingilila.” 13 Luti nawe waswike ati: “Musambazi wane, mwandanga sana icikuuku, pano imunteekezya nu kunkomelezya nanti icakuti insi muomvi winu.”
14 Lino insita ya kulya yafisile, Boasi wanenyile Luti ati: “Iza kuno ulye umukate nupya uutimpike muli waini umukantuke.” Nawe wikazile umupiipi na ya kazombola. Boasi wamupeezile baale umusalule nupya waliile aikuta asyapo na vimwi. 15 Lino waswilile umu kutolelezya, Boasi wanenyile aomvi yakwe alumendo ati: “Lekini aatolelezya na baale kwene umuzombolwe, mutaamucuzya. 16 Mwamusomwelako baale umwi ukufuma umu myanzi nu kumusiila pakuti aatolelezya, nupya mutaamulesya.”
17 Fwandi watwalilile ukutolelezya umu calo suka amanguzi. Lino wapuuzile baale, wakweti umwingi sana.* 18 Lyene wasenzile baale nu kuya umu musumba, nupya nyinavyala waweni vino Luti watolelizye. Luti watwaliile na nyinavyala ivyakulya ivyasiile pali vino waliile.
19 Nyinavyala uzizye Luti ati: “Aekwi kuno iwaya umu kutolelezya ilelo? Uzye aekwi kuno iwaombela? Si umuntu uwali wakulanga icikuuku apaalwe.” Lyene Luti wanenyile nyinavyala ati: “Izina lya muntu wino inaombako ilelo a Boasi.” 20 Lino Naomi uvwile vivyo wanenyile nyinavyala ati: “Si Yeova uwatwalilila ukulanga ukutemwa kwa cisinka ku yantu ya umi na afwe, apaale umuntu wiyo.” Naomi walanzile nu kuti umuntu wiyo a lupwa witu. A wenga pali ya kakulula itu.” 21 Lyene Luti Umwina Moabu walanzile ati: “Iyanena nu kuti, ‘Uwaombela mupiipi na aomvi yane ukufikila lino yalamala ukuzombola.’” 22 Naomi wanenyile Luti nyinavyala ati: “Mwanane, cazipa uwaya uku yaomvi yakwe akazyana kucila kuti yakakucuzya uku calo cuze.”
23 Fwandi waombelanga umupiipi na aomvi yakwe Boasi akazyana nupya watwalilile ukutolelezya ukufikila lino insita ya kuzombola baale ni yakuzombola ingano yasizile. Nupya Luti watwalilile ukwikala na nyinavyala.